¹ Par me Ɓitynak mǝn mwaan yaa lǝ me mǝgwu Farisiyawa npe sǝ nawe yi mǝn gurum mǝ lǝng yit naa nyi yi. ² Lat mǝn kat me dagwuo gǝ gok ǝdǝma. ³ Mǝn Yesu nang fu mǝpin man bi-tǝt nung Yahudawa gǝ Farisiyawa muop yong, "Mǝ nɗak mǝgwuo par Ɓitnyak ɓǝ ɗong a, ɗong mou yi?" ⁴ Mǝn mǝ ɗok kot. Lat mǝn Yesu yaa sar dagwo nanyi mǝn ɗak nyi. ⁵ Mǝn laa gǝ muop yong, "A wuɗa gǝnaar gu ɗǝ laa muup ko nǝng gǝfe npǝt-taa nɗǝgǝn dung am par Ɓitnyak ɓǝ mang bǝr mou yi?" ⁶ Mǝn mǝ ɓoot npǝ lap mou. ⁷ Yesu naa dat kat gurum muop wu mǝ duam muop hǝ mǝ tang pǝtugat wuret mǝn laa me ɓǝlǝp-kwoomkaa gǝ muop yong, ⁸ "Ɗǝ mǝgwu nduam gǝ npe bii-sǝ ɓǝ mwaan gǝ tang pee tong mǝnan mou, nook kot mǝ duam mǝgwu wu ma gǝ zak nnǝgǝn. ⁹ Gurum wu duam gun nau vǝl ji nwul mǝn nlaa gǝgǝ nyong 'Mwǝn pee ndagwu nhǝ', ɓǝ kaa yi gǝ waat gǝ waa gǝlap kǝ pǝtong tǝguk muop. ¹⁰ Dǝ mǝ nduam gǝ ɓǝ mwaan gǝ tong gǝpee wu lee, nook dagwu wu duam gun nwul bǝ laa gǝgǝ yong 'Shaar nǝ, yagal gǝ tong gǝ pee wu gagam.' Dǝ nkot kam ɓǝ gurum mup wu mǝ tugatɗok gǝpe gǝme gǝgǝ hǝ mǝ naa yoon agǝ. ¹¹ Nsa mǝgwu nmang kaa shik ɓǝ gǝ mǝ sam nyi, mǝgwu wu sam gǝ kaa shik ɓǝ gǝ mǝ mang nyi nlang. ¹² Yesu chin laa g dagwu wu duam nyi hǝ yong, "Dǝ gǝ ba dǝ yong duam gurum npe biisǝ, ɓǝ gǝ duam a mǝshaar gǝ mǝjepnang gǝ mǝmyaa gǝ, gǝ tǝlǝng lǝ agǝ dat mou, muop zak ya mǝ nduam gǝ mǝn mǝ nyawaap. ¹³ Ɗǝ gǝ chin bi-sǝ ɓǝ gǝ yong wupǝpyaa muop gǝ wukǝgǝl, gǝ wukut, gǝ wuvagham ¹⁴ ɓǝ Naan gǝ lang wuret kaa gǝ nsa muop gǝ mǝ ɓoot fu kwat gǝ mou. Nlat ɓǝ gǝ kat kopgǝshii gǝ par ɓit yigil gurum wuret muo ntughun." ¹⁵ Lat mǝn nde muop wu tongɗok fu sǝ gǝpe gǝme gǝYesu hǝ kǝlǝng ɓǝlǝpp nanyi mǝn laa gǝnyi yong, "Gurum wu pa gǝ sǝ nawe nǝgǝn yil-long nyi a kumsal." ¹⁶ Mǝn Yesu lap yong, " Me mǝgwu dok chirak sǝ gwet mǝn yong gurum gak. ¹⁷ Mǝ chirak sǝ nanyi lat mǝn lep laansar muup mwaan gǝ laa gǝ muop wudokduam muop hǝ yong 'Gu jya nsa mǝ sǝ nanyi nung gwe.' ¹⁸ Mǝn mǝ lǝngfu nkwǝt gǝ du wul mou. Gurum wu pel laa yong, 'A seet mar, a leng waar mwaan a naa yi. Kambok a langfu nǝmaan. ¹⁹ Nde yong, 'A sarap nǝng-mar paat, an npe mwaan gǝ kam muop. Kambok a langfu nǝmaan.' ²⁰ Nde dagwu yong, 'A lap mat; gǝ a ɓoot npe wul mou.' ²¹ Kurum nanyi waa gǝ laa gǝ miskagam gǝfe. Mǝn bǝt miskagam nanyi yal mǝn laa gǝ kurum gǝfe yong, 'Pǝt ɓǝr gǝ mwaan gǝ war gǝkang lǝ gǝ war kaam mǝn gǝ yong wupǝpya, muop gǝ wukut, gǝ wuvagham gǝ wu kǝgǝl muop.' ²² Kurum nanyi yong 'Miskagam, a chin bii wu gǝ laa nhǝ gwe mǝn pee chin kutnyi gwet.' ²³ Wupin lǝ nanyi laa gǝ kurum yong, 'Mwaan gǝ yaa gǝwar kaam mǝn gǝ laa gǝ gurm dip mǝ wul a leng waar, npe ɗǝ lǝ nanyi gam yi. ²⁴ A laa gǝgǝ, me muop wudok a duam muop pel hǝ gǝ cham sǝ gǝnǝ mou.'" ²⁵ Gurum wukǝrgǝi dok mǝ mwaan gǝder muup, mǝn bat laa gǝ muop yong, ²⁶ "Mǝgwu wu wul dǝr nǝ mǝn n-nyang nda muup, gǝ nǝgǝn muup, gǝ mat muup gǝ jep muup, gǝ mǝjepnǝgǝn muup daas gǝ surǝp gǝ nooklang gǝfe mou bǝ mak npe waa lagǝdǝr nǝ mou. ²⁷ Mǝgwu nmang shepɓeel gǝfe nlang gǝdǝr nǝ mou ɓǝ mak npǝ waa lagǝdǝr nǝ mou. ²⁸ A wuda gǝnaar gu ɗǝ nyi npe ɗyik mǝlǝng ɓǝ tong mǝn naa kagam shaghal gǝfe ɗǝng man yi nkwǝt gǝ lat ɓǝlang mou yi? ²⁹ Nang nkwǝt kam mou ɓǝ nɓuǝt kughur mǝn nɗyik lat mou ɓǝ muop wu mǝ naa hǝ gǝ mǝ zhal nyi ³⁰ mǝ nyong 'Gu naa dagwu wu ɓuǝt kughur lǝ mǝn nyang lat.' ³¹ A long me wuɗa gǝ kot npe mwaan lyak gǝ nde long ɓǝ tong ɗǝng nang ɓǝlǝp nkwǝt nyi wu gǝ daas kam sar gǝ ɓoot lyak long wu gǝ daas kam yagurum mou yi? ³² Ɗǝ nkat gǝ ji ɓoot mou ɓǝ lep gurum mwaan mǝ gapdǝr sojya gǝyil nde mǝ kutnyi njong mǝ tang tugat chagap. ³³ Gun zak a kam, mǝgwu nnyit biilong gǝfe dau mou ɓǝ gǝ kot a lagǝdǝr nǝ mou. ³⁴ Kǝgǝn a bii wuret, ɗe shang gǝfe nlat ɓǝ a me gǝ bat nyi waa kǝgǝn shizak yi? ³⁵ Nyi a bii kyen yil, ɗǝ kot yi a tung fǝp mou. A kon dat a wu lat nyi. Mǝgwu nkot gǝ kom ɓǝ kǝlǝng."