Pala 13

1 Yeso millan polle penna kha ɗeni ti po neghe. 2 Lenya gɓo gɓor kha khommi jeleni khere kha riya gon kha ɗeni, pehp lenya kherani ti po khommo. 3 Yeso kha tepzun we gɓo ti ya mannirani ta, "Manni an phezang khopo ya pe zang. 4 Khere yo pezang piɗɗi khidam kha sugani ti khu khokho polo kha wattu kha kyi ɓani. 5 Piɗɗikidam kha sugani ti khu panni kummon kha pittu, ellenkhui yiel a tiɗam. 6 Wo pikki ɗenno kha eisani elenkhu zorinzun a kheɓ yiel. 7 Piɗɗi kiɗam kha sugani ta a rat, arat kha pekhezun. 8 Piɗɗi kiɗam ti khu yiel ɓang mikhe kha mun are gɓu piɗɗi nya ɓunum. 9 An khumo kiran, ma kirou. 10 Siɓɓa an poroni kha wattu kha teɓani ti Yeso, "Ellenkhuni wo khi ɗita yi paro ti lenya kha mammirani? 11 Yeso kha ɗebani "Ta mun ngheng ma penan ti gak, khizun a munzunim. 12 Miya wo ɗi kha tai ta wakkeni khui ta we gɓu. Khigimiya wo wom kha tai ta kheɓi wo khere ɗi kha tai pehp. 13 Ni yo paro kha mammirani elenkhu mikhe ninghong a ninghong, mikhe kirou a kirou elengkhumikhe a penom. 14 An ɗoɓ paro Ishaya ta mikhe yari kuma elenkhu a penom, kheni nighong mikhe ninghong mikhe ari penim. 15 Ellenkhu yamina mikhe an thuɓ, mikhe ɓaro po yari kumo ɓiran mikhe assou arozun elenkhu ma mikhe kha ninghong kha arozun mikhe a mengi wani kha arozun, kama peni ti ya rossozun elenkhu penguru ni yippi piɗazun 16 Arozun an likhira ti khui ellenkhu mikhe waw kikhei kumozun elenkhu mikhe kirou. 17 Na teɓma an kpagha kha lenya gɓo khankyun rosso mengi we wo ma waw, mikhe a wam. 18 Ma yari kumo kha an pezeng. 19 Ma manni kirou paro ɗukte a penom ɗa an ɗen rosso wattu poli wo kirou ti ya ɓongni, khei mina kiɗam wo penzau ti khu kokko. 20 Wo penzau ti khu panni, wo kiro paro kha kheɓani kha tomon ya ɓong. 21 peɓ kha khi khei, a yi ɓang ti yam a kyumom, bone kha ɓelela,illina elenkhu paro, khere kha sugani. 22 Wo penzau ti ya aratt mina wo wo kirou paro, khalan we khu pebe kha wo khira kha pekke parou a mun siɓɓa. 23 Wo penzau ti khu yiel gɓang, mina wo kirou paro, kha penani. Mina wo mun ghong kiɗam kha ɓung,piɗɗi kik, kik piɗɗi nya poro monni, nya poro monni, piɗɗi nya gɓunum gɓunum 24 Yeso mun nye zun manni lim-lim. Paro, ta ma "Ta mam ɗukte gak, kha manni miya wo penzo kiɗam ɓang ti khuri. 25 Milan wo lenya singhong ɗosson, an ɓana kha wattu kha penzi sozo ti ya angaɓpa kha khobe ni. 26 Wo mikhe morou kha arkiɗam, sozo kha pittu kha sizun 27 Khebeni an khuri kha wattu kha teɓni anmina. "Ani kiɗam ɓang wo khi penzo ti khuri? Yo kha yagham kha we sozo? 28 Khere kha tebzun, "An bana wo yo wikhei, "Kebeni kha teɓani, "Ta mon woro mun ukkuro?' 29 An khuri ta, ma wosso. Mino ti piɗi ukrani magha ukrani kama angaɓpa. 30 Ma wosso mekhe ɓuɗu wo wor milan kparani, milan kparani na teɓ ti an kparani. "Ma ukkri sozo ɓakha yau ma khero ɓarma ɓarma ma lalezun. "Khni angaɓpa ma woron ya munno."' 31 Yeso kha wakki khu paro kha sun ti ya mammirani, ta ma, Ta mam khu pebe khei kha arkyari, wo miya penzau ti ya tureni. 