¹ Retyit yil ndhe teer peameh, mbhi Nda Jesu mwan Bethany, phe ndhi yahaal khi Lazarus ntuhun. ² Mu shet sih kansihin nhi, yahal Marthja phi shin fe mu, ndangphe Lazarus a mey khinaar nyen ndhi muk nder Ndah Jesu. ³ Phe Mary mang mor ndhi khi tahaas mu ret-ret tir nkwak Ndah Jesu, yahal pwass khi shoop kha dhi. Dhikin lih fe di kirgiy. ⁴ Judas Iskarioti, la shiit khi Ndah Jesu, gwo ndhi phe seet khi nhi sat nna, ⁵ "A me lih ndhe mu seet khi mor tahaas sih ndanarri (shakal) nini yagurum khime khi saar yahal mu shin shahaal fe wu pia mu ma yeh? ⁶ Sat wini fe ba a phe ndhi nhi phi dem nyen wu pia mu ma, ndangphe a phe ndhi nhi a wat; nhi khi daam shakal wat yahal tong mwan wat bhut fe. ⁷ Ndah Jesu nna "Yit nhi del mbhi ndhi nhi lhi ni phe bhit wum fin. ⁸ Ghi phe wet nnaah wu pia mu nder sak. Ndangphe ghi phe wet nnaah an ma." ⁹ Asih mbhi khi vir/khisher gurum Yahuda mu man ndhi Ndah Jesu dhi, yahal mu ji, ndangphe mu nnah Lazarus duk, ndhi Jesu yahaal khi nhi khinaar nyen ndhi mu duwam gwe. ¹⁰ Nyen nan shiit Naan mu kaat peoh ndhe mu tii Lazarus ndhi duk. ¹¹ Nphe ndha a li ndhe gurum Yahuda mu bwer mu shinzeen Jesu dhi. ¹² Dhar fe mbhi gurum mu bwer mu wul phe Bhit Reetyit Yil, ndhi mu khiling Ndah Jesu phe wul. ¹³ Mu bhong shamurbong yahal mu mwan mu kaat nhi yahal mu wal khi dhikil, "Hosanna! Wuret khi kat gwo ndhi wul sim khi Nda Naan, Long khi Isrela." ¹⁴ Jesu kat nnham yahal tong khidel fe, khi phe dhe wu ri-ran. ¹⁵ "Yi nnok lughut, larep Zion, yi nnaah, Long khi waji sih, khi tong khidelguk nnham." ¹⁶ Jep lep khi muk mu man wuni nshe ma; ndangphe ndhi riin wuret mwan nder Jesu, mbhi mu leng khi mbhi fe ndhe, mu ran yahal bhi ndhe mu shin nhi. ¹⁷ Asih mbhi khi vir/khi sher gurum mu shin lanting ndhe yahaal khi Lazarus ntuhun. ¹⁸ A nphe ni fee ndhe khivir/khisher gurum mu mwan phe kat nhi, mbhi ndhi mu khiling bhi ap peoh ndhi shin. ¹⁹ Mbhi Farisa mu sat shak, "Gu nnaah, bha me mbhi ndhi gu shin, dhikin yil fe mwan nder muk gwe." ²⁰ Asih mbhi pak nyen Greece/"Greeks" mu phe mwan Bhit Retyit fe. ²¹ Mu mwan nder Filip, gu Bethsaida, khi yil Galilee yahal mu tal, "Ndah, mun phe dem nnaah Ndah Jesu." ²² Filip mwan sat Andrawus. Andrawus mu khi Filip yahal mu mwan sat Ndah Jesu. ²³ Jesu lap mu nna "Puus kha'a ndhe La Gurum nnaah ram khi Ndah Naan. ²⁴ A zen ndhe an mbhi sat gun, kat iih kipa phita yil ndhe muut ma, mbhi khi ndhe mbisat, ndangphe kat muut, mbhi khi lala. ²⁵ Gwo ndhe dem kha shin mbhi nhi phe kat wen, ndangphe gwo ndhe niyang kha shin khi dhikin yil shi mbhi kat seen tai-tai. ²⁶ Gwo ndhi nhi phe shin shiit, mbhi mwan nder nhi, phe ndhi a yadi mbhi mwan nder nhi, phe ndhi an dhi mbhi la lep fin dhi. Gwo nhi shin shin nnan mbhi Ndah nhi khi shin yon nni. ²⁷ Khidesi, na dahar mang an yahal an phe shin a mey eh? 