Uhọmọi 4

1 Eti lọfuan ri Jesu lodẹ vbọdagbe, li esun ọ da damọi. 2 Ọ ke gbẹkẹin ohami vbikpẹẹ egbọ eva bi asọn egbọ eva, ohami rẹ gbọi. 3 Ọlọ damọi vare, ọ tamain, ''u kha ẹn khọ vbi Osẹlẹbua uu, tama elido na kin eko.'' 4 Ama, Jesu tamain, ''a vin ọin, ''Ọyai kha diegbe yain eko ọkpọkpa, ama, ẹmọi erẹmẹ lọ dai vbunu si Osẹlẹbua deanre.'' 5 Esun da rọi lodẹ ẹkẹn ẹvbọi lọfuain, vbohumọsẹ lọdalẹ, 6 Ọ tamain, ''u kha ui ovbi Osẹlẹbua, vbọ fiọ vbotọi, ọhiọ kha vin ọin, 'ọ tama angẹli sọe lei muẹ,' 'E ọ khuaẹ yokhumu vbobọ sẹaẹn, lu kha da mukpuẹ gbe vbudo.''' 7 Jesu tamain, ''A chie gbo viọin, 'U kha damọlọmọẹn losẹlẹbua sẹ fẹẹ we.'' 8 Esun chie gbo rọi oke lọdai, ọ ruhọmu roo sọlagbọn erẹmẹ mai bi egbegbe emi erẹmẹ mai. 9 Ọ tamain, ''Elemi na erẹmẹ iọrẹna, u kha die uhọmọn re gamẹ.'' 10 Jesu da tamain, ''khuaegbe vbaan, esun, ọhiọ kha viọin, ''uọ gọlọmọẹn losẹlẹbua, ọẹn ọkpa, u ọga.'' 11 Ẹghẹẹn, Esun zọobọ, ekhẹn angẹli da vare a gai. 12 Jesu ke họn kha mui Jọni lọsamẹ, ọ da vare vbi Galili. 13 Ọ khuaegbe vbi Nazarẹt, vare vbi Capernaum, lọ ri vbe gbẹda si Galili, vbuhi si zebulun bi Naftali. 14 Ọna sunu ọ vbamusẹẹ si Aizia lohẹin tai, 15 ''otọi si zebulun bi si Naftali, sa lodẹ egbolokun, rẹ gbera Jordan, Galili si Gentiles! 16 Elagbọn le ri vbodobi mi urukpa lọkhua, bi rẹzi ele dehiai vbi laga sodudu suu, rẹzi aẹn urukpa da vare.'' 17 Rẹ davbẹ eghẹẹn, Jesu bẹẹi vbọwewe ata, ''oẹkẹin deluẹẹn, ọhiọ ẹghẹn ọba sohumeimi sikẹ ean.'' 18 Ebọi khian vbegbẹda si Galili, ọ mimiọn eva, simọn la etioi Pita, bi Anduru lomiọin, mu ighan fiọ vbeda, ọhiọ ele gbehẹin eu. 19 Jesu tama aẹn, ''vba vare, rẹkhaẹmẹ, iọ rẹvba kin ele mu Ọya.'' 20 Ejẹjẹ, e zighan obọ rẹkhan ọin. 21 Ebi Jesu kei da vba khian, ọ mi imiọn eva evbei, Jemisi ovbi zebede, bi Jọni lomiọin. Eri vbokọ deba eraẹn ẹnhi ghan lọriai. Ọ etiei aẹn, 22 e da fi eraẹn ọvbokọ lodẹ ọgaire. 23 Jesu khiain vbi zerẹmẹ laga vbotọi si Galili, ma emi vbọsẹ sẹaẹn, ọwewe ẹmọi so ẹguai ọba, ọ mu agbọn egbe daan vbemi ọdọdan. 24 Ẹmọi sọe laga izerẹmẹ si Syria, elagbọn mu le lekhọmọn re eleti odobi we, ele gbobọ bi ukpuẹ yẹn vbegbe, ọ mu aẹn egbe daan. 25 Agbọn le bunlẹ da vbi Galili rẹkhan ọin, Decapolis Jerusalẹmu, bi Judia rẹ gbera Jordani.