² Iri goono ga Irikoy saabu waati kulu aran kulu sabbay se, waati kan iri ga fongu aran adduwa ra. ³ Iri goono ga fongu waati kulu nd'aran goyo cimbeeri ra, d'aran saajaw goyo baakasinay ra, d'aran beeja ra suuro mo kan go iri Rabbo Yesu Almasihu ra, iri baabo Irikoy jine. ⁴ Nya-izey, aran kan Irikoy ga ba, iri ga bay kan a n'aran suuban no. ⁵ Zama iri baaru hanna, manti sanni hinne no a kaa d'a aran do bo, amma hala nda dabari, da biya hanno mo. A kaa tabbati mo gumo. Zama aran ga bay goray kan dumi iri te aran game ra aran sabbay se. ⁶ Aran ciya iri dondonankoyan da Rabbi wane yan mo, za kan aran na sanno ta taabi boobo ra, da biya hanna farhan ra mo. ⁷ Hal aran ciya di-ka-dondoniyan borey kulu se kan go ga cimandi masidoniya laabo ra, da akaya laabo ra mo. ⁸ Zama aran do no Rabbi sanno sintin ka yooje, hal a koy masidoniya nda akaya ra. Day manti masidoniya nda akaya ra hinne no bo, amma aran Irikoy cimandiyano baaro koy nan kulu, hal iri si hay kulu ci koyne. ⁹ Zama ngey bumbey go ga dede iri bon da furoyan kan dumi iri te aran do. I go ga dede mo mate kan cine aran na toorey nan ka bare Irikoy do,zama aran ma may Irikoy cimi-cimo, fundikoono se, k'a Izo kan ga fun beena ra hangan mo. ¹⁰ Izo din ga ti Yesu kan Irikoy na tunandi ka kaa buukoy game ra. Nga no ga iri faaba bine futay alwaato kan ga kaa gaa.