¹ Ayeno, Ngase ana murai nan mai macara, ŋŋi ano ageme se ŋi ze nan uvunu i kursi mi uruna uvunu nan shauwo. Ku əvi a ma pəpəi nan rete a reme tago owe rizi ni. ² Zəkə ni utira u əpuŋ əhəŋi, nan nane ze inin binja makiri ma Ukase. ³ Ono ogeme se ma gose emme iyabo ze bata mme dan iyabo ze ne, ma ra gəllə rete a reme renze. ⁴ Kuyya ono a ma minza ituma e heme kima, bata ma nin mura emegeme se ma nin tuŋara rete a reme dan a e owe Konzen he. ⁵ Baka ku əvi ra zəkə utira o home . ⁶ Ono ogeme se ana bezezze me nlen ma me a ma ware zale tegoro ti wuma nan ono ogeme se ma bezezze ŋe. ⁷ Tago a təkəli ŋi. Ədəshəri a ta gəlli mi ni, baka eme geme se ono na bira, enze konzen mara koke me. ⁸ Baka ono ogeme se mana bira isana nan u Luna malo ma macara ma me, ənyimi macara macara ma me mara koke uwənə. Ono ogeme se ma bira isana u uvunu, ənyimi uvunu mara mura ruma ri sun ənyimi uvunu. ⁹ Tago iganno a wuza i wuma ne, uca ra ra ogeme se woro ra woro tekoke a tedo, ngase ita sope uruna me ne. ¹⁰ Nane konzen, nane se woro ze nan uwəri, a deme nan ano kima zale, uga dondon ano ageme se ŋaze ano a kura ara u yiya birwa. ¹¹ Nərə isana unanai ere egeme se Mi na darsa ŋi mi nan u ware o hoŋ. ¹² Ano ageme se ŋa ra nara u wuza iyabo i wuma baka ripun ŋa ra nara ŋa ta waŋare da a tuzi ŋi. Ŋa ra wuza nane tago a nyaŋe kpai epe u titi u gapa Ukase. ¹³ Dan baka ano ageme se ŋa tusi ate ahaŋe da ŋa tarse makiri ni, Bakase ŋa ra barsa a tuzi ŋi da ŋa biiji aza epe ri pun. ¹⁴ Nan nane tago Min biiji ni se ǝnyimi u titi u gapa Aco o hodo, Yeso unu kasa, isana e geme enze a gapon masano, konzen Mmi nane a ano masano. ¹⁵ Ne nan utuzu ne dan nan utuzu ni, eme geme se ara barsa me enze uruza u sau. ¹⁶ Kweren a wame ano ageme se ŋa ra cikǝ aza dondon epe igiya, ishammo nan ogwene u cikǝ nan ŋe, taken Israel ano Ədǝshǝri. ¹⁷ Əsuru a wagiya əkə əji tago owe naron nan betoi ne, Mina zəkə ripun ŋa ron ti lǝmu te Yeso tenze. ¹⁸ Deke ogwene u Aco o hodo Yeso Ukase ma tarsen uvunu o hodo, ayeno. Amen.