1 Jesu ke da vbọ loke sotọi, agbọn lebuin rẹkhaọin. 2 Ebei khian, ọkhọmitẹn vare ọgare, ọ deuhọmọn re nai, ọ tai, ''ọlọmọẹin, ọ kha khọẹn uọ meti rẹmẹ fuan.'' 3 Jesu niẹn obọa rẹ suọi, ọ tai, 'ọ khọẹin mẹ fuan.'' Isọkpaẹn, itẹn siọi vbegbe re. 4 Jesu tamain, ''kha tama ọya ọso. Akhian ọ regbe ma ohẹin lọkhua, uebi Mosis tamai, uọ rẹ rọsẹi maẹn.'' 5 Jesu ke ovbi Capernaum, ọlọ rigbalegbe egbọ Ihẹin khian gaọi re, ọ mian ọin, 6 ọ tai, ''ọlọmọẹin, ọguọmadia mẹ kakabọ khọmọn, gbobọ bi ukpuẹ ọvbegbe vboa,'' 7 Jesu tamain, ''iọ vare ọmuọ egbe daan.'' 8 Ọlọmọhe ayẹn, tai, ''ọlọmọẹin, i sọluọ vare vboa sọe, tọlẹmọi, ọguọmadia mẹ khọ daan. 9 Ọhiọ, ọya la rahu ni ọẹn iu, i mọọn igbalegbe li rekhian, i kha tama alodẹ, ọlodẹ, i ke tama ọliọ vare, ọvare, rẹzi ọguọmadia mẹ, 'uọ na,' ọ da uọi.'' 10 Jesu ke họn ọna, ọyaunua, ọ da tama ele rẹkhaọin, ''Ata, i tama vba, i sẹ mi ọlọmọn arẹọvbọ elina vbi Israeli. 11 I tama vba, Elebuin khe ọ da vbi gbefọin ọdọdan vare deba Ebrahami, Aiziki bi Jecobu dehia vbokhumeimi. 12 Ama, afilivbiẹ ẹguai kuọ vbodobi, ezi eviẹ bi iakọn ri.'' 13 Jesu tama ọlọmọhe, 'Akhian! E buu rẹọvbọ, ọi arizọ na.'' Ọlo vbi ẹghẹẹn, ọguọmadia sọe daain. 14 Jesu ke sẹ vboa si Pita, ọgare kheba Iyọn ọhi Pita khọmọn. 15 Jesu robọ suọi obọ, eba siọi vbegbe re. Ọ akhọre, ọ rẹ gai. 16 Emuan kere, E da munagbọn lebuin leti odobi we zi Jesu. Ọ rẹmọi ọkpa khu ele eti si aẹn vbegbe re, ọmu elekhọmọn egbe daan. 17 Ọna da ramusẹẹ ọvbe bi ohẹin Laizaia tai, khi, ''Ọẹn vbọ mu emiami bi ọtomẹ mai.'' 18 Jesu ke miagbọn le lagai, ọ tai lei lodẹ obẹda liọ si Galili. 19 Eghẹẹn, ọtu ọkpa rẹ ta, ''Ọlọma, iọ rẹkhaẹn, ezu rẹaye.'' 20 Jesu tamain, ''Eami ọso mọọn oo, Efiami mọọn ekoi, ama, ovbi ọyai mọọn ezọ mẹhẹn. 21 Ọvbokhan sọe ọvbei tamain, ''sẹrẹghẹin mẹ rẹ ọtera mẹ nẹ.'' 22 Ama, Jesu tamain, ''rẹkhaẹmẹ, Dele ui teli sẹaẹn le ui.'' 23 Jesu ke ovbokọ, Ivbokhan sọe da rẹkhaọin. 24 Efioo lọkhua kakabo bẹẹ vbẹda, ọ ghogho ọloko vbikpeghemi sẹda. Ama, Jesu mẹhẹin. 25 Ivbokhan sọe rẹ vare ọkhiọi, tamain, ''himẹmai, ọlọmọẹin, Imai ọ khọ u.'' 26 Jesu tamaẹn, ''Emi ofẹn da mu vba, ivbai bi ovbi arẹọvbọ li kere?'' Ọ akhọre tama ọlefioo, ''ọfunre, muzan kẹẹ. Izerẹmẹ da mu hii. 27 Ọyelimọhe unua, erẹ ta, 'ọmọhe emi ke khọ na, li efioo bi olokun mu ekpẹn ni.'' 28 Jesu ke do bọi liọ re, uhọmuroo si Gadarenes, Imọhe eva leti ọbe miamẹ gaọi re. E da vbu gbatoimi deanre, eghe kakabọ zẹo lọbe vbuhọmọn, lada miẹ aimiọlọ meti khian vbọ lukpodẹ ẹn rare. 29 Ekhue oruin ta, ''Emi mai ke ọkhọ rẹ u, ovbi Ọsẹlẹbua? U ke vare ọ royai mai e, lẹghen isẹrẹ sẹ?'' 30 Eghẹẹn, isi lebuin ee vbe zei ree vba. 31 Eleti rẹ tama Jesu, ''u kha khọ khu mai kua, dẹ mai lodẹ elisi ẹn.'' 32 Jesu tamaẹn ''vba akhian'' eleti deanre vbeghe selimọhe, lodẹ vbe li isi, isọkpa ẹn, elisi erẹmẹ vẹn ovbi olokun, euloi. 33 Ele rẹo khu elisi la ovbuwee, ọ rẹkan. Ọyunua le miẹi, ọlọ gbalẹ khi selimọhe leti odobi ria we. 34 Agbọn erẹmẹ vbọ lẹ vboi vẹn vare ọgi Jesu re. Le kerẹ gaire, e doabọ nai, lọi khuagbe vbotọi sẹaẹn.