¹ Ay bulos, ay ya kas'ize no Almasihu Yesu se. In da timotiyos, iri nya-izo, iri go ga ni fo, nin filimon, kan iri ga baa gumo, kan ga ti iri goy hangasino mo. ² Iri go g'iri waymo afiya fo, d'iri wangu hangasino arkipas, da Almasihu marga mo kan ga margu ni kwaara. ³ Gomni nda laakal kanay ma bara aran banda kan yan ga fun iri baabo Irikoy da Rabbi Yesu Almasihu do. ⁴ Ay goono g'ay Irikoyo saabu waati kulu ni sabbay se, waati kan ay ga adduwa te ni se. ⁵ Zama ay maa baaru, ni cimbeero wane kan ni gonda Rabbi Yesu ra, da ni baakasina wane hanantey kulu se. ⁶ Ay go ga adduwa te mo zama ni cimbeero ra markasina ma du ka tonton hal ni ma faham da hay kulu kan ga boori kan iri gonda Almasihu ra. ⁷ Zama ay du farhan da bine gaabi bambata ni baakasina sabbay se, za kan hanantey biney yay ni do, ya ay nya-izo. ⁸ Woodin sabbay se no baa kan ay ga hin ka salan da bine gaabi Almasihu ra ka ni lordi nda han kan ni ga hima ka te, ⁹ kulu nda yaadin baakasinay sabbay se a ga bisa ay se ay ma ni gwaaray. Ay ga woodin te, mate ay go d'a ay bulos, kan ta dottijo, da kas'ize mo sohon Almasihu Yesu se ¹⁰ Aya go ga ni gwaaray no, ay izo onisimos se, nga kan ay hay kaso ra. ¹¹ Don a sinda nafa ni se, amma sohon a gonda nafa in da nin kulu se. ¹² Ay goono g'a sallama a ma ye ni do, nga kan ay bina go a banda. ¹³ Ay mo, ay ga ba ay m'a gaay ay do, zama ni nango ra a ma saajaw ay se kan ay go kaso ra baaru hanna sabbay se. ¹⁴ Amma ay mana ba ya hay kulu te d'ay mana ni miila han, hala ni gomno ma si bara sanda tilas wane, amma danga ni bon yaddayan wane. ¹⁵ Hambara woone sabbay se no a fay da nin alwaati kayna, zama ni ma ye ka du a hal abada, ¹⁶ manti danga bannya koyne amma boro kan bisa bannya danga nya-ize cine. Nya-ize no kan ay ga ba gumo, a ga hima mo ni ma ba r'a a borotara ra da Rabbi ra mo. ¹⁷ Yaadin gaa da ni ga fongu nd'ay danga ni hangasin, ni m'a ta danga ay bumbo cine. ¹⁸ d'a na ni zamba hay fo ra, wala nda ni g'a gana garaw, ma woodin lasaabu ay wane. ¹⁹ Ay bulos, ay goono ga woone hantum d'ay bumbo kamba: ay ga ikulu bana ni se. Ay mo si ga ci ni se kan ni bumbo fundo ga hima sanda garaw ay se. ²⁰ Oho, ay nya-izo, ma yadda ka sabbo wo te ay se Rabbi ra, k'ay bina yeenandi Almasihu ra. ²¹ Zama ay ga naanay ni gaa se no, ay goono ga woone hantum ni se, ay ga bay mo kan ni ga te han ka bisa ay gwaarayyano. ²² Koyne ni ma zumbuyan nangu soola ay se, zama ay gonda beeje kan aran adduwey sabbay se Irikoy ga fondo feeri ay se ay ma ye ka kaa aran do. ²³ Abafaros kan go kaso ra ay banda Almasihu Yesu sabbay se goono ga ni fo. ²⁴ Markos mo, da aristarkos, da dimas, da luka, ay goy hangasiney, ikulu ga ni fo. ²⁵ Rabbi Yesu Almasihu bomno ma bara aran biya banda.