¹ Khidangkong ndhi Nda Jesu sat bhilip fe mu, mbhi mu pwat khi jep kam fhini mu, ya nkwam phe tileng kidran,khipe ndhi maar dhi yahal mu ryo dhi. ² A sih phe Judas, ndhi a nhi phe seet khi, Ndah Jesu, man phe fe duk, nphe ndhi nhi Jesu tong khi mwan ya dhi lhi jep kam fhin mu. ³ Mbhi Judas, mang tihim pak nyen lyak/soja mu yahal pak nyen nnan shiit lih Naan yahal Farisa mu, mu ya dhi khi wus, mbhi nnaah pe yahal le liak. ⁴ Mbhi Ndah Jesu, ndhi man duk-duk bhi ndhi phe te khi nhi, tong phut yahal tal phe mu nna, gun phe bhong a wey? ⁵ Mu lap nhi muna, "Jesu mbhi Nazaret". Ndah Jesu sat mu nna, "An sih". Judas, ndhi seet khi nhi, der dhi nder nyen lyak/soja fe mu. ⁶ Ndhe sat mu nna, "An sih" mbhi mu bwak khi khidangkong, yahal mu pwulap nyil. ⁷ Mbhi tal wukwa phe mu nna, "Gun phe bhong a wey?" Mbhi shin muna, "Jesu Nazareth". ⁸ Jesu lap nna "A sat ngun a le a an sih. Kat gun phe bhong a an phe gu yit nyen sih mu wak. ⁹ A sih phe ndhe nhi gam bhilip ndhi nhi khi sat, "Khinaar nyen ndhi ghi shin mu nnan, phe mey laham ma." ¹⁰ Phe Simon Pita, kon nhi khi baga shuk, shang yahal gap kwang kon mu kwaram khi baga gwo wu yon mhi shiit Naan. Sim kwaram fe a Malchus. ¹¹ Ndah Jesu sat Pita nna "Ghi lep shuk fe ndhihin pat fhik. A shu am nbut da'a khi Ndah nhi ndhi shin nnan ma? ¹² A sih phe khi tus nyen lyak/soja mu, yahal wuyon khi mu yahal wunan Yahuda mu ya Ndah Jesu yahal mu bwaat nhi. ¹³ Mu she mwan khi nhi nder Annas, nphe ndhi a sihir Caisphas, ngu shiit lih Naan ndhi a yih shiit khi muk. ¹⁴ Kaiafas a gwo ndhi dok shinder Yahuda mu nna wak gu khime muut pekop gurum mu bwer. ¹⁵ Simon Pita mu khi mey laa kam wu kwa mu mwan nder, Ndah Jesu. La kam wuni fe man mey ngu nnan, dhi lih Naan fe phe del kam khi naarkom khi gwo fe nder Ndah Jesu. ¹⁶ Ndangbhi Simon Pita ndar khibang. La lep ndhi ye rii khinaarkom fe shin phut ndhe sat mat ndhi nhi phe lih fe shin yarkam Simon Pita rii dhikin. ¹⁷ Mbhi mat tap pedhi tal phe Pita nna "Ghi a mey la lep khi Ndah Jesu ma? Pita lap nna, "An a mey ma." ¹⁸ Ndhi kwaram fe mu yahal nyen nnan lyak/soja mu diram phe dam wus kursar kut. Pita dar nder mu phe dem wu fe duk. ¹⁹ Nyen nan shiit lih Naan fe mu tal phe Ndah Jesu kha jep kam khi muk mu yahal kam khi muk duk. ²⁰ Ndah Jesu lap nmu nna, "Khi a sat bhilip khibang ndhe dhihin yil man dhi. Du tong wet a kam-kam li Naan yahal jep phe ndhi mu phe sam Naan dhi Yahudawa mu duk-duk phe wul. A sat mey bhi nda wu sisok ma. ²¹ A nan ndhe gu tal phi nhi dhi ye? Gu tal phe