Pala 5

1 Milan khirei, lenya khauna ti pini Yeso ta khiri paroni Yamba, khero khergi ti poh nɗu Janisasarata. 2 Khero waw gwong pellow tessani ti poh nɗuyi an khep kirippehp penna ta kyobi si kya kiripzun. 3 Khero kha riya mbolle gwongyi, khirei yi wini Siman, kha ɗimmeni ta mo khero ghiza ya amyi yokol ti poh nɗuyi. Khero kha ɗiina ta mam paroni Yamba ti ya gwongyi. 4 Wo kherwon kha paroyi, kha pepsi Siman ta "Ghiza kha gwongyi ti kude piɗi wo gyori panan khe patti kyagho lunkhu khep kirip." 5 Siman kha menani ta, "Anmina, mun yow poro per per munda khep manni wehm, lunkhu khi yow paro, ɗang ni patti kyaayi." 6 Khumun wo mikhei pattow kyaazuni, mikhei kha khep kirip a yokkolim, kyaayi kha kepsi kyarani. 7 Mikhei kha ɗimmi khere an porozun ma mikhei wattu khai pohzun kha gwongzun. Mikhei kha wattu khem ya gwongzun pehp pellowyi, gwongzun ɗiran kha khepsi ɓillani. 8 Kalan Siman Bitrus wo gappow kikhei, kha gussurani ti ɗohni Yeso, ta, "khi kha mari kha nem anmina, lunkhu ni an ɗing." 9 Lunkhu yuwah kheppeni, pehp kha lenya wo ɗi po saap kha si, lunkhu gɓogbo kirip khei wo mikhei kheppow. 10 Ma Yakubu khama Yowanna siɓɓani Zabadini khere an poroni wo wannan sawezun. Yeso kha tepti Siman, "Khi kha yi kyom, lunkhu illuwon ti mbomi, khiri kyepru lenya." 11 Kha peranzun kha gwongyi poh nɗuyi, mikhei kha wassi weh pehp kha ɗappini. 12 Khero pukkan ɗitiya manni binneyi, manni an ɓukka kham ti piɗi. Wo khero gappow Yeso, khreo kha ɓerani ti khu ɗohni kha ɗimmi Yeso, ta, "Anmina, ma khe menow, khiri puɗɗeno." 13 Kalang Yeso kho sop khirani kha naɓni ta "ni menow, mo sigho yanu." khumun ɓukkayi kha perani. 14 Khero kha kyol khumoni mo khero kha tep ti mannim, ɓiran kha tepni, " Woregho, khi kyup ɗohgo ti an kpaagha panan khe mun wo ɗahripok lunkhu ɓangsighoyi, khigi wo ɓallow ti ya ɓallan arhparon ɓang ni Musa, mo ɗiiyiwezun wo kini pok." 15 Ɓiran piisiini khekirow yapiɗi kpai, lenya gɓo khauna kha ɗappini ya khireni, ɗany weh ɓangsig. 16 Khero yiɗang tukkhigi siini panan khero ɗimmi Yamba ti piɗi. 17 Porow milan manni, kheri ɗita mamwe, kham mir Farisa khama an ɓalla paani wo ɗiyighi khama lenya wo wakkhina ti khoran mina wo khommow Galili kha Yahudiya khama binne Urshalima, ɓangni anmina ɗii ti khuni lunkhu yipisi lenya. 18 Milan kherei, manni lenya saɗna manni miya an senghansig ti khu wopohson, mikhe kha ɓan kokko wo mikhei ta ruwan kha si ya yaminnayi ɗan luweni ti ya ɗoh Yeso. 19 Mikhei a web kokko ruwanim lunkhu lenya khemmow piɗi kha ɓung, mikhei kha turkhu khumeyi, panan kha kyar kha si ti khuɗaakomi ti talla lenya lokkozok khaya ɗoh Yeso. 20 Wo khero waw kiɗam luwan ya ɓongzun kirei, Yeso kha tep ta, "Anmina, khaɓɓegho ɗing sigho." 