Pala 12

1 Tun wo mun ɗighi kha khiɗam khauwan lenya woh wannan ya saidi paro, sai mun waiyi woh we yiwemun tiɗa khama ɗigsik woh ta yi daga yimun gɓuɗe. khire ma ti hankuri yi we ta ɗomun. 2 khira mamun liɗomun ti pini Yamba, wonisi pari liɓongmun. wo lunkhu menan woh lo ta ɗoni har meno sad buro, ɓiran khire a dami kha kyoti ti sinim, woh khire ɗiyo ti khira khewe ni Yamba. 3 Ma nigani woh khire a dami kha weh woh mikhe you ti pi an digsik, lunkhu ɓoma ɓarom kho ma yi kyom. 4 Ma khuɗi digsik wota wate ma kha pati toom kha sadmanim, ma ɓirang wasou paro we tebpema ti khu ma siɓɓa. 5 "Lano, makha saɗi tulloni Yamba kha ɗoklem ɓirang kha kyo ti piɗi khebi tullanim," 6 Lunkhu Yamba tullighi lenya wo khire menghi ɓiran khire yighi hukunci ti miya woh khepni. 7 Ma kyommi bone ti masayin poro Yamba ta yiwani khikyei lunkhu ma siɓani lunkhu ɗima nag woh dani ari tullenim? 8 Boma wom kha tullum khiji woh manni lenya kham khatei ma ɗiwoh pule mina ma siɓɓa yamim. 9 khikyei khighi wo mu ɗighi kha ma damun ti khu pebe wo mikhe tulleje mun, mun ɓirang munje zun gbuɗe. To ai saimun ti damun woh munghemun limlim likhu munweh mina duktei?. 10 Ti khokho tag we ma damun tulle jemuni tiya lokaci yokhol woh mikhe wai yiwezun walla. Amma Yamba tullije mun lunkhu mun peni weh, lunkhu mun weh manni weh ti pini. 11 Anghije tullo woh tomon in ma ɗighi ta yimam, saidai khu khire piɗa. Amma ya yapi ta ɓagrego ti khokkho weh walla khu ɗina Yamba woh ɗokhezun. 12 Lunkhu khikyei ma khebi khira ma ɓang woh ɗighi ta khegheghon kha burummni woh ta ɓobani. 13 Ma wori ti khokko woh mikyani lunkhu we woh yo kuɗo makaha telom saidai ma warkyo. 14 Ma ɓani tomon kha somma, khama ɗi khub woh in ma a kha tem, anghe an weh Yambam. 15 Mayi walla lunkhu ma manni ma kha wam, ma khuggu ni Yamba, ɓiran ma wen ɗen kha peti tiya mam woh ta watema kha fitinam, lunkhu ma lenya dago me ka pim. 16 Ma yi hankali makha we an jiro kho miya woh a meghi ɗimma ti ya mam khiji Isuwa woh lunkhu wukina kha pilun kha gɓude ni. 17 Mapeno lokaci woh khire loya ɓong ni siri weh likhira ti khuni kya, lunkhu khire a we khokko muni kyaɓoni. Ko da cike khire genghou kha muɗɗi. 18 Lunkhu ma potu piɗi panni woh ta na bi khiram, panni weh khebghi kha wuzi, woh pergi kha yelon dig. 19 Ma watu piɗi woh mara khiri ele zogro woh ta muni kyo kha woh ta pengri hankaligo, woh an khiran me khe kha ɗimmani ta masun da khari khiranim. 20 lunkhu mikhe a wawi khiri we woh tebpo ta makha yum, khoma wosuɗa woh nabpo panni ɗan gɓallire zun. 21 woh kyo pa khabong, woh Musa teppou. "Ni ɗigi kyo khabon harsino ta ɓobani". 22 Ti khu khikyei ma wanna ti khu panni sihiyana kha mina ni Yamba an Rai. Kha ma Urushalima khini samniya, kha dubundubun an kheri khuni Yamba ta tyi kyug yo ɓog. 23 Ma wanna piɗi khaukyu khire siɓɓa nebe, ɓallani ti gag, ɓirang ma wanna pini Yamba winisi an pon pehp, khikyei ɓirang woh wori limlim gɓag woh kpaɗipiɗi lon khura. 24 Ma wanna pini Yeso wonisi miyan yokhol an yi alkawari ti khu toom woh ta yi paro wo khobou ni Habila. 25 Ma ɓano ma khuɗi miya woh ta yima paro khem immamikhe atula ti lokaci woh mikhe a khuɗi miya woh ta pegrezun ti khu pebe, ɗan munda riya tulina ti po miya woh ta yi mun paro gag. 26 ti piɗi manni elenkhu yenguɗo khupebe. Bomini khire resou ta ba- "Har bomi a kheɗen khu pebe wo ta yenghiɗinam" amma harkha gag. 27 Paro kyei " Har bomi" tepo paɗan woh wukyei woh ta yenghiɗina, wato ni weh woh kwino, lunkhu we woh ari yenghiɗina sun parinam. 28 Lunkhu khikyei we mina duktei woh ari yenghiɗinam mu ɗina goɗani, ɓiran ti ya piɗi kyei mu ɗiya an ɗimmi Yamba ti weh gbag khama peni mun gbɗe. 29 Lunkhu Yamba mun wuzi an lalan.