¹ (4) Ghi na laa ran nkaa Yohana 7:53 - 8:11 ndel Jesu mwan yaa npang ndhi mu khi yong ni a Pang Zaitun (Mount of Olives). ² Nbi bit, bhi mwan nkwa ya nlih Naan bhi gurum mu duk duk mu wul; bhi ya pe tong yakkal kam kam mu. ³ Attaura (Scribes) khi Farisiyawa mu ji khi nni me mat ndhi mu yaa ni phi korto. Mu den ni khinar. ⁴ (5) Ghi na laa ran nkaa Yohana 7:53 - 8:11 ndel bhi mu sat ni, "Ngu kam, mu yaa mat sih phi korto. ⁵ Khi det sih nbut war, Musa khi den a ndhi mu fiya nkaan ,gurum wuni fee mu; ghi sat ame khi kaa muk e?" ⁶ Mu sat bhi sih apee lang gwak ni de nni kat me bi mpe tang dyel khini det, ama Jesu duhum bhi yakkal ran ran nyil khi nmejirap sar ni. ⁷ (6) Ghi naa laa ran khi kaa Yohana 7:53 - 8:11 ndel. Ndhi mu wet pih tal tal nder muk, bhi yakkal kihting bhi sat mu na, "megwo khinaar gu ndhi ni khi shikbiss ma, bhi ni shee kom mat sih kih pang." ⁸ Jesu shin duhum wukwa bhi ran ran nyil khi nme jirap sar ni. ⁹ (7) Ghi naa laa ran khi kaa Yohana 7:53 -n 8:11 ndel. Ndhi mu khiling asih, bhi mu sho khime khime, she khi wugyaa gurum fee. Nlat bhi Jesu de meshin, khi mat ndhi ye ni khinar mu. ¹⁰ Jesu ep kaa ni bhi sat mat fee naaa, "Na mat, nyen ndhi ye mu phi tang yi khi dyel mu yaa a neye? Ba me mu ndhi gap dyel den nkaa yi a? ¹¹ Bhi lap na, "Ba megwo, Nda Naan." Jesu yakkal na, "An ma aa gap dyel a den nkaa yi ma. Yi wa yi nok shin shikbiss wukwa sih") ¹² Bhi shin Jesu lap bhilip khi mu na, "A aan aa bi nape mhi khiyil; gwo ndhi bii an bhi khi mwan mwan nkwo ma, ama khi kat bi nape mhi nohok wu ret." ¹³ Bhi Farisiyawa mu mu sat ni, "Ghi shin langting npe kaasak; langthing fhik khi zeen ma." ¹⁴ Jesu yakkal lap mu naa, "Ko ye a shin langthing mhi kaasan, langthing fhin a zeen. Aman pee ndhi a put di yakkal pee ndhi an ya di, ama gun gu man pee ndhi a put di ma, ko pe ndhi an ya di. ¹⁵ Gun phi shin dyel a yad ndhi sihsuk na di; A shin dyel megwo ma. ¹⁶ Ama kat a shin dyel, bhi gap dyel mfhin khi zeen pee ndhi a an khime ma, an a wukhime khi Nda Naan ndhi lep an. ¹⁷ Asih, yakkal nbut war fuk bhi mu ran a ndhi langthing khi gurum mu vil bhi a zeen. ¹⁸ An a gurum ndhi a shin langthing mhi kassan, yakkal Nda ndhi lep an shin langthing khika nhi." ¹⁹ Mu sat nni, "Nda fhik a ne? Jesu lap na, "Gu man an ko Nda nhi ma; kat yee gu man an, bhi yee gu man Nda nhi duk." ²⁰ Sat bhilip sih mu a but leng fini yad ndhi ni phi kam kam nlih Naan, yakkal ba megwo mndhi yaa ni nsar ndhi bit khimuk warhi gwe ma. ²¹ Yakkal bhi shin sat mu na, "An pe wa; gu shakop nhi yakkal gu dwam nbut shikbiss fuk. Pe ndhi an yaa di, gun pe makpe yaa di ma." ²² Yahudawa mu na, "Ni pe tih kashin muh? Ani lih de sat sih na pee ndhi an pe yaa di bhi gun npe iya mwan yaa di ma?" ²³ Jesu yakkal sat mu, "Wu gun muk a mhi yil; aan a tong a khiting a wul. Gun a mhi khiyil sih' an a mhi khiyil sih ma. ²⁴ Pe ndhi asih, a sat a ndhi gun pe dwam nbut shikbiss fuk. Pe ndi sai gu shinzeen a ndhi A An, bhi gun pe dwam nbut shikbiss fuk." ²⁵ Bhi yakkal mu sat ni mu na, "Ghi awe?" Jesu sat mu naa, "Bii ndhi a sat ngun wusheshe. ²⁶ An khi bii mu bwer npee bhilip yakkal npee shin dyel khi kaa gu. Ama, gwo ndhi lep an a zeen; yakkal bii ndhi a khiling nder muk, abii sih ndhi an phi sat khi yil." ²⁷ Ji khi en mu ndhi ni phi sat bhilip a khi kaa Nda Naan ma. ²⁸ Jesu sat na, "khidangkong ndhi gu epp Laa Gurum, bhi gu man ndhi A AN, yakkal a shin mebii mhi kaa san ma. Yad ndhi Nda kam