32 Kiɗam khei khopo piɗɗi kha yokkol ti ya pehp khiɗam, ma gɓudo ɗa khoɗi piɗɗi alaɓur ti ya ture,ɗa ɗina ɓoro ɗa polo wo ti gak ti noɓɓon ti khui 33 Yeso kha wakki khu paro kha mammarani, "Ta ɗukte ta mamro kha melɓo wo pomin ɗan saɗi ɗan ɓurin rummo illa ɓunum ɗa pullu." 34 pehp wikke Yeso teppo ti khawan lenya kha mammirani, angige wo khere teɓ a ti ya mammirani. 35 Diwo khi elenkhu paroni anɗoɓpara ɗiwo kulli, wo ta ma, "Na hap ya pono kha mammirani, na teɓ wo tuk kani kheɓani ti yuwn khu pebe." 36 Yeso kha wossi khawan lenya kha riya mina. Siɓɓa an poroni kha wattu bini mikhi teɓa ta, "khe khi tebmun arparo mammirani ti khu sozo wo ti khuri" 37 Yeso menezu ta, "Sie wo penzo kidam khei wo walla ni La lenya. 38 Khuri khu pebe; kiɗam wo ɓang ni siɓɓa ɗukte. Sozo ni siɓɓa miya an wozi rosso. 39 Anɓana wo penzau ni mun gɓuɗe limmi, kparani kpaɗan khu pebe, an kparani ni siɓɓa an surani Yamba 40 Khi zi wo khauwo sozo kha La lani khawuzi, khi khei ti yi yi kpaɗan khu pebe. 41 La lenya ta sur La; an suran Yamɓa biran mikhe ta kauri khui we peb wo sogi ɗin ti piɗi dukteni, ɓiran kha lenya wo mikhei yo poron din. 42 Mikhei ta wirezun ti ya wuzi wo ti ta kyuwani, piɗi wo mikhei ta yi khui kha aɗifuzun. 43 Ti piɗi khirei anɗ kyun rosso ta yi maigho kha pe khizi pikki ti ɗukte ni dazun. 44 Dukte gak ɗigi khizi wo khira wo tukhani ti khuri, miya wau kalang kha tukhani. 45 Kikhei ta mammiri dukte gak kha manni miya an kurɓe an ɓan lu'ulu'ai wo ɗigi kha ɓhuɗe gɓo. 46 Khere wa lu'u lu'u monni we ɓong khaɓun khere kha wora pilun kha wo khirani pehp kha pil khuri. 47 Kikhei ta mamari dukte gak kya kirip wo wiron ti ya neghe, kha kauru wo wo khuina. 48 Wo, yo'u kalang an kheppi khirip wo kyolla ti po neghe,mikhe kha ɗiya kha kikhi piɗi ɓang ti ya gwukzun pinin ɗure mikhei kha pattani. 49 Kikhei wo ta ɗina ti kpaɗan khu pebe khei. Siɓɓa an suran ni Yamɓa mikhe ta wattu kyakkhi an ɗin rosso ti ya ankyun rosso. 50 Mikhe ta wirezun ta wuzi an kyuwani ti nennei piɗi ti yi khui kha aɗɗi woɗoh. 51 Ma peno wikke pehp? siɓɓa an poroni kha menani ta, "eih". 52 Yeso kha teɓzun ta, ellenkhu khi khei an palla alagara khon wo ɗi siɓɓa ɗukte gak ɗi khi zi anmina wo ponna we poye kha manyan we ti ya gukukni." 53 Ti piɗɗi khei wo Yeso kpaɗou mammarani khere kha khoɓani kha wossi piɗi. 54 Yeso kha ri piɗizun kha kyan khu zun ti yamina piɗi ɗimma zun, ellenkhu kikhei mikhe kha yi we yuwah tin tebi, ta, "Ti tong wo miya khei wau pennan kha whe yuwah.? 55 Miya khei a lani an yemmi we khem? ɓiran sommoni nani a Maryamu? ɓiran ma molli a ma Yakubu kha Yusufu kha Saminu kha Yahuza? 56 Ma moloni siɓɓa serep munɗigi ti pimon ti ni khei? "Ti tong miya khei wa penan we khei pehp?" 57 Mikhei kha kpan ya ɓun zun ellenkhu ni, ma khi khei Yeso kha teɓani ta, "Anɗoɓparo a wegi gɓuɗe ti pizun kha ma talla an molli. 58 Ɓiran khere a yi we yuwah kha ɓun ellenkhu mikhe a menom.