¹ A go mo, diyey da nya-izey kaŋ yaŋ go yahudiya raa maa baaro kaŋ dumi cindey mo na Irikoy sanno ta. ² Waar, to kaŋ bitros kaa urusalima, ³ borey kaŋ yaŋ ga ti danbaguyaŋ do haray wane kakaw da bitros ka ne:ni furo borey kaŋ yaŋ si danbangu do ka ŋwa i banda. ⁴ Amma bitros sintin ka sanno feeri i se za boŋo kal a me ka ne: ay go yaffa kwaara ra ka te adduwa. ⁵ Jirbi ra mo Irikoy n'ay laakal sambu hal ay di bangayyaŋ. Hay fo sanda zaara bambata cine go ga zumbu kaŋ i go g'a deene taaca gaay. A go ga kaa ka fun beene ka kaa kal ay do. ⁶ A binde kaŋ ay guna a ra, ay goono ga laakal daŋ mo, kal ay di ndunnya alman ce-taaci-koyyaŋ, da ganji hamyaŋ, da ganda fanakayyaŋ, da beene curoyaŋ. ⁷ Ay maa jinde fo kaŋ ne ay se:bitros tun ka wi ka ŋwa. amma ay ne: manti yaadin no, ya Rabbi, ⁸ zama haŋ kaŋ ga harram wala ziibikoy mana furo ay me ra baa ce fo. ⁹ Amma jinda ye ka fun beene ka tu ay se sorro hinkanta ka ne: haŋ kaŋ Irikoy hanandi,ni ma s'a harramandi. ¹⁰ Woodin te hala sorro hinza, gaa no i na kulu candi ka ye d'a beene koyne. ¹¹ Kala mo sahadin, boro hinza kaŋ yaŋ i donton, kaŋ yaŋ fun kaysaria, go ga kay windo me gaa nango kaŋ iri go. ¹² Biya hanno mo ci ay se ka ne ay ma koy i banda, ya si sikka mo. Nya-ize iddo wo mo koy ay banda. Iri furo mo bora fuwo ra. ¹³ A dede iri se mo mate kaŋ nga di malayka kaŋ go ga kay nga fuwo ra ka ne: ma donton yaffa kwaara ka siman kaŋ se i ga ne bitros ce. ¹⁴ Nga no ga ci ni se sanney kaŋ do ni ga du faaba, nin da ni almayaaley kulu. ¹⁵ Waato kaŋ ay sintin ka salaŋ i se mo, biya hanno zumbu i boŋ, sanda mate kaŋ ci ne a zumbu iri boŋ za sintina gaa. ¹⁶ Ay mo fongu nda Rabbi sanno,mate kaŋ a ne: haciika yohanna na baptisma te da hari, amma araŋ ga du biya hanno baptisma. ¹⁷ Za kaŋ Irikoy n'i no nooyaŋ kaŋ ga saba nda iri wano jaŋ a n'iri no cine, waato kaŋ iri na Yesu Almasihu cimandi, may ci ay hal ay ma gaaba nda Irikoy? ¹⁸ waato kaŋ i maa woodin, jama dangay ka Irikoy beerandi. I ne: yaadin gaa dumi cindey mo se Irikoy na tuubiyaŋ no zama i ma du fundi. ¹⁹ Borey kaŋ yaŋ say-say gurzuga sabbay se kaŋ yaŋ tun Istifanos sabbay se din koy hala finiciya, da kubros da antiyos. I siino ga sanno ci boro kulu se kala yahudancey hinne se. ²⁰ Amma iri ra boro fooyaŋ, kubros da kayrawa boroyaŋ no, waato kaŋ i to antiyos, i sintin ka salaŋ gareku borey se ka Rabbi yesu baaro waazu i se. ²¹ Rabbi kamba mo go i banda. borey marga bambata no cimandi ka bare Rabbi do. ²² I baaro koy ka kaŋ Almasihu marga borey hangey ra kaŋ go urusalima ngey mo na barnaba donton a ma koy kala antiyos. ²³ Nga mo, waato kaŋ a kaa noodin, a di mo Irikoy gomno, kal a farha. A n'i kulu yaamar ka ne i ma lamba Rabbi gaa da anniya. ²⁴ Zama barnaba wo boro hanno no, a to da biya hanno da cimbeeri. Jama boobo tonton Rabbi gaa. ²⁵ A fun noodin ka koy tarsus kwaara ka sawulu ceeci. ²⁶ Waato kaŋ barnaba di a, a kand'a antiyos. I goono care banda Almasihu marga ra kala jiiri fo ka boro boobo dondonandi. Antiyos ra no i sintin ka ne talibey se Almasihuyaŋ. ²⁷ Jirbey din ra mo annabi fooyaŋ fun urusalima ka zulli ka koy antiyos. ²⁸ I ra afo kaŋ se i ga ne agabos tun ka kay ka cabe biya hanno do kaŋ haray bambata ga ba ka te laabey kulu ra. Woodin binde mana te kala kuludiyos zamana ra. ²⁹ Taalibey mo, boro kulu nga hino boŋ, na sarti sambu ka ne ngey ga gaakasinay samba nya-izey se kaŋ yaŋ goono ga goro yahudiya. ³⁰ I n'a te mo. I na gaakasina samba arkusey do sawulu nda barnaba kambe ra.