¹ Pe gyet di nshee de shee Naan den yil di bih a pwo/bhilip di. Pwo/bhilip fe a wukhime khi Naan. Pwo/bhilip fe a Naan. ² Pwo ndhi sih pegyet di a wukhime khi Naan. ³ Naan lih bi mwo a npe muk, kat khi Ni ma, bih ba mebi kihme ndhi mwo dak. ⁴ Nbut muk bi a seen, seen ndhi sih a ni ji khi peebang ngurum mwo dukduk. ⁵ Peebang fe bangpe nbut kwo, bi kwo fe khi muk sih koghorong nkaa ni ma. ⁶ Naan lep megwo ndhi sim muk a Jon(Yohanna). ⁷ Gwo ndhi ji a npe langting sih, de ni shin langting nkaa pebang, de ngurum mwo duk duk mwo shin zeen di. ⁸ Jon fe niya peebang ma, wul apee ni shin langting khikaa peebang di. ⁹ Peebang wu zeen-zeen, ndhi shin peebang ngurum mwo khiding, ni phi ji a ndighin yil. ¹⁰ Dok nih ndighin yil, mwo den yilsih a npee muk, bih yil fe man ni ma. ¹¹ Wul nder nyen min mwo, bih gurum kihmuk mwo lap ni ma. ¹² Dang bih duk duk nyen ndhi mwo lap nih, mwo shin zeen khikaa sim khimuk, bih shin bal mwo de a jep kih Naan mwo di. ¹³ Ba a kihbii ndhi mwo bee jep mwo ndighin shiitshin ndhi gurum mwo loghot kih nih ma, a pih Naan di. ¹⁴ Bhilip/pwo fe dee a gurum, bih yaghal gam kih wuret, kih zeen bih tong ndhighin mun gurum, mu naa wuyon khimuk, wuyon ndhi ni a mih laa wutaltwass mhi Nda muk, gam kih wuret kih zeen. ¹⁵ Jon shin langting nkhikaa muk bih yaghal wal kih dighil naa, "Ndhi sih a nih, ndhi a sham sat, "Gwon ndhi npee ji khidangkong nih met nnan, npee ndhi dok a ni dang dee shee an di." ¹⁶ A mpee yon khi wuret khimuk bi mu kat bii mun duk-duk kat bii mwo bwer, wuret khikaa wuret. ¹⁷ Mpee ndhi mwo shin waar fe a khi sar khi Musa. Wuret khi zeen a khisar Nda Jesu Kristi. ¹⁸ Ba mee gurum sham naa Naan ko lee, a laa khimuk ndhi kihmee, ndhi niya khipee Naan sih - ndhi tong nder Nda ni zak, a nih kampee Naan nmun. ¹⁹ Misih a langting khi Jon, parmeepuus bih nyen - nan-nan kih nyen Yahudi ndhi mwo nUrushalima, kih pris mwo ki Levai mwo, mwo mwan mwo tal phi Jon naa, "Ghi a we dangye? ²⁰ Bih ba Jon niyang lap fe mwo ma, bi yaghal lap dee ni satzeen di naa, "Ba a an a Kristi ma. ²¹ Bih shin mwo tal nder muk, "Bih ghi awee dangye? Ghi a Iliya mih? Bih sat naa, "an a ni ma," mwo yaghal sat naa, "Ghi a ngu sat bhilip sih woo? Bih lap mwo naa, "hai yo." ²² Bih shin mwo tal shipihmuk, "Ghi a wee, de nmun mwan mu sat nyen ndhi mwo lep mun diwoo? Ghi npee sat amee khikaa sak e? ²³ Bih sat naa, "An a dighil mii ngu yongpee ndem, ndhi sat naa, "Gu dak yar khi Nda Naan (khipee ndhi ngu sat bhilip Naan (Ishaya sat sih)." ²⁴ Kihdet sih mwo lep a pak nyen Farisi mwo. ²⁵ Bih tal shipihmuk mwo sat nni naa, "A mee lih dee ghi pih shin baptisma kat ghi a Kristi, ko a Iliya ko ngu sat bhilip Naan e? ²⁶ Jon lap tal naa, "A shin baptisma khi am. Dangbih megwo kih daar kihnargu ndhi gu man ni ma. ²⁷ A nii a gwo ndhi ji kidangkong nih, teng koghop khimuk bih wuret finih mak dee nan a fwon