nyen ndhi mu khilong mbhi ndhi a sat. Gu nnaah, nyen sih mu man mbhi ndhi a sat. ²² Ndhi Ndah Jesu sat wu nhi fe det phe mey wuyon mbhi nyen lyak/soja mu nnang nhi yahal nna, "A bhilip ndhi ghi lap phi gwo wuyon mbhi lih Naan a sih a? ²³ Ndah Jesu lap nna kat a dung bhi ghi sat zen fe, ndangbhi kat a zen, phe a mey li ndhe ghi nnung an ndhi ye? ²⁴ Bhi Annas lep khi nhi shin kam nder Kaiafas, gwo wuyon khi lih Naan fe. ²⁵ Asih mbhi Siman Pita nder phe den wus. Gurum fe mu tal phi muk muna, "Ghi a mey la lep fe ma? ²⁶ Mey kwaram khi ngunnan mbhi lih Naan, emnihin gwo ndhi Pita gap kom fe sat nna, "Yeh a nnaah ghi khinaar kom ma?" ²⁷ Pita shishik wukwa, yahal berber phe delkoo tokshiit. ²⁸ Mbhi mu dhil Ndah Jesu nder Kaiafas shin mwan khi phe wuyon Ndhi sih a shit-bhit, yahal ba mu rhi khi phe wuyon fe ma yak bha mu khi del khidel waar ndang bhi mu phe siih bhit Retyit yii khi yii. ²⁹ Bilatus phub kat mu yahal tal nna, "Gu ben a mbhi wubis ddhe nnang khi de gwo sih ye? ³⁰ Mu lap muna 'Kat yeh gwo shi a gu shikbis ma phe yeh mu ji khi nhi ghi ma." ³¹ Bilatus sat mu nna, "Gu mang buk shin del, yahal gu tok diyel nhi mbhi yarkam waar fuk'. Yahudawa mu sat nhi muna, "Waar fun shin phe muu ndhe mun mu tii gurum dhi ma." ³² Mu sat ndhi sih ndhe bhilip Ndah Jesu gam dhi, ndhi sat yarkam muut fin. ³³ Mbhi Bilatus rhi khi phe wuyon fe wu kwa yahal yong Ndah Jesu tal phi mu, "Kot a nih a long mhi Yahudawa mu ah? ³⁴ Nda Jesu lap nna, "A ghi, ghi sat bhik a, kot a mey gwo mu sat bhilip ghi dhi kha nhi yeh? ³⁵ Bilatus lap nna, "An a Yahudawa ma, kot a sih ma yeh? Gurum fhik mu yahal nyen nnan shiit lih Naan mu shin ghi nan. ³⁶ Nda Jesu lap nna, "Wuyon fin a mbhi dhikin yil sih ma. Kat yeh wuyon man a mbhi dhikin yil sih bhi yeh kwaram fin khi lyak phe nhi yah bha mu khi shin an Yahudawa mu ma. Ndang bhi long/wuyon man a mbhi dhikin yil sih ma." ³⁷ Bilatus tal phi muk nna "Ghi a long ah? Jesu lap nna "A ghi, ghi bhilip bhik, ghi lih an a long. Nphe ndhi mu laa an a phe nhi. A phe nhi dhe a wul khi dhikin yil dhi, ndhe nnan a shin langting nzen fe dhi. Duk gwo ndhi a gwu zeen khiling dhikil nhi. ³⁸ tal nna "A mhe a zeen eh?" Ndhi khiling bhilip khi muk, phe shin bwut kat Yahudawa mu yahal sat nmu nna, "A kat mhe wubis nder gwo sih ma. ³⁹ Ndangbhi tong a wusihiir gwe ndhe a shin mhe gwo ngun par Bhit Retyit yil. Nphe ndah asih mbhi a shang long mhe Yahudaawamu ngun ah? ⁴⁰ Mbhi fwa orr wukwa yahal mang "A gwo sih ma, ndangbhi a Barnabas" Barmabas gyet a wat.