¹ Ku duk missai ma mo'on ku nongyo ma tangzah baring Maryamu Magadaliya ka la'ahun i galam duduhu ma ban hiham ma fah mala, shen mashen beh mur shi'ila sa kum ma a li'ira mor tah bah ghira kun beh mpuk shi'ila i yi twala ma. Ka bangya bunuyere shen bau Siman Bitrus i wu gamur wu muna ye'ele tumui bah Yeso njila ya, ka chew wa ne; A to beh loh bwajeh lua i yi yo ho mpuk shi'ila, so do shi'ila bana bah a sa ma'anai ho sa. ³ Ka ning nah, Bitrus la'ahun puru a shen mashen ho beh bana mur shi'ila ma i mo'on mun ye'ele tumui ma. ⁴ A bang bwa'aya, beh mun ye'ele ma bangya ji'ingi Biturs ku sum sa ji dwa ho mur shi'ila. ⁵ Ka she che'ele do'o su'ula sun beh bum mpuk shi'ila dong, sun wu twan bah a wu kusai i yi swa'ana ho yi do bor sana beh mpuk shi'ila sa. ⁶ Siman Bitrus ka yo ji ho kpaui, ka bor mashen beh bum mpuk shi'ila ma, sun wu twan ma a swa'ana ho nsah. ⁷ Ka twan bah a wu wangya yi ku muri karma ningyi chiha mi loi ku ba magina i ka'amuri. ⁸ Beh mun ye'ele bah wu bangya sa ji ho dwa ma, ka bor mashen bum mpuk shi'ila she sunu i mishi ka pah ngichewe. ⁹ A wu do shi shi'ia i ba na bah a ngwa'ala ne, ningha gba'a ne ko la'ahun ku yo wuh. ¹⁰ Wu muna ye'elei a bunuyere she mahen lah ya. ¹¹ Yi Maryamau chele wa ho beh mur shi'ila i mur zolo, ka zolo do'o su'ula ningyi nda sun beh bum mpuk shi'ila. ¹² Ka sun wu maleka baaring i puhu twan a ningha ho bum shi'ila i mo'on ya ku bana kis- muri, mo'on ku bana kis ngbi'i bene bah a wo ma'ana yir Yeso. ¹³ A mwe ne, bamaam man i pa'ana a mur zolo? ka chew wa ne, mu mur zolo chew bah a twala bwajeh yam. do shi'ila bana bah a sa ma'anai ho sa. ¹⁴ I mur lo'o mala, ne pirwi nswi, ka sun Yeso chila, do she'ele ne yi Yeso i chila sa. ¹⁵ Yeso ka hew yi ne, bamaam man yi pa'ana a mur zolo? wu mur pe'e yen bili? maam ma suni bene yi bah swa, ka chew yi ne, a naa toli sa ma'ana ku gigeng, chiwam bana bah a sa ma'anai ho, mo sa toli. ¹⁶ Yeso ka chew yi ne, Maryamu, ka pirwi nswi ka chew yi ne Rab-bo-ni i lo'o wu Yahuda yini bah sahsah. ¹⁷ Yeso ka chew yi ne, a mi bwalam ka'angam sa do shi yiwa mahen ba Dah ku kalang sa; shene sa chew wa wu swanna ne, shina mashen ba Dah i Tarwun, Baku yam i Baku wun. ¹⁸ Maryamu Magadaliya ka shene sa chew wa wu muna ye'ele ne, suna Yeso, lo'o yam lo'o mani. ¹⁹ Ku duk missai bili i kurwa, yi duk ma mo'on ku nongyo tangnsa baring, wu kum wu mun ka'ana Kpangar ku bana bah wu muna ye'ele tumui a wu kama murya ho banai chew ji'iri wu Yahudawa, Yeso ka sa puru chele ho ku ciri ya, ka chew wa ne, "Ning shima mashen bawun" ²⁰ Ka lo'o bene bili, ka rumya i buhi i wu zangyi. Wu muna ye'elei bong yirya shima chew bah a suna bwajeh ya. ²¹ Yeso ka bassa chew wa ne, gir shima mashen bawaun, bene bah Dah tuma mi, mi ma mu tum wun kpanaa. ²² Ka chew waa wu gir mini, ka sung-wosoi so'o ku murya, chew ne wu ya'a Puhu Mpilar. ²³ Wu bah wuna yes girbiwa ya so'ona to'o i yi, i ningya ne a yehe swa'ana to'o, wu bah wuna deo yes girbiwa ya swa'ana to'o iyi sa i ningya ne a do yeshe swana to'o sa. ²⁴ Yi Toma, mo'on i yo chiri wu muna ye'elei bah ai lu'ui ne yi mun pwassa, wu do ho i ya missai ba Yeso wo yo baya sa. ²⁵ Wu gamur laya wo muna ye'le chew yi ne, su suna Bwajeh, Toma ka yer wa ne, na do suna mpuk kusa ku beh Buhi sa, na ho, mo shi yis wu muna buham sunu, mu yis buham ku zangyi bwa sunu, in na do na sa, mi mo do pa ngichewe sa. ²⁶ Nongyo ya'anga yo bwo'olo, wu muna ye'ele a wo ho bwangya i Toma wu ho ciri ya; Yeso ka yo ho baya, wu kun ka'ana wo kpangara, ka nsa puru chele ho ciri ya ka chew wa ne "gir shima mayo bawun." ²⁷ Ka chew yi Toma ne, nara buho ne wu muna buho jik baa buham, nara buho kpa jik zangyam sunu, a mi ning bah i do pah ngichee sa, ning bah pahngichewe. ²⁸ Toma ka yer yi ne, Bwajeh yam, i Baku yam. ²⁹ Yeso ka chew yi ne, chew bah a suna mi, a pah ngichewe? gir shima wa bah a do suna gir i ngya'a misya sa, ai pahngichewe. ³⁰ I wu ngya'a gir bwana baha a wu do ngwa'ala ya ku ciri mpuknsheme sa, Yeso pah ya ho ku dum wu muna ye'elei. ³¹ A wo ngwa'ala wu mani ne, wu pah ngichewe ne Yeso Kristi, yi mun Baku; ku iri pa ngichewe ne wu ku nchimu ku ciri lu'uli