¹ An Pol kwerem kǝ Jesu, kǝ emnǝghǝn nǝ Timoti shin waji nder shaar shiit fun Filimon, ² kǝ emnǝghǝnmu wu mat - Afia, kǝ shaar shiit mǝ lyak mpe Naan, Akipus shin waji nyen mwan nder Naan ndǝ pǝ kaat lǝ gǝ. ³ Yit ɗe ton shaghap kǝ wuret kǝ Nda Naan kǝ mǝ Nda Jesu tong a wukǝme kǝ gun. ⁴ An pǝ plang Naan. An pǝ ɗang Naan mpe gǝ. ⁵ A kǝlǝng ɗen pǝzung ndǝ gǝ kǝ ni kǝ demshak ndǝ gǝ k3ǝ ni Nda Jesu kǝ duk nyen shin zeenmu. ⁶ A ɗang pǝ Naan ɗe nkaat kaa nyen naanmu kǝ ɗen pǝzung kǝ man kǝ bi wuret kǝnaarmu ndǝghǝn Jesu. ⁷ Mpe ndǝ an kǝ retnyit kǝ shang mpe dǝmshak fuk mpe ndǝ pǝzung nyen shin zeen ni pǝ biring a wupoo mpe gǝ, emnaa. ⁸ Mpe wuni bǝ an kǝ tughurkagham ndǝghǝn Jesu ɗe nan a sat bi ndǝ gǝ shin ɗi. ⁹ kǝ ndǝ asǝ mpe ɗemshak, an pǝ ɗang shi pǝ gǝ ɓul - an Pol, an nagya gurum, ndǝ shin an a wu bǝɓwaghat mpe Jesu Kristi. ¹⁰ An pǝ tal mpe la fǝn Onesimas, ndǝ a ɗe nda muk nɓut ngwaghar. ¹¹ Dok nshe bǝ ni kǝ me pǝshi nder gǝ ma, kǝɗetsǝ bǝ ni pǝshi nder nǝ kǝ gǝ duk. ¹² Shin a lep ni nder gǝ, ani fe npǝzung nǝ. ¹³ A sha ndǝ ye a ɗen ni awukǝme kǝ an ɗe nni shin shiit mpe nǝ pǝ kop gǝ mpe ndǝ an nɓut ngwaghar mpe bǝlǝp wushang kǝ Naan. ¹⁴ Kǝ ndǝ asǝ fe bǝ an pǝ ɗem ɗe nnan a shin mebi nnon ɗem fǝk ma, an pǝ ɗem ɗe shiit fǝk wuret ɗen a mpe kǝlǝng shang ba a mpe ndǝ mu lǝ tiit ngǝ ma. ¹⁵ paksǝbǝ a mpe ni ɗe pan yit gǝ mpe jep teermu mpe ɗe ngǝ gǝ kat tong awukǝme kǝ ni tai tai ɗi. ¹⁶ Ni mpe shin ɗe kuɗi a kwerem zak ma, mpe ndǝ met kwerem, ni a emnǝghǝnmu. An pǝ ɗem ni a lǝle ma kǝbi ndǝ gǝ ɗem ni duk sǝ nɓut nan kǝ Nda sǝ. ¹⁷ Asǝ kat gǝ naa an a shaar shiit sǝ, bǝ gǝ nlap n kǝbi ndǝ gǝ lap an sǝ. ¹⁸ Kat me kaat ɗi o kot shin me sǝm shik wu bis bǝ gǝ sat ɗe a mang tǝghǝn fe. ¹⁹ A an, Pol, a ran ran sǝ kǝ sar nǝ: an mpe kwat gǝ. An a sat ngǝ sǝna kaat fǝn nder gǝ ma. ²⁰ E, emnǝghǝnnǝ, gǝ ɓaam an mpe wuret kǝ Nda Naan gǝ shin nook npǝzung nǝ ndǝghǝn Kristi ²¹ Loghot fǝk lǝ tughur kagham nnan, A man ndǝ gǝ shin bi ndǝ met nbi a sat sǝna gǝ shin. ²² Asǝ fe bǝ an pǝ sǝna gǝ kat me lǝ mǝzep mpenǝ, mpe ndǝ an kǝ ɗn pǝzung ndǝ mpe mak waji nder gǝ mpe ɗang ndǝ gǝ pǝ shin nnan. ²³ Epafara, shaar tong nlǝ kwo fǝn ndǝghǝn Jesu tal gǝ. ²⁴ Asǝ duk bǝ Maak, kǝ Aristakus, kǝ Dimas, yaghal Luka, shaar shiit fǝn mu pǝ tal gǝ. ²⁵ Yit di ɗe wuret kǝ Nda Jesu Kristi tong awukǝme kǝ riin fǝk. Asǝwai