¹ من عند يهوذا, عبد يسوع المسيح, وخو يعقوب, للي دعاهم و قدسهم في الله الاب, و اللي محفوظين ليسوع المسيح: ² عليكم تفيض الرحمة و السلام و المحبة. المعصية تاع لشرارو الدينونة اللي راح تجي عليهم ³ يا لحباب, راني متشوق نكتب لكم على الخلاص اللي احنا متشاركين فيه, و لقيت بلي لازم نكتب لكم و نشجعكم باه تجاهدوا في سبيل الايمان اللي تسلموه القديسين كامل. ⁴ على خاطر دخلوا في وسطنا ناس فجَّار, قلبوا النعمة دعارة, و ينكروا سيدنا و ربنا الواحد يسوع المسيح, و هاذما اللي العقاب تاعهم مكتوب من بكري ⁵ نحب نفكركم, حتى اذا كنتوا تعرفوا هاذا الشيء كامل, باللي الله بعدما خرج الشعب من ارض مصر, فنى هاذوك اللي ما امنوش. ⁶ و حتى لملايكات اللي ما حافظوش على المكانة تاعهم, و تخلاو على المقام تاعهم خلاهم مقيدين بسلاسل دايمة في اعماق الظلام باه يحاسبهم نهار لحساب لكبير. ⁷ و ثاني حتى سدوم و عمورة و المدن اللي مجاورتهم, نالوا عذاب النار اللي ما تطفاش, و ولاو مثال لغيرهم, على خاطر تبعوا الدعارة و الشهوات اللي تخالف الطبيعة. ⁸ و حتى هاذوك, الشهوانيين, اللي ينجسوا البدن, و يحقروا السيادة تاع الله, و يهينوا الكاينات المجيدة. ⁹ و ميخاييل و حتى هو الرايس تاع الملايكة, نهار اللي تخاصم مع ابليس و تناقش معاه على جال الجثة تاع موسى, ما تجرأش باه يقول عليه كلمة خايبة , وقال لو: "ربي هو اللي يتولاك!" . ¹⁰ واما هاذوك راهم يهينوا في حوايج ما يعرفوهاش. بالصح لحوايج اللي يعرفوها بالغريزة, كي الحيوانات البكمة, هاذيك اللي فيها يفسدوا. ¹¹ يا ويلهم! على خاطر جابوا طريق قايين, و تبعوا الضلال تاع بلعام داهم الطمع, و هلكوا ارواحهم بالعصيان كيما هلك قورح. ¹² همَّا عار في وسط المحفل كي يتلموا مع خاوتهم, يعملوا في الولايم مع بعضاهم بلا ما يخافوا, يسمنوا في ارواحهم. هما غيمة بلا نو تسوقها لرياح. و شِجر تاع لخريف ما فيها فاكية ميتة و معاودة, مقلعة من عروقها. ¹³ هما امواج هايجة ومزبدة بعارهم. نجوم تايهة مصيرها الظلام الدامس للابد. ¹⁴ و قال عليهم اخنوخ سابع جد بعد ادم: " شوفوا ربي جا مع الوف القديسين تاعو, ¹⁵ باه يحاسب الناس الكل, و يعاقب الفاجرين على الفجور اللي عملوه, و على كل كلمة خايبة قالوها الاشرار عليه". ¹⁶ اللي يتذمروا و يشكِيو , و يتبعوا في هواهم, و يقولوا بفمهم كلام فارغ, يبدلوا في لوجوه على جال مصلحتهم. تشجيع على المثابرة ¹⁷ اما انتوما يا لحباب, اتفكروا لقوال اللي قالوها لكم قبل الرسل تاع ربنا يسوع المسيح. ¹⁸ كي قالوا لكم: "في اخر الزمان راح يجيو جماعة مستهزيين, ماشيين بحساب الشهوات الخبيثة تاعهم". ¹⁹ هاذوك هما اللي يحبوا يفرقوا ارواحهم على لخرين, يمشيو بالغريزة و بلا روح. ²⁰ بالصح انتوما يا لحباب, ابنيو ارواحكم على الايمان الاقدس, و صليو في الروح القدس, ²¹ و صونوا ارواحكم في لمحبة تاع الله, و استناو الرحمة تاع ربنا يسوع المسيح على جال لحياة الدايمة. ²² كاين وحايد مترددين حنوا عليهم و ارحموهم, ²³ و كاين وحايد في النار بخوف منْعوهم و اخطفوهم منها, بالصح حتى القش المنجس باجسادهم ابغضوه. تسبيح ²⁴ و اللي قادر باه يحفظكم بلا ما تتدعثروا, و يوقفكم قدام المجد تاعو و انتوما فرحانين ما يعيبكم حتى شيء, ²⁵ الاله الحكيم الواحد المخلص تاعنا يسوع المسيح, ليه المجد و الجلال و القدرة و السلطان, ضرك و على مر الدهور الكل. امين.