21 An ɓalliweh kha Farisawa kha riya ɗam ya rossozun ti khu paroni kheyi ta, "a ning ta yi khinaya? A nong ti wawu yi khaɓɓo ɗing ma a kheɗeng Yamba ya?" 22 Ɓiran wo Yeso pennow paro ya rossozun, khero kha tepzun ta, "A wo wuni youyi wo mara ɗam khu parokhei yi ti ya rossomayi ya? 23 Khirei wo a yi piɗa mo tepo ya, kyaɓɓegho? 24 Ɓiran lunkhu ma peni ta lahni miya kham kha ɓang mun kyaɓɓo ɗingsig ti ku pehbe, ni teppegho, "illo, sad wuposongho, khi woregho minagho." 25 Khumun khero kha illani ti khu ɗohzun kha sad liɓokhni, kha maweni minani, khero ta pawu Yamba. 26 Lenya pehp yuah kha khepzun, ɓiran mikhei row ya pawu Yamba. Kyol kha khepzun, mikhei ta teppani ta, "Bomi mun waw wo yuwah." 27 Kha yapi wukkheiyi wo yowyi, Yeso perow kha weh an khep kutbe khuyel sommoni Lawi khero ɗiyighi tiya khuɗak piɗi poroni. khero kha tepni, "Dappino." 28 Lawi khumun kha illani kha ɗappini, wassina saɗɗi poroni pehp ti ya pi. 29 Panan Lawi kha yeru lenya mo wattu yi ɗughe tomon rosso tiya minani wo pammi Yeso. Kham an khep kurbe khuyel khama piɗɗi lenyayi wo wakkina ɗiyiwow ta khi wokina kha sowani kha suun. 30 Panan ma Farisawa kha an ɓallum wehzun weh illow ya khisiriya paro ti ma an ya ɗohni, ta, "pani wuni wo ma ɗita khi wokina khama an khep kurbe khuyel kha piɗɗi an ɗing ɗima ya?" 31 Yeso kha mawwon nizun kha paroyi ta, "Pehp lenya wo ɓang a marighi kha an yi pi sigyim; kheɗeng an ɗugha. 32 Na wattu lunkhu ni mun kyaɓɓo ti lenya wo wom kha ɗingyim, kheɗeng paani ni mun kyaɓɓo ti pehp an ɗing." 33 Mikhei kha tepni ta, "Ma an ya ɗohni Yowanna yi ɗang yighi yessan pok kha ɗimma, ɓirang ma an yaɗohni Farisawa yighi ɓang khikhei yi. Panan ma an ya ɗogho khigi ɗang seh." 34 Yeso kha tepzun ta, "kham miya woti sop an poro ti ya mina weri ta ma mikhei yi yessan pok ma pukkan weriyi kham ti pizun ya? 35 Pikki ta wattu wo ti sad weriyi ti pizun, panan milan khirei yi mikhei ti yi yessan pok." 36 Panan Yeso kha tepzun manni kyunghan paroyi. "Angha miya wo ti kyari poh poyen soɓɓa ɓang lado ti si manghi soɓɓam. Mo khero yow kikhei, ɗang khero ti kyari poye soɓɓayi, ɓirang la kharan poh poyen soɓɓayi, arri ɗiyina wala ti si manyi soɓɓam. 37 Angha miya wo ti patti poye min tiya mengi battem. Mo khero yow kikhei yi ɗang poye minyi ti toɗɗi ɓatteyi, ɗang minayi ti kyarina ti khuyel, panan ɓatteyi ti toɗɗina. 38 Ti yi wala mo sob poyen min tiya poyen ɓatte. 39 Angha miya wo bawu piɗi sena mannyi nim wo ti men seh poyen min ɓiran ti khuyim, lunkhu khero ta, "manyi weh kwoppow khuyi."