1 Uwonọnọ, mi vi gbobe yiye, onimi hiemi ghowavbọni, gbobe nobeeva khimi re yieheyere, khurẹ muegbe fihi ghowa ata yẹ, khọrekhina uyeere irohi enemiao nefonani nihi hi rohini neni ashẹ ọnọmọnini neni ọnọ rumi aghi re mu kia ghobọ imiehimi Ijesu re. 3 Khaa nihẹ ọnọ asoo ene reghobọ yiegia nere ẹghẹghẹ ikpehimi yiegia gbolemi neni eyi emi gbi ọri eni iyeli. 4 Eminu, yin ilei noria khe kiegbere yin ọ ri? Khẹe iramani nọthọ re wuoagha ema gbei gberi esẹkpẹ ri ọ gbi yin a hi a na aiye ọnọ re. 5 Ere ighuoyao hamagha kpe kheimi khagbọ ghowamẹ neni ghobọ amẹ ọhi ahi mẹ neni ọkhebe, kia ashẹ Oithalọbua re. 6 Kia ghobọ emenọ re, arẹsẹ re amẹ fuhe aiye agha. 7 Ama uwonọ ọnọ, eimi neni agbọ amu ne haya khẹ ghera kia ghobọ ashẹ nọkpa nire. Amune haya khe ẹ ẹ Isoẹthọ neni afuagha ghogbọ ni khe ni hẹ Oithalọbua 8 Ohivavba iyeli r, eni mi hiemi ghowa vbeni, asoo eokpa na Oithalọbua ọyẹẹ Ikpe ẹgbẹnẹ ọ yẹẹ eokpa highobọ Oithalọbua. 9 Oithalọbua ọ yi ghanẹnẹ hi idomunu vbọni gbi eso kue ghanẹnẹ hi. Oithalọbua ọthine na yẹ ọkọhẹ khi ọsovba fuagha, ama khi ọrọrọ re ma ye yẹẹ ghowa thẹ 10 Gbigbọ khinani ẹẹ Ijesu nọ vare yẹẹ oyi: Aiye ọnọ ọre iyana nọẹmi fuagha. Ema nerivbọ eatoagha. Ekẹ ọnọ neni ema nahivbọ yi erẹ egbe khahẹ 11 Orẹkhina ema enọ efuagha gbinọ ọnọ ọgbọ ukhuokpa wa khina? E yi aiye nọ fonani khukhe khina ọgbọ nọ yi aiye Oithalọbua. 12 Mọni akue khi righe kpe ẹ ẹ Oithalọbua no kare ẹonọni, eimi, ghera tohe emi agha, ema neri ghowavbọ eyaanagha, erẹ tohemi yaanagha. 13 Ama gbi ọhi hi Idọmunu, arighe khẹ eimi nọgbọ neni aiyenọgbọ ofona ọa kienahi. 14 Asoo yọ enimihiemi gho waoni urẹ dọmọni hi iyieli kpe emenọ na meni yi ma ni khi wa hi moni ulili ukhe mọni ebi hi ithao vbọ hi ghowa ọfọre. 15 Khe mọnọ ha akue elimi Oithalọbua ọvbi amufuehe nọ gbi ọnọhiemi ghowaghi Ipọlu gbobe no vi yiyẹ, gbi ahi da eghuani na nọni. 16 Ipọlu rohi ema enọ gbei hi ghobe no vi ni, Naihi vbo me ema ogberee ni ka de hi ogbọvbo, emi khe nihẹ nini eni yi ata ethukuhe emavbọ gha, gbi yọ ekhe yi ebe ehi nomu afuagha vberi re. 17 Asoo yọ enimihiemi ghowavbeni, ure nihẹ ema nọ ọ, nihẹ eghe ye kia eni khe deba ofi ghe la mu yẹ do ghothẹ ni aiyiehioghi ye khu ria muotiagha. 18 Ama fue hi ghowa itofa ninẹ eghuani ọnọ mọni aghi, ọnọrumire Ijesu Kristi.Ọkhai ọkhina naoni khuwọnọ neni khẹkhẹ Ami.