¹ Nbit par puus ndhi nshe bhi phe man saam lat maa, bhi Maryamu Magdaliya jhi dhi phi tuhun wum, yahal kat mwo mang alang/pang ndhi mwo ohot phi tuhun khini shin ba. ² Yah nasih mwan nder Siman Bitrus khi gohotshi Jep Kam ndhi mwo a jep dem khi Jesu, bhi sat mwo nnah, "Mwo mang kum Nda Jesu shin put ntuhun wum, dang du man phe ndhi mwo den kum fhe dhi zak maa". ³ Bhi Bitrus khi gohotshi Jep Kam fhe mwo pwat, yahal mwo yah dhi phi tuhun fhe. ⁴ Mwo sho nder shak, yahal pak Jep Kam fhe mwo sho khi mwo del phi Bitrus ba mwo rwo phi tuhun dhe kah muk. ⁵ Bhi gim nha phe ntuhun fhe bhi nha lhe wum khi lhi dang bhi kum fhe dhi maa. ⁶ Siman Bitrus khi nhi kidangkong muk bhi rhi dhi ntuhun fhe, bhi nha lhe wum fhe mwo khi lhi dhi. ⁷ dang bhi lhe ndhi dhikit kha nhi khi nhi khi den nder lhe ndhi mwo wum nhi khi nhi maa, khat mwo shihit wuni mwo den dik. ⁸ Bhi gwo ndhi yhe she khi rhi del dhi ntuhun fe duk bhi khat bhi fhe mwo asih a zehen. ⁹ Ah npuus wuni fhe dheshe kik der sut ndhi nhi a wuram nbut bilip Naan ndhe khi yahhaal khidangkong mut khi muk dhi. ¹⁰ Bhi Jep Kam khimuk mwo wak yaa lhi dhu. ¹¹ Dang bhi Maryamu daar khibang nhi phi wal. Ndhi nhi wal bhi gim khi dhi phi tuhun. ¹² Nha Jep Lep khi Naan mwo vhil mwu khi twahat khi lhi piya, bhi khime khi tong khiphe ndhi mwo dem kha muk yahal wu vhil khi khiphe ndhi mwo den gid shohopshik muk. ¹³ Mwo sat nnhi mwo nnha, "Mhat sih, yhi phi wal a mhe? Pring nwo nnha, "Nphe ndhi mwo mang khum Nda Naan fhinhi dhe a man phe ndhi mwo den dhi maa." ¹⁴ Ndhi lat sat fhe det bhi viling yit dhi bhi nha Jesu khi dar, dang bhi man ndhi a Jesu maa. ¹⁵ Jesu yahal sat nnhi nnha, "Mhat sih, kanyhi phi wal a mhe yhe? Yhi phi tang a whe yhe? Ni mat phi nah a khipe ndhi gwo fhe a mhe nghi sak mar lohun nbhisih yahal sat nnhi nnha, "Nghuyon, khat a ghi ghi mang kum fhe bhi ghi sat bhe ndhi ghi den dhi ndhe nahan a mang a she phe khi nhi dhi". ¹⁶ Jesu pring nnhi nnha, "Maryamu, Ndhi viling, bhi sat nnhi khi lhis Yahudawa nnha, "Rabbon." (ndhi phishi fhe a "Ngukam"). ¹⁷ Jesu sat nnhi nnha, "Tap yhi bhim an mha, nphe ndhi man a rhi nder Nda nhi gwe mha, dangbhi yhi mwan ndeer emnhihin nhi mwo bhi yhi sat nmwo ndhi an nkha khiting nder Nda nnhi ndhji a Nda yhi, shin nhin a Naan fhinhi khjipe ndhi nhi a Naan fhi." ¹⁸ Maryamu Magdaliya jhi, yahal nhi phi sat Njep Kam khimuk mwo nnha, "A nha Nda", khi bhi ndhi sat nnan. ¹⁹ Ndhi kansihin tha par puus fhe, puus ndhi nshe, yahal Jep Kam khimuk mwo ohot phi lhi ndhi mwo dhi ndhikhin nphe ndhi mwo phi lwahat Yahudawa mwo, det bhi Jesu jhi dar khi nhar mwo, yahal sat nmwo nnha, "tongshahap khat gun". ²⁰ Khidangkong ndhi sat asih bhi nhin sahar nhi khi eskohop nhi. Jep Kam khimuk mwo shin retyit ndhi mwo nha nNda. ²¹ Jesu shin sat nmwo nnha, "tongshahap khat gun. Khipe ndhi Nda Naan lep an bhi an nphe lep gun a sih." ²² Ndhi sat wunhi fhe lat det bhi fhii nhok fhinhi khi dheel mwo yahal sat nmwo nnha, "Ghu lap Riin Wubang. ²³ Khat ghu khon khi shikbis nmhe gurum, bhi dhe a wukhon; dhangbhi khat ghu khon khi nhi mha bhi khi dhe dhi asih. ²⁴ Toma, nmhe mhe nbhut mwo ndhi sarkhavhil sih ndhi mwo phi yong nhi a Jhan nhi nder mhi nhi yhe mwo ndhi Jesu jhi mha ²⁵ khi dangkong bhi mwo sat nhi mwo nnha "Mhu nha Nda Jesu", Bhi nhi sat nmwo nnha, "What a nha nhi khi nhi dhe a lep sar nkhop phe fung ndhi mwo pwas nhi dhi mha bhi jhi shin zehen mha". ²⁶ Khidangkong teher pohokhun ndhi jhep kam khimuk mwo ndikhin lhi a wukhi mhe khi Toma bhi Jesu jhi dheel bhi phi lhi fhe a wu ohot, bhi ndhi khi dhar nnhahar mwo bhi sat nnha, "wuret khat gun". ²⁷ Bhi sat nToma, "Ghi lep sahar ghi nfung sahar nnhi yahal ghi nha sahar fhe. Shin ghi lep sahar ghi nfunmg tuhur nhi. Ghi nok nyang shinzehen sih, ghi ndhe a nghi shinzehen. ²⁸ Toma pring nnhi nnha, "Nda nhi Naan." ²⁹ Jesu sat nnhi nnha, "A nphe ndhi ghi nhaa an khi yit ghi bhi ghi shinzehen. Tongshahap khat mwo ndhi mwo nha mha bhi mwo shin zehen. ³⁰ Det bhi Jesu shin bhi fhii pwo bwer njep kam fhinhi mwo a wuran mha ³¹ dangbhi ndhisih mwo ran mwo a nphe dhe ngurum mwo shinzehen ndhi Jesu Kristi a Lah Naan dhi, khat gurum shinzehen nnmhi bhi khi khat bar mhi sehen.