¹ Gǝdes hǝ chelem nin gǝpee wu saan nkwot pak gurum yong gǝ mǝ nit muat naduk de mǝmuat en muop a kǝ chelem fuanpee gǝ bii shee damuam, ² Nɗǝgǝn kwap waram, endye a muop warǝ npee wunian. ³ Yong gǝ mǝdǝn gurum dǝ lap shak de mǝ tangnkop dǝn muop dǝ sǝsǝ Naan ndung chin ndung a nung chindong dǝ muop wu muat naduk gǝ man ɓǝlǝp naduk hǝ. ⁴ Duk bii wu Naan miyap a wuret. Bii ndung mǝ lap a nung chindong hǝ a shee mǝ niang yi mou. ⁵ Nsa kat vang gwe shi ɓǝlǝp Naan de dang Naan. ⁶ Kat din gu ɗyedǝ mǝ emnǝgǝn gu, bǝ waa a laalep wukǝr nYesu kristi. Nsa gu kat miyap gwe shi ɓǝǝp Naan-naduk gǝ bii shee wuret gǝdǝ. ⁷ Gu nayong gu muan gǝdǝ waraam gǝyil ndung diduan surǝp muop mǝ dem a ni hǝ mou, nde a kam bǝ gu muat nee nsuk gǝdǝ muan gǝdǝ Naan. ⁸ Muat nee nshik ni gǝ la bǝpǝt, de a nung Naan bii a nung jepee dip. Bii yaa muatfu nung gǝyil gǝdeshǝ de ya nung shee wul. ⁹ Lep nhǝ a naduk duk bǝn a bii naduk dǝ lapdem. Dok a gǝdǝ ni mǝn mǝnfu nuaar yi gǝ bǝlang wu laa. ¹⁰ A nsani mǝ den enmu dǝ Naan gǝtǝng ndung ani taghat mǝn gurum ndung a gurum wu mut naduk muop hǝ. ¹¹ Gu laa gǝ dǝgǝt gu bǝbal gu bǝn gushee jepee muop nhǝ dip. ¹² Nayong mǝgwo nbak a bii ding a nǝgǝn ɓǝlǝp, gǝ yaashik, ɗempee, muat naduk ndung ninkwot gǝ rab dǝ mǝ muat naduk muop. ¹³ Gu chin gun fu kang wul anǝ, gu tang bii ran gu la ɓǝlǝp Naan a kǝ bii ndung gu she hǝ. ¹⁴ Nayong gu bak bii wu Naan muat ngun hǝ, dok muat ngun a laa lep gǝ lǝng sar nkǝ dǝduan muop. ¹⁵ Gu kang ke jepee muop nhǝ. Tughat nɗǝgǝn muop dewar kat pǝl agu de bii nayi dǝ gurum muop. ¹⁶ Gu den engu kǝ kang kǝsuk kǝ bii ndung gu shee hǝ. Gu yaa gu muan gǝni. Gu chin a kam bǝ, yong gu kat bǝ fat de muop ndung mǝ lǝngkom muop ngun.