nan, an phi sat abii fee musih. ²⁹ Gwo ndhi lep an ni nder nhi, yakkal yit an mhisan ma, sar ndhi an phi wet shin abii ndhi ret nyit muk." ³⁰ Yad ndhi Jesu ni phi sat bii sih mu, mu bwer mu shin zeen nni. ³¹ Jesu sat nYahudawa ndhi khi mu shin zeen nni naa, "Kat gu dee nbut bhilip fhin, bhi gun a nyen shiit fhin a zeen zeen; ³² yakkal gun pe man zeen fee, yakkal zeen fee npee bet gun gu tat kwang gu?" ³³ Mu lap ni muna, "Mun a jep kop Abraham yakkal mu sham tong kwaram mhi megwo ma; shinnang ghi sat sih naa, 'mu khi bet mun mu tat kwang me e'?" ³⁴ Jesu lap mu na, "Pe zeen, an phi sat fee ngun, duk gwo ndhi shin shikbiss bhi ni a kwaram mhi shikbiss. ³⁵ Kwaram khi tong lih fee wai wai ma; ama laa muk khi tong wai wai. ³⁶ Pe ndhi asih, in kat la fee bet ghi shin wa, bhi bet ghi a mhi zeen zeen. ³⁷ A man ndhi gun a kaan khi Abraham, gun phi tang npe tih an sar ndhi bhilip fhin khat del nder gu ma. ³⁸ A sat abii ndhi a naa nder Nda nhi, yakkal gu shin bii ndhi gu khling nder Nda gu." ³⁹ Mu lap ni muna, "Nda mu a Abraham" Jesu sat mu, katye gun a jep Abraham, bhi ye gu shin shiit Abraham. ⁴⁰ Duk kih ndhi asih, bhi gun phi tang tih an, gurum ndhi sat zeen bii ndhi a khling nphi Naan. Abraham shin bii sih ma. ⁴¹ Gu shin shiit Nda fuk." Bhi mu sat nni, "Me bak mun a nbut yarkaam wu baan ma; mun khi a khime: Naan." ⁴² Jesu sat mu naa, "Kat yee Naan a ndah gu, bhi yee gu dem an, sar ndhi a tong a nder Naan a wul yakkal an nbhi sih; sar ndhi a wul a mhi kassan ma, ani lep an. ⁴³ A me lih de gu man bhilip fhin warhi ma diye? A sar ndhi gun phi dem khling fhin ma. ⁴⁴ Gun amhi Nda gu, rin wubis (shetan), yakkal gun phi dem shin bii ndhi Nda gu dem. Gett ni a ngu tyo kaa nsheshe yakkal khi dar nbut zeen ma sar ndhi zeen nbut muk ma. In kan sat dung, bhi sat abii ndhi shishik mu sar ndhi ni a dadung yakkal Nda dung mu. ⁴⁵ Duk khi ndhi asih, sar ndhi an phi sat zeen, bhi gu shin zeen nan ma. ⁴⁶ Awe khinar gu ndhi ya an khi dyel npee shikbiss he? In kat a sat zeen, ame lih de gu shin zeen nan ma ye? ⁴⁷ Gwo ndhi ni a mhi Naan, bhi khi khiling bhilip Naan; gun phi khling mu ma npee ndhi gun a mhi Naan ma." ⁴⁸ Farisiyawa mu lap yakkal mu sat ni, "Mu sat a zeen ndhi ghi a Basamariya (Samaritan), yakkal ghi khi mhikwarkum?" ⁴⁹ Jesu lap naa, "An khi mhikwarkum ma, ama a shin yon Nda nih, yakkal gun gu shin yon nan ma. ⁵⁰ An phi tang saam san ma; ngu tang yakkal tok dyel ni di. ⁵¹ Pe zeen, pe zeen, a sat ngun, gwo ndhi ya bhilip fhin, bhi khi sham na muut ma." ⁵² Yahudawa mu sat ni, "Khidetsih bhi mu man ndhi ghi khi mhikwarkum mu. Abraham khi nyen koss mu dwam, ama gu sat gu lih, "Kat megwo ya bhilip fhin, bhi khi sham naa muut ma." ⁵³ Gun gu met nda mu Abraham ndhi muut ma, kot gu met wo? Nyen koss mu na mu dwam. Gun phi mang kaasuk a me ye?" ⁵⁴ Jesu lap na, "In kat a shin yon nkaasan, bhi shin yon fhin amebi ma; a Nda fhin ni phi shin yon nan - ndhi gun phi yong ni a Naan fuk. ⁵⁵ Gun khi man ni ma, ama a man ni. In kat a lih, 'A man ni ma', bhi a dee a khipe gun sih, ngu dung. Ama, a man ni yakkal a yaa bhilip khimuk. ⁵⁶ Nda gu Abraham shin ret nyit ndhi na bit fhin; khi na yakkal ret nyit muk." ⁵⁷ Yahudawa mu sat nni naa, "Gu wa ghi rhi yii yakgurum vel khi sar gwe ma, bhi ghi naa Abraham?" ⁵⁸ Jesu sat mu naa, "Pe zeen, pe zeen, a sat ngun, de she Abraham di, bhi A AN." ⁵⁹ Bhi yakkal mu dhikin pang mpe fiya ni, ama Jesu sok kashin yakkal del put nlihNaan fee.