¹ D'ay ga du, araŋ ma suuru ay se hal ay ma saamotaray kayna te oho, araŋ goono ga suuru ay se mo. ² Ay go ga csnse araŋ gaa da Irikoy cansa dumo. Zama ay n'araŋ suuban kurnye folloŋ se kaŋ gati Almasihu, ay ma konda araŋ a do danga wandiyo hanno. ³ Amma ay ga humburu hal a ma si ciya, mate kaŋ cine gondo na Hawa halli nda nga carma, yaadin cine no araŋ laakaley ma bare ka fun cimo da hananyan ga kaŋ araŋ gonda Almasihu ra. ⁴ Zama nda boro fo kaa kaŋ ŋo ga Yesu waani fo waazu te, kaŋ manti iri wano, wala nd'araŋ go ga biya wani fo ta, kaŋ araŋ man'a ta doŋ, wala baaru hanno waani fo kaŋ araŋ mana yadda nd'a doŋ, ikulu araŋ go mo ga suuru nd'ey hal a ma boori! ⁵ Amma ay go ga lasaabu ay mana gaze baa kayna «diyey kaŋ ga bisa ikulu» din gaa. ⁶ Zama baa d'ay si waani sanni, kulu nda yaadin ay mana jaŋ bayray. Iri na woodin cabe araŋ se fondo kulu ra nda hay kulu ra. ⁷ Wala ay na taali araŋ se no kaŋ ay n'ay boŋ kaynandi hal ay m'araŋ beerandi, zama ay na Irikoy baaru hanna waazu araŋ se nooyante? ⁸ Ay na Almasihu marga fooyaŋ kom, ka banandi ta i gaa ka du k'araŋ saajaw. ⁹ Waato kaŋ ay go araŋ do, kaŋ ay go jaŋay ra mo ay mana jaraw dake boro kulu boŋ. Waato kaŋ nya-izey kaa ka fun masidoniya, nga no ka jaŋay kulu kaa ay gaa. Hay kulu ra ay haggoy d'ay boŋ zama ay ma si tiŋay dake araŋ boŋ. Yaadin mo no ay soobay ka te. ¹⁰ Ay ga woone ci da Almasihu cimo kaŋ go ay ra: Akaya ra boro kulu si ay ganji ay ma fooma nda woodin. ¹¹ Ifo se? Zama ay si ba araŋ no? To! Irikoy ga bay! ¹² Amma haya kaŋ ay te, nga no ay ga soobay ka te, hal ay ma kobay kulu kaa borey kaŋ yaŋ goono ga daama cceci ngey ma ngey boŋ sifa ka ne ngey go ga goy sanda iri cine. ¹³ Zama borey din dumi ya diya tangarkomyaŋ no, goy-teeriyaŋ no kaŋ ga zamba te, ka ngey boŋ ciya Almasihu diyayaŋ. ¹⁴ Woodin binde,manti dambari hari no, zama saytan bumbo ga nga boŋ ciya annura malayka cine. ¹⁵ Yaadin gaa manti hay fo no d'a goy-teerey mo ga ngey boŋ ciya adilitaray waazukoyaŋ. I alwaati bananta ra i ga du ngey goyey banando. ¹⁶ Ay ga ne koyne:boro kulu ma si miila hal ay ya saamo no, amma d'araŋ ga miila ay wo yaadin no, ¹⁷ kulu way ta danga saamo, hal ay mo ma fooma kayna. ¹⁸ Za kaŋ boro boobo no ga fooma nda ndunnya lasaabey, ay mo ga fooma nda woodin yaŋ. ¹⁹ Zama araŋ kaŋ ga ti laakalkooney, araŋ go ga suuru nda borey kaŋ si karam da bine folloŋ. ²⁰ Da boro fo konda araŋ tamtaray ra, da boro fo g'araŋ ŋwa, da boro fo g'araŋ di, da boro fo ga nga boŋ beerandi, da boro fo g'araŋ moyduma saŋ_ kulu nda yaadin araŋ ga suuru nda bora! Haawi g'ay di ay ma ci kaŋ iri wo cabe danga iri ya londibuunoyaŋ no. ²¹ Amma nda boro fo ga yadda ka fooma nda hay fo(ay go ga salaŋ sanda saamo cine) ay mo ga fooma nd'a. ²² Ngey wo Ibranianceyaŋ no? To! ay mo yaadin no. Ngey wo Israyla boroyaŋ no? ay mo yaadin no. ²³ Ngey wo Ibrahim bandayaŋ no? Ay mo yaadin no. Ngey wo Almasihu goy-teeriyaŋ no? (ay go ga salaŋ sanda saamo cine), sanku fa binde ay! Taabi goy boobo ra ay ga bis'ey, da sorro boobo kasu ra koyyaŋ, da karyaŋ boobo ra, da sorro boobo bu-jase gaa tooyaŋ ra mo. ²⁴ Sorro gu yahudancey n'ay barzu hala barzu me waytaaci afo si. Sorro hinza i n'ay kar da goobu. ²⁵ Sorro fo i n'ay catu nda tondiyaŋ. Sorro hinza hi mun d'ay. Cine fo da zaari fo ay go teeku boŋ ga dandi. ²⁶ Ay go diraw ra sorro marge, ay go isa saaru ra, da zayey saaru, d'ay dumi saaru, da dumi cindey saaru, da kwaara ra saaru, da saajo ra saaru, da teeku saaru, da nya-ize tangarikoomey saaru ra. ²⁷ Ay go goy da taabi ra, da hanna ka mo ganji jirbi yaŋ sorro boobo, da haray,da haray, da mehawyaŋ sorro boobo, da hargu nda bannkaray banji. ²⁸ Kaŋ waani woodin yaŋ, hay fo go no g'ay kankam zaari kulu: Almasihu margey kulu sakulla no. ²⁹ May no ka jaŋ gaabi kaŋ ay mo mana jaŋ? May no i ga daŋ a ma taali te, kaŋ ay bina mana sara? ³⁰ D'a tilas ay ma fooma kala ay ma fooma nda hayey kaŋ ga ti ay gaabi jaŋa waney. ³¹ Rabbi Yesu Irikoyo, kaŋ ga ti a Baabo mo, nga kaŋ ga ti hal abada albarkakoyo, a ga bay ay siiga taari! ³² Damaskos dabarikoono kaŋ ga ti bonkooni aretas koy fo, a na damaskos kwaara batu hal nga m'ay di. ³³ Kala birno finatar fo ra no i n'ay zumandi cilla ra, hal ay du ka yana a kambe ra.