1 Koyne Malayka na ay cabe isa hari. A ga hanan danga tondi nyaalante, a go ga bambari ga funu Irikoy nda Feeji izo karga do. 2 A go ga Bambari, ga kwaara fonda bindo daaru. Isa kambey kulu ga no tuuri fundikoono go kan ga te tuuriize dumi way cindi hinka. Handu kulul ra mo no a ga te ize yaŋ. Tuuro kobtey mo, laabo borey no Andunɲa borey safar nda. 3 Laaliyan kulu si te koyne. Irikoy nda Feejiizo karga ga bara kwaara ra, a wane goyteerey mo ga may a se. 4 A goyteerey mo ga di a mo nda mo. A mayo mo ga goro hantumante i wane taŋey ga. 5 Ciini si te koyne, i si ye ga te lampu wala wayno muraadu zama Rabbi Koy beero annura no ga kaari i boŋ. I ga may mo hala abada. 6 Malayka ne ay se : «Sanney wo tabbat, cimi mo no. Rabbi, Malaykey wane lakkey koyo, na nga Malayka donton, ga cabe a wane mayrey koyey se haya kaŋ si gay, kaŋ ga kayaŋ » 7 « Gune, a si gay kaŋ ay ga ka, albarkante no boro kaŋ annabitaray sanney wo gana kaŋ go tira ra. » 8 Ay Yohanna, ay ga ti bora kaŋ ma, kaŋ di hayey wo. Waato kaŋ ay ma, ay di hayey wo, ay sombu Malayla cawey jine, ga sujudu a se. 9 Nga mo kaŋ na ay cabe hayey wo ne ay se : «Ma si te yadin! Ay wo ni hangasin fo no goyo ra, nda Malaykey se kaŋ ga ti ni ɲayzey nda borey kaŋ cimandi ga tira sanney wo gana se. Ma sujudu Irikoy se! » 10 A ne ay se :« Ma si tira wo anabitaray sanney haw ga daabu : zama alwaato maanu. 11 Boro kaŋ sinda adilitaray ma sobay nga adilitaray jaŋa ra.» Boro kaŋ lakkalo ziibi mo ma sobay nga goy meerey ra. Boro kaŋ go adilitaray goy te mo ma sobay ga te nga adilitarey goyey. Boro kaŋ ga hanan ma sobay ga bara hananante. » 12 « Gune, ay si gay, ay go no ga ka! Ay banando go ay se kaŋ ay ga no boro kulu se nga goyo boŋ. 13 Ay ga ti alfa nda omega, jine bora nda kokor banda bora, sintina nda kokoranta. 14 Albarkante yaŋ no borey kaŋ yaŋ ga ngey bankaarey ɲuma, ngey ma du ga du fondo kaŋ ga ŋwa tuuri fundikoono ga ; ga furo mo kwaara ra meyo do haray. 15 Taray no hansey go hala nda me-kaaney, nda goy- meero-teekoyey, nda boro wiyey, nda tooru ganakey, nda boro kulu kaŋ ga taari goyey. 16 Ay, Yeesu, ay na ay Malayka donton, a ma ka ga seeda araŋ se nda hayey wo eglizo ciine ra. Ay ga ti Dawuda banda wone ize kayna, susubay andariya ɲaalanta. » 17 Biya hana nda way hiijo ne : « ma ka! » Boro kulu kaŋ go ga ma jaw, a ma ka, hala nda boro kaŋ ga laami nga ma du yaamo, hari fundikoono mo. 18 Ay ga seeda boro kulu se kaŋ ma tira wo anabitaray sanney : da boro fo na hay fo tonton a ra, Irikoy ga tonton a se masiiba harey kaŋ i cabe tira ra. 19 Da boro fo na hay fo ka tira wo anabitaray sanney ra, Irikoy ga a wane ba ka fundi tuuro ra, nda kwaara hanna kaŋ i fahamandi tiro wo ra. 20 Bora kaŋ na hayey wo tabatandi ne : «Oho, a si gay, ay go no ga ka! » Amina! Ma ka, Rabbi Yeesu! 21 Rabbi gomno ma bara araŋ kulu banda! Amin.