di ma, ²⁸ Bii sih mwo duk duk mwo shin a Bethany nkwang yit Kong Jordan, npee ndhi Jon pih baptisma di. ²⁹ Daa ni bih Jon naa Jesu khi waaji kus kih jin bih sat naa, "Gu naa, laatim khin Nda Naan wu mang shikbis yilsih shin baa: ³⁰ Mihsih a ni a gwo ndhi a sat ngun sihna, "Gwo ndhi mpee ji kihdangkong nih met nan yon, mpee ndhi a ni dangsih nnan." ³¹ A man ni ma, dee asih a mpee de ni niin shinii nIsaila sinna a an a wul bih an pih shin baptisma kih am. ³² Jon shin langting sat naa, "A naa riin kih Naan kih sam khitingnan kihpee laa bul sih, bih sam tong nkaa muk. ³³ Dangbih, a naa nih a man ma, bih gwo ndhi lep an mpee shin baptsima ngurum mwo nbut am sat nnan naa, "Gwo ndhi ghi naa riin wubang sam lang nkaa muk, bih a gwo fe ndhi ni mpee shin baptisma ngurum mwo khi riin wubang. ³⁴ An anaa, a shin langting zak ndhi gwosih a Laa Naan." ³⁵ Asih zak, bih dihdaar bih Jon nder jep lep fi ni mwo vil. ³⁶ Mwo naa Jesu pih mwan - mwan bih Jon sat naa, "Gu naa Laatim khi Naan." ³⁷ Jep lep wu vil sih mwo khiling ni pih sat bhilip sih bih yaghal mwo mwan nder Jesu. ³⁸ Dangbih Jesu viling yit naa mwo pih ji nder ni, bih sat mwo naa, "Gun pih dem amee? Mmwo lap sat naa, "Rabbi (Kat mwo pring bih pihshii bhilip fe a ngu Kam-kam) Lih fik/peetong fiik a nee ye? ³⁹ Jesu sat mwo naa, "Gu ji naa," Bih yaghal mwo ji naa pee ndhi kihtong di, mwo tongpak nder muk parpuus wuni, bih karfe feer shin gwe. ⁴⁰ Memee khinaar wu vil ndhi khiling Jon lap bhilip de yaghal mwan nder Jesu a Andarawus, emnighin Siman Bitrus. ⁴¹ A ni shee kat emnighin Simon bih sat nih naa, "Mu kat Messiah fe gwe" (Kat mwo pring: pishii fe a, "Kristi)." ⁴² Waaji ki ni nder Jesu, bih langyit kih del muk yaghal sat naa, "Ghi Siman Laa Jon, kidetsi mwo mpee yong ghi a Cephas {pihshii fee: Bitrus). ⁴³ Daar fe zak, Jesu pih dem yitmwo di dee mwan yaa nGalili, bih kat Filibus bih sat ni naa, "Ghi ji nder nih," ⁴⁴ Filibus fee tong a Bethsaida waji, a yil mih Andarawus ki Bitrus. ⁴⁵ Filibus kat Nathaniel, sat naa, "A ni ndhi Musa ran ran nbut warr khi nyen sat bhilip Naan, mu kat ni, Jesu Laa Yusufu nNazareth." ⁴⁶ Nathaniel sat nni naa, "Mee bii wuret kih put nNazareth a? Filibus sat nni," ji ghi naa." ⁴⁷ Jesu naa Nathaniel kih waaji kus kih ni bih sat kihkaa muk naa, "nGu Isarila, mih zeen - zeen ndhi ba kih sat mee dung ma, " ⁴⁸ Nathaniel sat naa, "Ghi shin a nang dee ghi man an diye? Jesu lap sat ni naa, "Dee shee Filibus yong pee ghi, ghi bider ting kon bih a naa ghi." ⁴⁹ Nathaniel lap sat, Rabbi, ghi a Laa Naan! Ghi a Miskaham Isarila!" ⁵⁰ Jesu lap sat nNathaniel, "A mpee ndhi a sat nghi, a naa ghi bider ting kon: ghi shin zeen a? Ghi mpee naa bii wu nan-nan mwo met ndhi sih. ⁵¹ Bih yaghal sat naa, "A zeen-zeen, a sat ngun, gun npee naa khitingnan a fung/wu - e - epp, yaghal gu naa jep lep ki Naan mwo pih sam nkaa Laa kih gurum."