¹ Ngha ifonor wereng ngor ibogor Caesarea, Cornelius ngor mbeny, nnogor aberr, ngor na mbor yolor kok ne igom ba nogor aberr Italian. ² Ajolor nenom nyor fonor atama, ne neyor fonor ubol Ishor, ne nep yer wa, bak ane abodo, fenghe jom ndor fel igara. ³ Nyor igara nti nkaranka irumugol ber shang, na kpol aba nyen nremer, na nrogitom Ishor mer ba, bagor tober, nrogitom ba bong nene, "Cornelius!". ⁴ Cornelius ba bree nrogitom kpo-o, fenghe ba fun ubol, ba bong "Ba jom ngha Ada? Nrogitom ba bong nene, Ndor ya ne nkaga ya, ibe tum ngor iborr na ikaga nyi ka kpelor nyene ngor ushemerr Ishor. ⁵ Ngha ntega tom ane shong ngor ibugor Joppa, nogor mbor ji kor nenom nyor mbor kokga Simon, fenghe kpe kok Peter. ⁶ Anen ne nrega abodo nyor nyenor ne Simon, wer nji itaba je reror ngor nkpa alep." ⁷ igara nti nrogitom nyor bonghor nene ber tum, Cornelius ba kok ba leme ifangha ber ishi-ibal, ne nne ishojar nyor kpelor ntama ngho igom ane ba iyor lem ifangha nene. ⁸ Cornelius, ba tak bor nya waa nya iber jol ba tom bor tum ngor Joppa. ⁹ Ngha ngor ntem ufunfo ngor igara nkarenka irara na mbor jolor ngor ijen mbor, mbor ber regor kolor ibugor fonor, Peter tumor ji gor iborr itaba-nogor aji jom ndor. ¹⁰ Ngha igara ntor njal ba yame, ayol sheber ijom nji aba lege, ijolor igara nti mbor yolor lam ajom ilili. Mbor teber nramer. ¹¹ Aba nyen iborr iber reber, ijom na nkpokpo, imer bodor ngor iborr ba ijom na igboro mbomor ijom nongha, iyolor budor ba ndege, ba yemer ne agok ye ani. ¹² Ngho ateng ijol akpede nyam ne ikpada ini ne abodo nya iyor gboro ngor ndege ne arok ngor iborr. ¹³ Ngha ilom iba bong nene, tum yeme. ¹⁴ Peter, nogor ayol li. Peter ba bong, nor shang Ntol, tep ne nan mer ka li ijom jendegedege ji ikpelor nden afi ika wellor. ¹⁵ Ilom ite kpe yor ba tobe ngor igbo-bolo-ibal ijom nji Ishor be lem welewele, wor anem ba koko ne ijom nden. ¹⁶ Nta ibala ba jol nkpel ira; Igara ntor nkpokpo fonor, ngho idulidulor itumo fenghe ji ngor iborr. ¹⁷ Ngha igara ntiPeter jolor ne nshumor tugor gara ne nyemer nyi aber nyen ijom nji ijogor, kono nterr ane ba Cornelius tomor bor, iyemor ngba nbob, igara nti mbor beb mbarr yel ngor ateng itek. ¹⁸ Mbor ba kok ba beb njolor Simon wer nji mbor ba koge ne Peter, njolor areror ngho. ¹⁹ Igara ti Petertegor kpe yor yubor gara ne nremor fonor, ufu iba bong nene, Bree anepnom ara ikpela sheber. Tum yemer, abalor nogor aba shong ²⁰ nebor ka ten wom ber afarem nebor, tep ne na mer yor mbebor tum. ²¹ Noyor Peter bodor tum ngor idi aneplom fonor ba bong. "Mer yor ngha wer won mer shep." Nan iwedor won ber ba? ²² Mbor ba bong, Nne nkol ishoja wer mbor koge ne Cornelius, inonb ne, ne nneyor kpelor ubol Ishor, fefene nnobor yer mbor bong gara ngor abon abugor nya ngor Jews waa. Mbor kale tum ngor idi Ishor sheng gor idi inonob nrogitom ba toro ber nogro mbor tum tuga aba ngor itek je iyor nji aba rangha atong ngor itum nti iruror ngor idija. ²³ Fefene Peter ba kok bor kak ngor ateng nogor mbor ji bemer nene, Ntem ufunfo uba tum yeme, ka tonor bor tum, ngah ba mgbanyen ber bandege ngor Joopa iba turner. ²⁴ Ntem ufunfo, mbor ba yor bagor Caesarea. Cornelius yol yor sheke bor . Igara ntor abe kok nepye waa