¹ Jiiri woy cindi taaci banda ga, agay nda Barnabas žigi koyne Žerizalem, ay na Tit mo ka koy ay bande. ² Irkoy ka bangandi ya ne ka kate ya žigi, ay na Alhabar Boryaa kanandi Egilizey jine kaŋ ay gʼa waazu dumey se kaŋ manʼti Alyahuudu. Boro kayantey, ay nʼa kanandi i jine, jere ga hala goyoo kaŋ ay goo mʼa tee wala woo kaŋ ay nʼa tee masi tee yaada. ³ Ba Tit kaŋ cindʼay bande kaŋ ti Grek, a mana tilasandi a ga a ma hurubangu.a ⁴ Woo kul, haya mana katʼa kala ir taari armey kaŋ zanba ka huru ir ra, ka borcintaraa derandi kaŋ ir duu a Almasihu Isa bande kʼir tee baɲɲayaŋ. ⁵ Ir mana yaddʼi se ka cindʼi cire ba alwaati kayna, hala Alhabar Boryaa cimoo ma cindi war kone. ⁶ Wey kaŋ i gʼi dii sanda boro kayante, haya kul kaŋyaŋ no ay si kula, Irkoy si boro ndum guna. Borey kaŋ se i ga nee kayante mana haya daŋ ay ga ka tonton. ⁷ Amma kaŋ i bay Alhabar Boryaa talfandi ay ga yʼa waazu dumiyaŋ kaŋ manʼti Alyahuudu se, sanda takaa kaŋ nda a talfandi Piyer ga Alyahuudey se, ⁸ zama Irkoy kaŋ na sefas soolu a ma tee Alyahuudey diyaa, nga da ka agay mo soolu ya tee diyaw dumey kaŋ manʼti Alyahuudu se ⁹ kaŋ i yadda goyoo kaŋ nondi ya ne Irkoy anneemaa ra, Žak, nda sefas, nda Yehiya kaŋyaŋ ti Egilizoo hugoo ganjiyaŋ na kabe daŋ agay nda Barnabas kaboo ra ka cebe kaŋ ngi yaddʼir ga, ir, ir ma koy goy dumey kaŋ manʼti Alyahuudu game, ngi, ngi ma koy goy Alyahuudey game. ¹⁰ I baa de ir ma hongu talkey, woo ti haya kaŋ ay soobay yʼa tee. ¹¹ Amma kaŋ sefas kaa Antiyoš, ay wanja se borey kul jine, zama a tooɲe. ¹² Waatoo kaŋ boro fooyaŋ kaŋ hun Žak do mana too kate, a ga ŋaa boro bande kaŋ manʼti Alyahuudu, amma za i too kate, a hun borey ra ka yee jere ga, a mana yee ka yadda ka ŋaa i bande, Alyahuudey kaŋ ga hurubanguyanoo kayandi hunburay se. ¹³ Alyahuudey cindey mo na almunafikitaray tee ka hangʼa hala nongu kaŋ ra i na Barnabas mo hangandi ngi bande ngi almunafikitaraa ra. ¹⁴ Amma waatoo kaŋ ay dii i si dira borey kul jine nda Alhabar Boryaa cimoo, ay nee sefas se borey kul jine: «Nda ni kaŋ ti Alyahuudu, nʼga huna sanda aljahil, taka foo no ni gaabandi aljahiley ma tee sanda Alyahuudu?» ¹⁵ Ir, nka hayandi alyahuudutaray, ir manʼti zunubu tee yank ant ti aljahil. ¹⁶ Amma ir ga bay kaŋ ašariyaa diiyanoo si boro tee boro šerrante, boro ma naanay hinne Isa Almasihu no ma boro tee boro šerrante. Ir mo, ir naanay Almasihu Isa hala naanaa kaŋ ir na daŋ a ra mʼir tee boro šerranteyaŋ, amma manʼti nda ašariyaa diiyanoo, zama ašariyaa diiyanoo si boro kul tee boro šerrante. ¹⁷ Ndʼir ga ceeci kʼir boŋ tee boro šerrante Almasihu albarkaa ra, ka gar mo zunubanteyaŋ ti ir hunday, Almasihu ti zunubu tam wala? Abada! ¹⁸ Zama ndʼay yee ka hayey cin kaŋ ay nʼi kayri, ya mma cebe kaŋ ašariyaa hookaw ti agay. ašariyaa kakate ye bukaw, ¹⁹ ay buu a here hala ya duu ka huna Irkoy here. ²⁰ Ay kanjandi Almasihu bande, manʼti agay no ma huna koyne, amma yank an kanjandi Almasihu bande. Hunaroo kaŋ ay goo mʼa tee sohõ da ay gaahamoo ra, ay sʼa huna kala naanaa kaŋ ay nʼa daŋ Irkoy Izʼaroo ra, nga kaŋ bajoo kaŋ a nʼa tee ya ne maaganda se, a na nga boŋ noo i ma nga wii ay sabboo se. ²¹ Ay si Irkoy anneemaa kaa, zama ndʼa gar šerretaray mma duwandi ašariyaa ra, adiši Almasihu nka buu yaada.