1 Mbomi tiya son khirei yi, Kaisar Augustus kha soppipok ta mo ɓalkhu lenya wo ɗi ti khupebe pehp. 2 khei yi minentei poro ɓal lenya wo monni milang wo Kiriniyus ɗin ti khu gyuk khuppem ti khuyel Suriya. 3 Lunkhu khei yi, lenya pehp wokkerow minazun ya ɓal khuzun. 4 Yusufu illow ti Nazarat kha wor ya mina Baitalami wo ɗin ti Yahudiya wo ɓirang yeghi minani Dauda, lunkhu khero penna tiya khara minani Dauda. 5 Khero kho wor ya ɓal khuni khama Maryamu, La kunyoni, ɓirang mollo ɗi kha wup. 6 Milan khirei mikhei ɗin ti piɗi, milang wo mollo ti le laheo ponna. 7 Mollo kha le la neɓhero kha ɗawwulana tiya manyi girinwe kha lawani tiya ghele piɗi khi wokina ni wussuɗa lunkhu anghighi poh ɗurem. 8 Kham bororo singhezun ti kuɗe ya pi mina khirei yi ti pehbhe ta wan poh wossuɗa zun kha peɗi. 9 kalang ansuranni Yamba kha kher ti khuzun, malagyo ni Yamba kha malgyuru kha khompozun ti talla, kyoh kha khepzun kha ɓung. 10 An surani kha tepzun, "Makha yi kyom; lunkhu ni wanna nima kha paro ni Yamba wo tomon rosson gɓuɗe wo lenya pehp ti khirina. 11 Lunkhu bomi tiya mina Dauda lawema an mirhpoma, sini Kirti anmina. 12 Khero ti ɗiya wo kyup kokko ti pima pehp. Mari we si lagyana ɗawwulani tiya manghi girinwe sinani tiya ghele wo mun wokina ti wossuɗa." 13 Khumun, kha weh khawan lenya wo daghan penna ti kherghu kha an suranni ɗi ta wab Yamba ta, 14 "Yamba porow wo kyoghran, mo nyung rosso riiru khuyel ti talla lenya wo khero napghi tomonzun." 15 Wo ansuranni wassezun kha mezun ya kherghu ɓororoyi kha tep ti pissizun, "Kyara mu wor Baitalami mun galp wikkyuyi wo yowyi, wo Yamba kyuppemunyi." 16 Mikhei kha yi ɗagha kha worani, mikhei kha weh Maryamu kha Yusufu, ɓiran mikhei kha weh la gyanai sinani tiya ghele piɗi khi wokinani wossuɗayi. 17 Kaya pi wo mikhei waw wikheiyi, mikhei kha ti lenya pehp weh wo teppezun ti khuni lahyi. 18 Pehp lenya wo khirow, yuwah kha khepzun khaɓung ti khu dama kheiyi wo bororo mikhei kha tepzun. 19 Maryamu kyow toum ta ɗam ya rossoro ti khu paro khei yi wo teppirow ti khuni lahyi. 20 Bororo mikhei kha mawon ti khui mikhei ta wabɓani khama pawu Yamba paani pehp weh wo mikhei khirow, kha waani khigi wo teppezun. 21 Kha pori son pirɓiɗow, milang wo ta khar kpalleni, kha ne sommoni Yeso, kirei yi sommo wo ansuran munghuwon ɗng a yi wupninim. 22 Wo khu son pinezun kwopow, khighi wo khonni Musa teppow, Yusufu kha Maryamu kha wattun nini piɗi ɗimmi Yamba mo kyup ɗohni yi Yamba. 23 Khigi wo ɓallow ti ya arh paroni Yamba, pehp la kpattin wo appow wup ti kyup ɗohni ti Yamba." 24 Mikhei kha mun wo ɗaripok khigi wo ɓallan arh paroni Yamba teppow, "Mɓelli sozo pellow, la kpattin kha lapomin dang mɓelli mina pellow." 25 Gab ɓirang manni miyayi ti Urshalima, sommoni Siman, miyayi kham kha rosson ngɓang, an pawu Yamba wala, khero pattow aro ni ta kyonni milang wo rossoni Israila ti yi nyung, ɓirang khirim taɓerah ɗi ti khuni. 26 Khirim taɓerah kyuppeni tiya rossoni ta mo khero a weh Kirti Lahni Yamba kha aronim, ɗang khero ari murim. 