¹ Jamis, kwaram khi Naan khi Nda Jesu Kristi, shin kam nder sehn gurum sar po/kha vhil ndhi mu shipeh-shipe: tal gun. ² Emnighin nih mu, kat bih kam-tughur mu shinih-shinih mu kat gun bhi gu mang a bih retnyit. ³ Gu man ndhi kam shinzen fuk khi ji khi moghor. ⁴ Yit nmoghor lat/gam shiit fhit dih, nphe deh ngun gu kat yon nnot tahkat dih, ndhi membih khi wen gun ma. ⁵ Dang bhi kat meh gwo nnaar gu wal nbih-man, yit nnih ɗang phi Naan, ndhi a ngu shin bih khiding nzughum ndhi khi biyal meh gwo ndhi tal ma, bhi khi shin nnih. ⁶ Dang bhi yit nnih tal a wu khime khi shinzen, nnot shin kot-kot nkha meh bih ma. Nphe ndhi meh gwo ndhi khi deh nkot-kot bhi nih a khipe am wu-biyal nkong si ndhi a kohom phi yaghal khi nih shin viling nih si. ⁷ Nphe ndhi tap ngwo wuni khi den no-ok nih ndhi jin nphe kat meh bih nder Nda Naan. ⁸ Nkaan gwo wuni a ngu bhizung vhil-vhil, nih khi den bhizung khipeh khime ma nbut bi fhin mu khiding. ⁹ Yit emnighim ngu shor shai khi phitighim fhin wu yon, ¹⁰ dang bhi ngu bihlong sam khi kha shin, nphe ndhi nih nphe del a khipe pel dem si. ¹¹ Nphe ndhi puus kat kha ban-ban bhi dem fe khi fii. Pel fe khi phi-tah, yaghal ret khi muk khi lat/tihkok. Shin a si duk, ngu bihlong khi tihkok nbut naar mwan fhinih. ¹² Wuret khi Naan khi kha gwo ndhi sih koghorong nkha kam khi sharfom. Nphe ndhi khidangkong ndhi kat sih kam fe, bhi khi lep zung khi seen, ndhi a wu di-den nniyen mu phi dem Naan. ¹³ Tap nmeh gurum mu kam nih khi nsi na, "A Naan kam a," nphe ndhi sharfom khi kam Naan ma, ma bhi nih shi khashin khi kam meh gwo ma. ¹⁴ Dang bhi mu khi kam a gwo ndhi phi tik bih-khiyil, ndhi khi dhil enn mu yaghal den tik nnih. ¹⁵ Bhi khidangkong ndhi kat leng bih-khiyil fe ji, bhi khi ji khi shikbis, yaghal shikbis kat yong duk-duk, bhi khi lah muut. ¹⁶ Emnighin nih ndhi a dem gun, tap mu khi gwam gun. ¹⁷ Duk-duk meh zughum wuret khi zughum wuret khiding tong a khiting. Tong a nder Nda mhi peh-bang mu. Khi nih bhi meh viling dih ma kot meh mhirin ndhi khi viling dih ma. ¹⁸ Naan mang deh beh mun khi bhilip mhi zen, deh nmun mu bor a jep wushe mhi bih mu khiding ndhi dak. ¹⁹ Gu man bihsi, emnighin nih mu wu di-dem: yit deh duk-duk gurum mu deh a niyen khiling bhilip la-la, ndhi khi leng deshe bhilip dih, yaghal ndhi tughurnung khi mang bir-bir ma. ²⁰ Nphe ndhi tughurnung gurum khi dak shiit wubang khi Naan ma. ²¹ Nphe ndhi a si gu bwak khi rap mhi shikbis khi yon khi shikbis. Nbut sam-khi-kha gu bhi gu lap bhilipnaan ndhi mu lep ngun, ndhi khi bar se'en gu. ²² Gu deh a niyen shin shiit khi bhilipnaan ndhi gu khiling ba a niyen khiling fe mu det ma, gu phi gwam suk. ²³ Nphe ndhi kat meh gwo a ngu khiling bhilipnaan det nnot shiit, bhi deh a khipe gwo ndhi phi naa yit nin det nnaarhin. ²⁴ Naa shin yaghal del bhi la-la bhi enn muk mhin ndhi kot ye jin anang eh oh. ²⁵ Dang bhi gwo ndhi lhi enn nih khikha waar wuret mhi kat bar, yaghal wet phi shin a si, ndhi a ngu khiling bhilipnaan ndhi enn mu khi mhin det ma, gwo wuni fe nphe kat wuret nbut bih ndhi jin phi shin fe. ²⁶ Kat meh gwo ndhi nna jin a ngu Naan, dang bhi man yaa liss/tap phinih ma, bhi nih bang dhin nbhizung nih, shin bhilipnaan khimuk a ban/nnot nphishi. ²⁷ Bhilipnaan wuret khi wubang a mhisi: ghi ba'am jep lhikha mu khi shorop ndhi dhas mu dwam nbut je'el/wula fut, yaghal yak ghi mulam sak khi shikbis khi dighinyil si.