¹ Ay bulos, ay ya diya no. Ay diyatara mana fun borey do. Ay mana du a mo boro fo do. Amma ay wo, Yesu Almasihu da Baaba Irikoy diya no, nga kan na Yesu tunandi ka kaa buukoy game ra. ² Nda nya-izey kulu kan go ay banda, iri ga Almasihu margey kan yan go galatiya ra fo. ³ Gomni nda laakal kanay ma bara aran banda kan yan ga fun iri Baabo Irikoy da Rabbi Yesu Almasihu do. ⁴ A na nga bon no iri zunubey sabbay se zama nga m'iri fansa sohon zamana laalo wo dabaro gaa, iri Baabo Irikoy miila bon. ⁵ Darza ma bara a se hal abada abadin! Amin. ⁶ Ay goono ga dambara nda mate kan aran waasu ka fay da nga kan n'aran ce Almasihu gomno do ka koy baaru hanno waani fo do. ⁷ Baaru hanno waani fo mo si no, kal day boro fooyan goono g'aran taabandi. I ga ba ngey ma Almasihu baaru hanna diibi-diibi. ⁸ Amma d'iri no, wala nda malayka fo kan fun beene no ga kaa ka waazu aran se baaru hanno fo kan waana wo kan iri jin ka waazu aran se, a koy ma ciya laalante. ⁹ Mate kan iri jin ka ci aran se din, yaadi no sohon ay ga ci aran se koyne: da boro ga waazu aran se baaru hanno fo kan manti wo aran jin ka ta, bora din ma ciya laalante. ¹⁰ Yaadin sohon ay goono ga borey yadda ceeci no, wala Irikoy wano? Wala ay goono ga ceeci borey ma maa ay kaani no? D'ay goono ga ceeci hala hon borey ma maa ay kaani no, don ay si ciya Almasihu se bannya. ¹¹ Zama ay g'aran fahamandi, nya-izey, da baaru hanna ciine kan ay waazu. ¹² Manti borey do no a fun. Manti boro do no ay n'a ta, i man'ay dondonandi nd'a mo, amma yesu Almasihu bangandiyano do no ay du a. ¹³ Zama aran maa ay gora baaru, waato kan ay go yahudancey diina ra, mate kan ay na Irikoy marga gurzugandi gumo k'a halaci. ¹⁴ Aran maa mate kan yahudancey diina ra ay furo jina ka bisa ay waddey baayan kulu ay dumo ra, mate kanay bis'ey mo ay kaayey alaadey anniya do. ¹⁵ Amma Irikoy n'ay fay waani za ay go ay nyano gunda ra. A n'ay ce mo nga gomno do. Waato kan a kaan a se a ma nga izo bangandi ay ra mo, ¹⁶ hal ay ma waazu dumi cindey se, sahaadin-saahadin ay mana saaware boro kulu gaa. ¹⁷ Ay mana koy urusalima mo borey kan yan n'ay jin diyataray ra do. Amma ay koy laarabey laabo ra. Waato din ga no ay ye ka kaa damaskos kwaara. ¹⁸ Jiiri hinza banda mo ay koy urusalima zama ay ma kefas bay, ay goro a do mo jirbi way cindi gu. ¹⁹ Amma diya cindey, ay mana di ey, kala yakuba, Rabbi nya-izo. ²⁰ Sohon binde, hayey din kan ay goono ga hantum aran se ciine ra, guna: Irikoy jine ay siino ga taa. ²¹ Woodin banda ay koy suriya nda silisiya laabey ra. ²² Yahudiya laabo ra margey kan yan go Almasihu ra mana bay ka di ay. ²³ Kala day i maa i go ga ne: bora kan go g'iri gurzugandi waato, cimbeeri fonda kan a halaci don, sohon a go no g'a waazu. ²⁴ I goono ga Irikoy beerandi mo ay sabbay se.