27 Ni khirim ni Yamba wo wannan kha Siman milang khirei wo ma anleni Yeso wannan nini ya mina ɗimmi Yamba lunkhu ma mikhei yi khigi wo yiɗang ɓallan arh parozun teppow ta mo pehp lenyazun yu, 28 Khero kha ummi Lahyi tiya khirani kha pammi Yamba panang kha tep ta, 29 Mbomi mo kyeegho woreni tiya nyung rosso, Yamba, khigi wo parogho teppow. 30 Lunkhu arono waw mirhpohgho, 31 Wo khi ɓanghrow ti ɗoh lenya: 32 Pehya piɗi lunkhu abb aroni am sokkuɗing khama kyoghran ti lenyagho Israila." 33 Yuweh kha khep ma Dahni kha Nahni elengkhu pehp paro wo teppirow ti khuni lahyi . 34 Siman kha li khira ti khuzun kha tep ti nahni Maryamu ta, "Khulli Lah khei yi wannan elengkhu suger kha illani lenya gɓo ti Israila, ɓirang mo khero ɗiya lim-lim wo lenya khuɗow- 35 Khama wayi wo ti ɓali ya rossogho lunkhu ma pen pehp weh wo ɗin ta rosso lenya." 36 Kham pomin anɗopparo, sommoro Hanatu. Mollo ni lahni Fanuela tiya khara mina Asha, mollo manyow. Mollo ɗiyiwow kha mannaro gow sene parelow kha yapi wo a pen la kpallinim, 37 Ɓirang ni an ɓoro ni tei porow sene kik pirbiɗow kha peɗow. Mollo a perghi tiya mina ɗimmayim, ɗiyighi keɗeng paani yessan ya pok khama ɗimmi Yamba peɗi kha pikki. 38 Milang khirei mollo kha gizru tokkozok kha sun kha khepsi mun pemmi ti Yamba kha yi paroni lahyi ti pehplenya wo ta kyonni milang mirhanpohni Urshalima 39 Wo mikhei kpaɗɗow pehp weh wo mikhei mengi yuwani elengkhu ma mikhei kha telli arh paro khuyel zunim, mikhei khe mawezun ya mina Nazarat. 40 Lahyi kha gɓuɗani khayi ɓang, ta wakkiri khu penan, ɓirang khirani Yamba ɗii ti khuni. 41 Ma anleni worghi Urshalima pehp sene elengkhu khatti kha milang zakhani. 42 Seneni kha pori gɓummo tura pellow mikhei siran kha mani paani khatti kha milang zakhani. 43 Kha ya pi milang zekkani, mikhei kha illi ya meru mina. Birang Yeso ɗiiyi wow kha ya pi tiya Urshalima ɓirang ma anleni a penom. 44 Mikhei ɗammow kpang khero ɗiyighi ti talla lenya wo ta ti mere kha sun ti pii, mikhei kha khi toum kha mereyi, wo son monni ɓirang. Mikhei kha khepsi geng piini tiya tallama ankizun khama an kherezun. 45 Wo mikhei a wehnim, mikhei kha meru Urshalima kha khepsi baneni ti piɗi. 46 Kha ya pii son gɓunum, kha wehni tiya mina ɗimma Yamba, khero ɗiiyighi ɗi ti talla an mamwe, khero ta yari khumon ta khirezun ɗang ɓirang mazzun. 47 Pehp lenya wo ta khireni yuwah kha khepzun ti khu kiɗam kolmo pen weh khama kiɗam maza wo khero ta yuwani. 48 Wo mikhei wawweni, ɗiiyi wezun wo yuwah. Nahni ta, "Lahno, a wo wuni wo khi yuwemun kikhei ɗima? A khi khiro, Dagho kha ne mun ɗita gengho." 49 Khero kha tepzun, "Dima lunkhu wuni wo maɗiti panno ɗima, ma pen ta ɗi yi wow ɓong ni ɗiya tiya minani Dahnom ya? 50 Panan mikhei a wawu pen khu paro kheiyim. 51 Khero kha ɗappizun mikhei kha pori Nazarat khero ta munzun gɓuɗe. Nahni low pehp paro mikhei tiya rossoro. 52 Yeso kha khi toum kha gɓuɗani tiya penan kha losig, khama wakkyani tiya khunghu kha Yamba kahama lenya.