'Ndah ghi baam an khidesi' Ndangphe a phe nhi ndhi a wul. ²⁸ Ndah Naan, ghi nin ram fi." Asih mbhi mey dhikil tong khiting sam yahal nna "Khi a shin ram fin nhi, yahal a shin ukwa nhi." ²⁹ Mbhi nvir/khisher gurum ndhi mu diram ndhi yahal mu khiling dhikil fe muna a naan. Pak ukwa muna a "mey gu lep khi Naan lap bhilip khi nhi." ³⁰ Nda Jesu lap yahal sat nna "Dhikil fe wul a nnan ma, ndangphe a phe gu. ³¹ Khidesi a bhit gap diyel khi dhikin yil shi. Khidesi, mu phe tahaat daskaham khi yilmu. ³² Mbhi kat a yit dhikin, phe a dil gurum mu duk-duk shin ji nder san. ³³ Sat ndhi sih a phe yarkam muut ndhi phe kat nhi. ³⁴ Gurum mu lap muna, "Mu dhiking bwaat waar ndhi Kristi khi wul phe tong wai-wai. Shinang ndhe ghi li mu nphe mang La Gurum shin kha khiting a? A wey a La Gurum fe yeh?" ³⁵ Ndah Jesu sat mu nna, "Phe wu sa'an nhi phe kudi ndeer gu dangsi le. Gu mwan khi phe wu saan, yak phe wu tib khi shi del kat gun. Gwo ndhi mwan phe wu tib mang phe ndhi jin ya dhi ma. ³⁶ Kat ghi khi phe mu saan, mbhi ghi shin zeen nhi, ndhe gun gu tong jep mu saan mu." Ndah Jesu sat mbhi sih mu phe yahal yit pe fe dhi mwan liham sar mu. ³⁷ Duk ndhi Ndah Jesu shin mbhi aap peoh mu bwer khi yit mu, phe mu niyang shinzeen nhi. ³⁸ Ndhe bhilip ndhi mu sat Isaiah wa ri dhi, phe ndhi nna, "Ndah, awey shinzen mbhi ndhi sat eh, yahal a wey ndhi mu nin saar Nda nhi yeh? ³⁹ Nphe ndhi asih, mbhi mu shinzen ma, phe ndhi Isaaiah shin sat nna, ⁴⁰ "Khi vuhuam yit mu, yahal bwat bhizung mu; kat ye asih ma mbhi ye mu nnaah khi yit, yahal mu man khi bhizung mu, yahal mu viling yahal an a dak mu." ⁴¹ Isaiah sat ndhi sih a phe ndhi nnaah ram khi Nda Jesu yahal bhilip-bhilip khi kha mu. ⁴² Ndangbe daskaham fe mu bwer mu shinzen Nda Jesu, ndangphe a sar Farisa mu, phe mu dem ma yakba mu shen dun lih Naan. ⁴³ Mu dem plang ndhi ji nder gurum met ndhi ji a nder Ndah Naan. ⁴⁴ Ndah Jesu wal khi orr yahal nna, "Gwo ndhi shinzen nan, shinzen a nnan det ma ndangphe a gwo ndhi lep an. ⁴⁵ Yahal gwo ndhi nnaah an nnaah a gwo ndhi lep an. ⁴⁶ A wul a phe saan sih khi dhikin yil, ndhe gwo ndhi shinzen an phe ndhe nkwo ma. ⁴⁷ Kat megwo khiling bhilip fin ndangphe ya ma, a tok diyel nhi ma, phe ndhi a wul a phe tok diyel ma khi dhikin yil ma ndangphe a phe bar yil fe. ⁴⁸ Gwo ndhi niyang an yahal lap bhilip fin ma, nhi khi gu tok diyel njin. Bhilip ndha a sat khi tok diyel bhit wu sihittis. ⁴⁹ Phe ndhi a lap bhilip a kwa san ma, ndangphe a Ndah ni ndhi lep an, ndhi shin nwaar kha mbhi ndha a sat yahal a bhilip. ⁵⁰ A man ndhi nwaar khi muk a mbhi seen wai-wai, a mbhi ndhi a sat - khipe ndhi Nda nhi sat nnan phe an a sat."