Udaraŋa u 28

1 Nan atitinyǝ a wame ucu sana ara, uwa tinyǝ dinka anyimi tumuru sunare,Mary Magdalene, nan oi Mary mi ŋawa rai da ŋa nǝri isau me. 2 Enze awa we uyo zokomon inyaŋa, Malika uwa Aco wa tunu ǝsurǝ adaishari, rai ma kutǝri ri zuwa reme, ma cikǝ aza me. 3 Uziyo me uga u malmara, tomma teme pau-pau uga atantane. 4 Ani rinyaŋana reme wa kerkene ŋa we uga enkeze. 5 Nze Umalika me ma bukǝnu nan awai me mago,"tago ŋi kone iwi ni, bakase inru ŋira ginarǝ Yeso ze, onogemse ati garre me. 6 Madawa rigiya ne, mana yira, kando gemse mawa buki. Ra ni i ni aragemse Aco tira luta. 7 Wanni sassa i ka buku a tuma hame, 'mana yira anyimi nkeze. Nǝrǝ ni, mageme i ŋiaji a wama Galilea, ageme ze ŋi ra niyome. Nǝri ni, na bukiŋi." 8 Nze awai me yere sassa ŋa deke isau me nan iwi aguran izalla, ŋa some da ŋa ka buku a tuma hame. 9 Nŋawa kazo yo, enze Yeso mura ŋe, mago,'kukpan ni!' enze ŋa rai voto ŋa gurwǝnǝ a tauwa hame. 10 Yeso gonŋe, "tago i kuna iwi ni. waŋ ka buki ni anowanoma haŋi a ŋa waŋa Galilea. Ageme ze ŋa nin nǝrun." 11 Uca ogome se awaiy me tira wame, nze awe anyimi ano ri-nyaŋana ŋa wa wame ŋa ka buku a ti-Priest ti-sǝssǝru zale emegemese ina faro. 12 Se ti-Priest nan tenoŋono ŋawa gurna ŋa bǝnu nan ŋe aza emegemese ŋana woze, nze ŋa nya te soja teme iri cebete. 13 ŋagonŋe, "ka buku ni a daŋara se 'Atuma Yeso ti-rai nan atitiyǝ ŋa tiyǝ ekeze me woro anrö.' 14 Nga nlen magiya ma ka deŋe ă gumina, woro nin runimi birwa a zuzi ŋi iwi ihiŋi." 15 Enze ti suja teme ti kai iru me ŋa ka wuza emegemse ana buku a ŋe. Nlen magiya mawa sarmo zale anyimi ti Jews konzen mä wushu aji a rawa kane. 16 Enze Atuma me ame bere yere ŋa wame ǝ Galilea, owö ogomese Yeso wa buki a ŋe. 17 Se ŋawa nǝri mi, zale ohoŋe gurwǝnǝmi, awe ahaŋe wa damo suŋ. 18 Yeso wa rawa ŋe, ma bǝnun ŋe mago, "ana nyan agata zale ă adaishari nan a nyaŋa. 19 Baka nane wǝnni anyimi massano e we atuma. Izoro ŋe anyimi riji ri Dada nan Vana nan Uvunu u sansan. 20 Bezezze ŋe a ŋa tarse zale emegemse na buki ŋi. Ni ni, nzin ŋi kuyyu ca, a ka u maso massano."