¹ 1 ಆಮಿಂದ ಯೆರೂಸಲೆಮ್ನಿಂಚ ವಚ್ಚುಂಡಿನ ಪರಿಸಾಯುಲು ಶಾಸ್ತ್ರಿಲ್ಲ ಕೆಲುವ್ಲು ಯೇಸು ದೆಗ್ರುಕಿ ಕೂಡಿ ವಚ್ಚ್ರಿ . ² ಅಪ್ಪೋರು ಅತನತ ಶಿಷ್ಯರುಕೋರು ಕೆಲಾವರು ಅಶುದ್ದವಾಯಿಕ್ಕಿರ, ಇಂಡೆಕೆ ಕೈ ಕೊಯ್ಯಿಗಾರಕನಿ ರಟ್ಟಿಲಾ ತಿಂಗಿರತ್ತ ಅಯಿಗ್ಯ ಪಾತು , ತಪ್ಪು ಕಂಡುಪುಡುಸ್ಸುನು, ³ ಯಂತ್ಗು ಇಂ ಡೆಕೆ ಪರಿಸಾಯರು ಮತ್ತೆ ಯೆಹೊದ್ಯರದ್ದಿನು ಬೇರ್ ಯ್ಯಲಾತ ಸಂಪ್ರದಾಯತ ಪ್ರಕಾರ ನಡುಕ್ಕರಯ್ಯ ಮತ್ತೆ ಶನಕಡುತು ಕೈ ಕೊಯ್ಯಿಗಾದೆ ಹೊರುತು ಕಲಿ ತಿಂಗಿರಯ್ಯ ಅಲ್ಲ; ⁴ ಅಯಿಗ್ಯ ಬಾಜರಿಂಡು ವಂದಪ್ಪೋರು ಜಳಕು ಸೇಯ್ಯದೆ ಕಲಿ ತಿಂಗಿದಿಲ್ಲನು,ಮತ್ತೆ ಅಯಿಗ್ಯ ದಬುರಿಗ್ಯ ತಾಲಿಗ್ಯ ಮತ್ತೆ ಹಿತಾಳಿತ ದಬುರಿಗ್ಯ ಮೆಜುಗಾ ಕೊವ್ವರಂತ ಅನೇಕ ಆಚಾರಲಾ ಸೆಂದುಗೊಂಡಿಂಚುನು, ⁵ ಪರುಗುಂಡು ಫಾರಿಸಾಯರು ಶಾಸ್ತ್ರೀಗ್ಯ ಅತನುಕು –ನಿಟ ಶಿಷ್ಯರು ಬೇರ್ ಯ್ಯಳತ ಪದ್ಧತಿ ಪ್ರಕಾರ ನಡುಕುದಿಲ್ಲನು, ಅಯಿಗ್ಯ ಕೈ ಕೊಯ್ಯಿಗ್ಯಾದೆ ಯಂತ್ಗು ಕಲಿ ತಿಂಗ್ಯಾನು ಇಂಡು ಕೊಟುಸ್ಸುನು, ⁶ ಅಪ್ಪೋರು ಆತನು ಅಯಿಲಿಕಿ –ಈ ಜನು ತುಟಿಲಿಂಡು ನನ್ನ ಸಾನ್ನ್ಮಾನಿಸಾನು; ಅನೇಕೆ ಅಯಿಲಿತಾ ಹೃದಯ ನನ್ನಿಂಡು ತುರಾಯಿದು, ⁷ ಮಣುಸುರುತ ಕಟ್ಟಳೆಗ್ಯ {ಪದ್ದತಿಗ್ಯ }ಬೋದನೆಲಾ ಸೆಂದು ಕೆಪ್ಪಿಚ್ಚು ನನ್ನ ಅರಾದಿಸರಾದು ವ್ಯೆರ್ಥವಾಯ್ಯಿದು,ಇಂಡು ವರ್ಜಿಕ್ಕರ ಪ್ರಕಾರ ಕಪಟಿಗ್ಯ ಅಯಿಕ್ಕಿರ ನಿಂಗಲಾತ ವಿಷ್ಯತ್ಕೊರು ಯೆಶಾಯನು ವಿಹಿತಾವಾಯ್ಯಿ ಪ್ರಾವಾದಿಸಿದು, ⁸ ನಿಂಗ ದೈವಾಜ್ಞೆಲಾ ಬದಿಕಿ ಅಕ್ಕಿರ್ಕಾಯಿ, ತಾಲಿಗ್ಯ ದಬುರುಗ್ಯ ಕೊವ್ವುರಂತ ಅನೇಕ ಮಣುಸುರುತಾ ಪದ್ದತಿಲಾ ಅನುಸರಸರಂಗ ಇಂಡಸ್, ⁹ ಆತನು ಅಯಿಲಿಕಿ –ನಿಂಗ ನಿಂಗುಲಾತ ಸಂಪ್ರದಾಯ ಕೈಗೊಳ್ಳುರುಕನಿ ದೈವಾಜ್ಞೆತಾ ಸಂಪೂರ್ಣವಾಯಿ ಅಸಡ್ಡೆ ಸೆಂದಿರಂಗ, ¹⁰ ಯಂತ್ಗು ಇಂ ಡೆಕೆ ಮೋಶೆಯು –ನಿಟ ತಾಯಿ –ತೋಪುನಾ ಸನ್ಮಾನಿಸುರುದು ಇಂಡೂ, ಮತ್ತೆ ತಾಯಿನ ಅಗೋಟು ತೋಪುನನ ಅಗೋಟು ಶಪಿಸುರಯ್ಯ ಸಾಗ್ರ್ಲೇ ಬೇಕು ಇಂಡು ಸೋನ್ನಿದು, ¹¹ ಅನೇಕೆ ನಿಂಗ –ಒಂಡು ಮಣುಸು ತಟ ತಾಯಿಕಾಗೋಟು ತೋಪುನುಕಾಗೋಟು –ನೀನು ನನ್ನಿಂಡು ಪಡಿರಂತ ಪ್ರಯೋಜನತ ಕೂರ್ಬಾನ [ಇಂ ಡೆಕೆ ಒಂಡು ದಾನ ]ಅಯ್ಯಿದು ಇಂಡೆಕೆ ಅದು ಸ್ವತಂತ್ರನಾಕ್ಕುದು ಇಂಗ್ಯಾರಂಗ ¹² ಅದು ತಟ ತಾಯಿಕಾಗೋಟು ತೋಪುನುಕಾಗೋಟು ಯಂತುನೂ ಸೇಯ್ಯಿರಿಕು ಉಡಾದೆ, ¹³ ನಿಂಗ ಕೆಪ್ಪಿಚ್ಚಿಕ್ಕಿರ ನಿಂಗುಲಾತ ಸಂಪ್ರದಾಯಾತ ಪ್ರಕಾರ ದವ್ರುತಾ ವಾಕ್ಯತಾ ನಿರರ್ಥಕ ಸೇಯ್ಯರಂಗ; ಇಂಥ ಅನೇಕ ಪದ್ದತಿಲಾತ್ತೆಯ್ಯಿ ನಿಂಗ ಸೇಯ್ಯರಂಗ ಇಂಡಸ್, ¹⁴ ಪರ್ಗುಂಡು ಆತನು ಜನರಾದ್ದಿನು ತನ್ನಂಚುಗು ಅಗುಸು ಅಯಿಲಿಕಿ,---ನಿಂಗುಲುಕೊರು ಪ್ರತಿಯೊಂಡುನು ನಾನು ಸೋನ್ನುರಾತ್ತ ಕೋಟು ತಿಲ್ಜುಗೊಂಗೋ, ¹⁵ ಬೆಲಿಂಡು ಮಣುಸುನೂಲ್ಲಿಕಿ ಹೊಯ್ಯಿ ಅತ್ತ ಹೊಲೆ ಸೇಯ್ಯಿರಾದು ಯಂದಾದು ಇಲ್ಲ ಅನೇಕೆ ಅತ್ತ ವೂಲಿಂಡು ಬೆಲಿಕಿ ವರ್ರಂತಾದೇ ಮಣುಸುನತ್ತೆಯ್ಯಿ ಹೊಲೆ ಸೇಯ್ಯದು {ಕಡುಕಾದು } ¹⁶ ಎತ್ಗಾನ ಕೊಕುರುಕು ಸವ್ವಿಗಿಂದೆಕೆ ಅದು ಕೊಕೋಟು ಇಂಡಸ್. ¹⁷ ಆತನು ಜನರತ್ತೆಯ್ಯಿ ಉಟ್ಟು ಉಟೂಲ್ಲಿಕಿ ವಂದಪ್ಪೋರು, ಅತನತ ಶಿಷ್ಯರು ಆ ಸಾಮ್ಯತ ವಿಶ್ಯವಾಯ್ಯಿ ಅತನತ್ತೆಯ್ಯಿ ಕೋಟುಸುನು ¹⁸ ಆಪೋದು ಆದು ಅಲಿಕಿ ನಿಂಗ ಸಹ ಗ್ರಹಿಕೆ ಇಲ್ಲಾರಂಗಾಯಿರಂಗ ? ಬೆಲಿಂಡು ಮಣುಸುನೂಲಿಕಿ ಸೇರಾಂತದು ಎದೂ ಅತತ್ತೆಯಿ ಹೊಲೇ ಸೇಯ್ಯಿದಿಲ್ಲ ಇಂಡು ನಿಂಗ ತಿಲ್ಜುಗು ಮಾಟ೦ಗ್ಲ ? ¹⁹ ಯಂತ್ಗು ಇಂಡೆಕೆ ಅದು ಅತ್ರ ಹೃದಯ ಸೇರಾದೆ ವರ್ಕೊಕು ಸೇರಿ ಅದ್ದಿ ಆಹಾರ ಪದಾರ್ಥಲಾತ್ತೆಯಿ ಶುದ್ದಿ ಸೆಂದು ಬಹಿರ್ಭೂಮಿಕಿ {ಸಾಂಡಸ್ಸುಕು } ಹೊಕ್ಕುದು ಇಂಡಸ್, ²⁰ ಮತ್ತೆ ಮಣುಸುನೂಲ್ಲಿಕಿ ವರಾಂತದೆ ಮಣುಸುನಾ ಹೊಲೆ ಸೇಯ್ಯದು, ²¹ ಯಂತ್ಗು ಇಂಡೆಕೆ ಮಣುಸುನೂಲಿಂಡು [ಹೃದಯ ತಿಂಡು ] ವರಂತಹ ಇಂಡೆಕೆ ಕೊಟ್ಟಿ ಆಲೋಚನೆಗ್ಯ, ವ್ಯೆಬಿಚಾರಾಗಾ ಹಾದರತನ ಕೊಲೆಗಾ ²² ಕಳ್ಳತನ ದುರಾಸೆ ಕೆಟ್ಟತನ ಮೋಸ ಕಾಮಾಬಿಲಾಷೆ ಕೊಟ್ಟಿದೃಷ್ಟಿ ದೇವದೂಷನೆ ಸೊಕ್ಕು ಬುದ್ದಿಗೇಡುತನ ²³ ಈ ಅದ್ದಿ ಕೊಟ್ಟಿಯ್ಯದು ಅದ್ದಿನು ವುಲ್ಲಿಂಡು ವಂದು , ಮಣುಸ್ನ ಹೊಲೆ ಸೇಯ್ಯದು, ²⁴ ಅಟಿ೦ಡು ಆತನು ಅದ್ದಿಂದು ತೂರ್ ಸಿದೋನು ಮೇರೆಲುಕು ಹೊಯ್ಯಿ,ಒಂಡು ಉಟೂಲ್ಲಿಕಿ ವಂಚು,ಮತ್ತೆ ಅದು ಎತ್ಗು ಗೊತ್ತಾಗುರುದ್ದಲ್ಲ ಇಂಡು ಆತನು ಇಷ್ಟಪಟ್ಟುಸು; ಅನೇಕೆ ಆತನು ಮರೆಯಾಯಿ ಇಕ್ಕಿರುಕು ಅಗಾದೆಹೊಸು, ²⁵ ಯಂತ್ಗು ಇಂಡೆಕೆ ಒಂಡು ಪಂಬುಳಾದು ಆತನ ವಿಶ್ಯಾತ ಕೋಟು,ಆಟಗು ವಂದು ಅತನತ ಪಾದಲುಕು ಭೂಚು,ಯಂತ್ಗು ಇಂಡೆಕೆ ಅತ್ಗು ದವ್ವು ಪುಡಿಸಿಂಚು, ²⁶ ಆ ಪಂಬುಳಾದು ಸುರೋಪೋಯಿನಿಕ ಜನಾಂಗತದು ಅಯಿಕ್ಕಿರ ಒಂಡು ಗ್ರಿಕಾದು, ಆಕೆಯು ತನ್ನ ಮಗುಲುಕು ಪುಡಿಸ್ಸಿಂದ ದವ್ವತ್ತೆಯಿ ಉಡಿಪಿಕ್ಕಿರುದು ಇಂಡು ಕೋಟುಗೊಂಡುಸ್ಸು, ²⁷ ಅನೇಕೆ ಯೇಸು ಅತ್ಗು –ಮಕ್ಕಿಲಿಕಿ ಮೊದಲು ತೃಪ್ತಿಯಾಗೋಟು;ಯಂತ್ಗು ಇಂಡೆಕೆ ಮಕ್ಕಿಲಾತ ರಟ್ಟಿಲಾ ಅತುಗೊಂಡು ನಾಯಿಲಿಕಿ ಹೋಡುರಾದು ಸರಿಯಲ್ಲ ಇಂಡು ಸೋನ್ನುಸು,ಅತ್ಗು ಅದು –ಅಂಬೋ, ²⁸ ಕರ್ತನೆ; ಅನೇಕು ಮೇಜಿನ ದಿಕು ಮಕ್ಕಿಲಾತ್ ರಟ್ಟಿಲಾತ್ತೆಯಿ ನಾಯಿಗ್ಯ ತಿಂಗ್ಯನು,ಇಂಡಸ್, ²⁹ ಆತನು ಅತ್ಗು –ಈ ವೋಕುತಾ ದೆಸೆಯಿಂಡೆ ದವ್ವು ನಿಮ್ ಮಗುಲಾ ಉಟ್ಟುಹೊಯ್ಯಿದು, ನೀನು ಹೋ ಇಂಡಸ್, ³⁰ ಆಕೆಯು ತಟ ಉಟುಗು ವಂದಪ್ಪೋರು ದವ್ವು ಉಟ್ಟೋಟು ಹೊಯ್ಯಿಕ್ಕಿರಾದು; ಮತ್ತೆ ತನ್ನ ಮಗ ಹಾಸಿಗಿ ಮನಿ ಬೂದುಗೊಂಡಿಕ್ಕಿರತ್ತ ಪಾಚು, ³¹ ತಿರ್ಗಿ ಆತನು ತೂರ್ ಸಿದೊನೋ ಪ್ರಾಂತ್ಯಲಿಂಡು ಹೊರಟು ದೆಕಪೋಲಿಯ ತಿರಿಲಾ ನಡುವುಲಿಂಡು ಗಲಿಲಾಯಾತ ಸಮುದ್ರುಕು ವಂಚುನು, ³² ಅಪ್ಪೋರು ಅಯಿಗ್ಯ ತೊದಲ್ರಾ ಒಂಡು ಕಿವುಡುನಾತ್ತೆಯ್ಯಿ, ಅತನಂಚುಗು ಅಸ್ಸೆಂದು, ಆತನತ ಕೈತ್ತೆಯ್ಯಿ ಅತ್ತಮೆನಿ ಅಕ್ಕಿರುದು ಇಂಡು ಅತನತ್ತೆಯಿ ಹೊಡಿಗೊಂಡುಸ್ಸುನು, ³³ ಆತನು ಅತ್ತತ್ತೆಯಿ ಜನಸಮೂಹತಿಂಡು ಅಕ್ಕಿಡಿಕಿ ಅಗುಸ್ಸುಗೊಂಡು ಹೊಯ್ಯಿ ತನ್ನ ಬೇರುಳುಲಾತ್ತೆಯಿ ಅತ್ರ ಸವ್ವಿಕೊಕು ಅಚ್ಚು ಉಮುಜು ಅತ್ರ ನಾಲಿಕಿತ್ತೆಯ್ಯಿ ಮುಟ್ಟುಸು, ³⁴ ಮತ್ತೆ ಆತನು ಪರಲೋಕತಜಾಯಿ ಪಾಕ್ತ ನಿಟ್ಟಿಸಿರು ಉಟ್ಟು,ಅತ್ಗು –ಎಪ್ಪಥಾ ಇಂಡಸ್,ಇಂಡೆಕೆ ತೆರೆಯಲ್ಪಡೋಟು ಇಂಡು ಅರ್ಥು, ³⁵ ತಕ್ಷಣ ಅತ್ರ ಸವ್ವಿಗ್ಯ ತೆರೆಯಲ್ಪಟ್ಟುಸ್ಸುನು,ಅತ್ರ ನ್ಯಾಲ್ಕ್ತ ನರಂಗ ಸಡಿಲವಾಸುನು;ಮತ್ತೆ ಅದು ಸ್ಪಷ್ಟವಾಯ್ಯಿ ವಸ್ಸೇತ್ತುಸ್ಸು, ³⁶ ಎತ್ಗು ಇತ್ತ ಸೋನ್ನುರುದಲ್ಲ ಇಂಡು ಆತನು ಖಂಡಿತವಾಯ್ಯಿ ಸೋನ್ನುಸು; ಅನೇಕೆ ಎದ್ನೆ ಖಂಡಿತವಾಯ್ಯಿ ಸೋನ್ನಿಂದೆಕೂ ಅಯಿಗ್ಯ ಅತ್ತ ಇನ್ನದ್ನು ಹೆಚ್ಚಾಯ್ಯಿ ಪ್ರಚಾರ ಸೆಂಚುನು, ³⁷ ಜನು ಅತ್ಯಂತ ಆಶ್ಚರ್ಯಪಟ್ಟು –ಆತನು ಅದ್ದಿನು ನಲ್ಲುಗು ಸೆಂದಿದು; ಕಿವುಡುರು ಕೊಕುರುಕನಿನೂ, ಮೂಕಯ್ಯ ವಸ್ಸೇತುರುಕನಿನೂ ಸೆಂದಿದು ಇಂಡಗೊಂಡುಸ್ಸುನು,