¹ N den laa ke ki pebiga den lodi mi maalileleedima yeni siiga yenma . ya yogunu n den gbadi ke a bonfuodinaada yeni siiga yendo , ke o tiani leni u nialu nani u tatantanu yeni ki yedi : cua na . ² n den diidi ki go laa o tanpieno . ke yua n den jagi o, kubi li dabanli . bi den puni o ki badifuoliga , ke, o ban ca ki tie paadika ki baan n paadi mo . ³ Wan go den lodi mi maaliliema ya yogunu, n den gbadi ke o bonfuodilielo yedi: Cua na . ⁴ Lani tantoa den ñani ki moani, bi den puni yua n den jagi o po libali ke wan ñani mi yanduanma ki tinga nni, bi niba n ya kodi biyaba. Bi go den teni o ki jugisiecianga. ⁵ Wan go den lodi mi maalitaama ya yogunu, n den gbadi ke o bonfuodi taalo yedi: cua na. N den diidi ki laa ke o tanboano ñani yua n den jagi o po den kubi u kpiagu bonbiigi kaala . ⁶ Lani n go den gbadi a bonfuodinaada yeni siiga u nialu ke u tua: Halikama tadiga baa nagini tuda lelee n kobi luoba. Olije tadimu taa mo baa nagini tuda lelee n kobi luoba. ama ŋan da biidi mi kpama leni duven. ⁷ Wan den lodi mi maalinadima ya yogunu. n den gbadi o bonfuodi naalo nialu ke u tua: Cua na. ⁸ N den diidi ki go laa ya taamo n tie suudi ke o ñani. Yua n den jagi o po, yeli yi mi kuuma, ke bitinkpiba diema mo ciangi o. Bi den puni baa u paalu ki tinga kaan naadi kuli siiga kanyendu, ke ban kpa likani yaaba leni ki jugisiega leni mi koncianma, leni mi kucian ludikaama, leni ki tinga fuoyanbiaditi. ⁹ Wan go den lodi mi maalimuudima ya yogunu , n den laa ban den kpa ya niba ñaani li padibinbinli tiipo , kelima Utienu maama leni yaaba n den tieni ya siedi ya po . ¹⁰ bi den kpaani leni u nialu ki tua : canba yua n gagidi ki ŋani ki tie moamoandaano , hali u laa yogunu yo ke a baa waagi ki daa jia ti buudi ki guani ki tinga yaaba ti soama panpani? ¹¹ Bi den puni bi siiga yua kuli li liadipiencianli , ke bi go den yedi baa, ke ban sedi mi fuodima nni yogonu waamu hali bi naacenlieba , bi kpiiba , ban baa kpa yaaba nani bani yeni n pundi lan bili ya coali bianu . ¹² N den diidi wan den lodi mi maaliluobima ya yogunu mi tindigibicianma den tieni, u yienu den boandi, o ŋmaalo mo den moandi nani mi soama yeni. ¹³ A ŋmabila den baa ki tinga po nani u faaciamu n figi bu kankanbu ke a kankankaana suodi maama yeni . ¹⁴ Tanpoli den fuadi nani ban yen gbabi li tili maama yeni. A juana leni a kpendiga kuli den ñani a kaani ki fuadi . ¹⁵ Ki tinga badiba, a nikpiaga, a minteela yudanba, a piada, bi paatieba, i yonbi leni yaaba n die bi yula kuli den sani ki ban wuoni ti tanlondi nni leni a jua - tancianma nni. ¹⁶ bi den miadi a juana leni a tanciama ki tua: Baa mani tipo ki wuoni ti yua n ka libalikalikaanu po leni ki pebiga pabienli. ¹⁷ kelima o pabienli dancianli pundi. ŋme n baa fidi ki ya ye?