kornashi ne atem ber waa. ²⁵ Ibala ba jo, igara nti Peter ber yel, Cornelius ba korne, ba gbor kumor arung ngho akpada ye, nogor atege. ²⁶ Peter ba fele tum yeme, ba bong. "Tum yeme, mer fefene nne yor." ^{29 27} Iga nti Peter yolor bong nene, aba sheng yel wana ane na feb, iber kornashi. ²⁸ Aba bong nebor, "Wor, wor fonor, nyi won na ika reror ibene nogor nenom Jewish shomor ne ane mbagor afi aji nyen njem ne, tep ne nan Ishor ber mer tap mber nti yor kok nnendegedege ne, nne nden ne nne yor ka wellor. ²⁹ Nnoyor iwedor mbalor nka raror igara nti mbor kogor mer. Ngha ntega mer mba beb nan iwedor ka atomor kok mer.? ³⁰ Cornelius ba bong, atu ani ibe sheng nya mboro igara nya pii, nyol yor jom ndor ngor igara nkaranka irumuigol ngor itaba jama, mba nyen nnenom yemor mer ngor mbok, ne ababara abodo. ³¹ Aba bong Cornelius, ndor ya, Ishor bu yok, fefene nkaga ya ber boro Ishor guma. ³² Tep ne nor tom nne shong ngor Joppa, nogor mbor kok ne ka we mbor koge Simon wer mbor koge ne Peter, nkpe nene ngor itek nrege abodo, mbor koge Simon ngor nkpa aya, igara ti abalor aba bongho nena. ³³ Fefene, ngor nkpel nyeren ntom tuga, Ajol tere, aba tega worr waa ure ngha, ngor nkpa Ishor nogor uyor ijom njendegedege nji Ishor ba tak ber abong. ³⁴ Ngha Peter ba reber nyor ba bong, "Tembaga. mer ber renghe mer ne Ishor kpem irangrangha. ³⁵ Ngha ire mber ngor feli ibugor, nnedegedege nyor fonor ubol ber, fenghe lam ateng-tenghe abaga nya ngor ntama yer. ³⁶ Wor ayi-nyi itum nti atomor tugor anep Isreal igara nti atoro anonob alom, gara ne terre shang ngor Jesu Christy, wer reror Ntol ka waa. ³⁷ Wor, wor forn ayinyi abaga nya ijolor, nya iyor-lor jol fel-igara waa ngor Judea yege itulor ngor Galilee, na John balor ben ibaga uwuror alep. ³⁸ Abaga nya ijolor gara Jesu ne Nazareth, na ishor yege iya ne inonob ufu ne ikor, aba tum yor shebe yor lam anonob fenghe yor lam ane inonob. mba nem nero bor kak tap ne Ishor jolor nene. ³⁹ Wurr ujoloratenshe ka abodo waa nya Jesu lemor ngor nfam Jewish negor Jerusalem. Mbor yole shangh ngor nkpada ite. ⁴⁰ Ngho Ishor nyemer jok ngor itegela ngor atu ara, fenghe lem nogor mbor nyener, ⁴¹ Ijolem ka ane wa, ijolor ka atenshe ba Ishor yegor bor kon igara, ne wor mba ulelor fenghe war nene ngor igara nti ayemor ngor iku. ⁴² Akala wurr ikor nogor utoro alom ka ane fenghe yor tep na ireror wer fonor wer Ishor ber yege, nogor alam ane mba ngor ikpen ne mba ibe kpor. ⁴³ Ire ngho kea na ba yene amerr waa utoro gara, iyor nji fel ne nyor tamor tuge iba fonor mbaga ngor abebage shang ngor mbeng yer. ⁴⁴ Igara nti Peter mer kpe bong abodo nyangha, inonob ufu iba bob, mbo waa mba iyolor rangha aton ngor itom ter. ⁴⁵ Ane mba ishumor ngor ijuje ane mba iyagor nyi Ishor waa ne mba ibalor ne Peter, ikor iba tanbor tep nkaga inonob ufu yol nala jok woro fefene ne anep Gentiles. ⁴⁶ Tep ne mbor yogo anep Gentiles imer bong ngor abugor nya gor, yor tek Ishor, ngha Peter ba fangha. ⁴⁷ Nnendegedege mal ba ibomo alep shaga ane, mba, iyor nji mbor tiba woror alep.Ane mbangha mba ibe kor inonob ufu fefenena wor.? ⁴⁸ Ngha aba ka ikor ka bor mbe mbor wuror alep ngor mbeng Jeus Christy. Ngha mbor ba beber ber ajol nebor ngor atu feb.