¹ Lan yaapo li pundi tin kubi bonŋanla ya maama ke ti gbadi yeni , ke tin da yaadi ki fuagidi leni laa maama . ² Kelima , ya maama ke Malekinba den waani ya den ba mi gbienma , ke ti tuonbiadi leni yiema buolu kuli mo ya den ba li panpaani , ³ Lan wani , ti baa sani lede ki cia hali ti yaa yie ki fali laa tindimoanma ? Laa maama den kpa ñani O Diedo ñoabu nni , ke yaaba n den cengi O den tieni ti po siedi ke mi tie moamoani . ⁴ U tienu den ye leni ba ki ciani bi siedo leni sinankeene , leni libonlidi kaala , leni mi bandicianma buolu buolu leni U tienu Fuoma yua paabu nani wan bua maama . ⁵ Kelima U tienu naa teni Malekinba ka n diedi ya ŋandunli n kpendi nne , tin maadi yaali yaa maama . ⁶ O nilo den teni siedi kaanu ba ki yedi : o nisaalo tie be hali ka baa tiani o po bi , o nisaalo biga tie be hali ka baa kubi o bonŋanla nante ? ⁷ A den jiini o yogunu wamu po , ke Malekinba cie o , A go den jiini o po ti jigidi leni ti kpiagidi . ⁸ A teni ke o diedi li bonli kuli nani wan ŋma yaala . kelima U tienu n dini o ke wan diedi li bonli kuli yeni , O naa ŋa li ba kuli ke wani o nisaalo ki diedi . ama , leni moala ti daa nua ke o diedi li bonli kuli . ⁹ Ama yua ke bi den jiinio , u yogunu waamu po ke Malekinba cie o . wani Jesu moala ti la ke O gbie leni ti kpiagidi , leni ti pagidi kelima wan la mi kuuma fala maama yaapo . lani n teni , leni U tienu ŋanbili , ke O den la fala ki kpe yua kuli po . ¹⁰ U tienu wan yua n die li bonli kuli ke li bonli kuli go ye O nunni , O go den jagi ke niba boncianla n tua O bila ki taani leni O , O kpiagidi nni . lani , O den teni ke Jesu dagidi ki ŋani cain kelima wan la ya fala yaapo . wan yua n tie bi tindima yudaano . ¹¹ Kelima yua n ŋuudi ki ñandi ti tuonbiadi leni wan ŋuudi yaaba ya tuonbiadi kuli ñani baa yendo ya kani . lan yaapo O naa den jie fee ki yinba O waamu . ¹² Wan den yedi : N ba waani A yeli n waamu , n ba yiini ki pagi A yeli li nitaanli siiga . ¹³ O go den yedi : n baa ya dugi a po O go den yedi : Mini nne , Mini leni yaa bila ke U tienu teni nni . ¹⁴ Lan wani , nani a bila n tie nisaaliba ki pia ti gbanandi leni misoama yeni , O moko leni O kuuma , O den paadi yua n pia mi kuuma paalu sutaani . ¹⁵ ki den faaba yaaba ke bi yema kuli bi den ye sutaani yonbidi nni kelima mi kuuma jawaandi po . ¹⁶ Li doagidi cain ke waa den cua ki baa todi Malekinba ka , ama Abalahama puoliŋuani . ¹⁷ Lan yaapo , li bonli kuli nni O den nandi O waamu . yeni , O tua yaa kopadicianbado n gba mi ninñima ki go tiega U tienu tuonli nni , ki go padi i candanbaani padili ki ba sugili bi niba tuonbiadi kuli po . ¹⁸ Kelima wani O yaaba den la fala ban den tulini O yaa yogunu . O baa fidi moala ki todi moala yaaba ke bi tulinba .