¹ Cware Saure karukushi shitabera indi kufumbera indi kubbura bayaaya bashikati; amarukwenda ku mupresita yo mukuru. ² Akali kuringira kwi kuke moñoro ukwenda nango mu sinagoge inga ko Damasika; atikya atikashangana babamwe iwituto yopa, nanga banyana kapa bakazi, abashimine, abalyetye mona Jerusalema. ³ Pwakarashina mwinjira, ati akushira kwenda ko Damasika, akuyerwa kurumyeni irwati menika, ilyatidzwa kuldiiro, lyalikumubika popakati. ⁴ Akuwulya popeshi, cware akuyuvwa ldii ilyati muzira, ilyatikya: Saure, Saure, shikya matindi shandisiza ? ⁵ Saure akutikya: wendiyani Shikati? Shikati akutikya: mendi Jeso yimatishandisa. ⁶ Cware tambuka, unjene mumuzi, mbuziruwemo shimati swanera kuhweta. ⁷ Bwakali kwenda nawo, barayimine ba bbemuka; shukutikya batayuvwa ldii pulyaruku hwetuwa, cware yemwa bamwene umutu. ⁸ Cware Saure akutambuka pumuvu, ati akulyaya, akushitira kumwana umutu; barukumu pata kulyanja, barukumutwara mo Damasika. ⁹ Akalikusikamamo maiba atatu yemwa akumwana; yemwalye kapa kunwa icimwe. ¹⁰ cware kwarana muyaaya mo Damasika, akarukuberuwa sha Aneniyasi. Shikati akumuzira kuturo atikya, Aneniyasi. yeye katikya: meyini, Shikati. ¹¹ Shikati katikya kuke: yima, yenda mwinjira wumuzi iyatiberuwa ishiyama; ukashake mwinjuwo aJuda, umutu imatiberuwa Saure, ywakwa Tarese. shukutikya matikambira; ¹² indiye mamonu mwipono munyana imatiberuwa sha Aneniyasi matinjena, akumubika manja puldiiro, atikya amwene hape ¹³ Cware aneniyasi akwitaba, akutikya: Shikati, ndayuvu kuba benji zitaba zumunyana yopa, mwamatashandisiza barumeri we shuwubbi mona Jerusalema. ¹⁴ indi pukarukuya kuni kutikya matapuwa iqhumu kuba bapresiti babakuru, ingukushimina kowo ibatikambira shildiina lye. ¹⁵ Cware Shikati akali kutikya: ukwenda ,shukutikya umutu yopa shibberikiso shindanda likitira kutwara lddiina lyanga Mumavu, indiku Mashikati, indikwa Abana ba Isirayere. ¹⁶ mu lyemuse wukuru wuwutuku wisha swanera kuyuvwa, shilibaka ldii ldiina lyanga. ¹⁷ Papangaho Aneniyasi amarukwenda; ati akunjena mwinjuwo, akumubika manja pu ldiiro, akutikya: Saure, muzatanga, Shikati manditumu, yeye Jeso imatalyumwenisa kuwe mwinjira mumata yera, atikya umwene hape, indikutikya uyire Mupupo Omucena. ¹⁸ Papangaho, izuto izatifwana tandi makumbo zaku dzwa mwamesho akye; katimwana hape.papa akalikuima, kati nwengiswa. ¹⁹ papa katilya zulyuwa , papa kugqi kwakushushira kukye. akarukusikama ni bayaaya mo Damasika shamayiba ngangamwe. ²⁰ Papangaho katihweta sha Jeso mona sinagoge, katihweta shakye Mwana Urezha. ²¹ Ibarukumu yuvwa kowo kabatikya: umutu yopa, kakutikya, yeye ndikaruku shandisa nanyina ibaruku kambira ldiina lyopa mona Jerusalema? tindipwamaya kopani, kuya kubashimina katibatwara ku ba presita babakuru. ²² Cware Saure akugqisa nanyina, atikwa kwama Majuda ibatara zdini mo Damasika, shukumenisa atikya Jeso ndiye Keresiti. ²³ Atikwakukita maiba Ngamanji , kabati yanakana kumubbura. ²⁴ Cware Saure akuchakesizwa muhupuro awo. batamushangena pumumbero umuzi, mushikati indi masuku, atikya bamu bbure. ²⁵ Cware bayaaya bakumuisa masuku ngabati mushonisa mokuru kwaka rumuzi, kabatika mubika popeshi mushitanda. ²⁶ Saure ati akuya mona Jerusalema akali kulika kushangana niba yaaya; cware barumuyupa kowo, bahati tishira atikya muyaaywa. ²⁷ Barnabasi akuyisa Saure , akumutwa kuba Apositara, akatibazira shamatamwana Shikati mwinjira, indi mwamata hwetira nakye, indi mwamata hwetira ldiina shiwugqi mona Damasika shildiina lya Jeso. ²⁸ Amaruku shangana nawo mona Jerusalema, ati akunjena, akudzwa katihweta ldiina lya Shikati Jeso ahaywapa ichimwe. ²⁹ Akuyarumuna ni Majuda iwa Magerike; cware wowo barukufumbera kumubbura. ³⁰ Bayaaywa atibaku yuvwa akyopa, kabatyenda nakye ko Sesariya; ndipubaku mufundura kwenda ko Tarese. ³¹ Cware kereke zarana nuwuqha mona Judeya komo, indi mo Galileya, indi mona Samariya mushibaka ishaku ldiiro; kabatyenda shukuywapa kwa Shikati, kazitikura shi Mupupo Omucena zikereke kazikura. ³² Pitorosi pwakaru kupwetira zibaka kozo una, katiya indi kubarumeri ibatara dzini mo Lida. ³³ Akatishangana mo munyana imatiberuwa Enea, uranzxire pumumbeta shuwutuku wuzimwaka ze 8; kali mukukutira mubiri. ³⁴ Pitorosi katikya kukye: Enea, Jeso Kresiti matiku pwelisa; tambuka, yarura marangaro ngwe. akatiyima katitambuka. ³⁵ Ibataradzini mo Lida koko indiko Saroni ,ba kumu mwana, ba kuzoromushira ku Shikati. ³⁶ Mo Jopa kwararana murutiwa i ldiina , ldia Dabita,a kutikya , i Dokasi, murwakazi yopa i kara kwisi mibberiko i miqha, i minji indi zituso. ³⁷ Mu ma yiba ngapa, a ku patuwa kuwutuku, a kufwa.Pubara kumu ywesa, ba ku mumbika mwinjuwo iya kuliro. ³⁸ kakuti Lida indi Jopa zararana shifupi,barutiwa ba ku yubwa akya Pitorosi ku karana , ba kutumina barume ba viri kokukye, kuka murungira akya asiye kuliyeha , kuya kokutswe. ³⁹ Pitorosi a kutambuka akwenda nawo. Pukara kaya,ba kumulyeta mwinjuwo iya kuldiiro, barwakazi ba bafwera kowo ,bakuya kokukye,aka bati lira,ba kumwiqhe zidzato zikara kubara samina Dokasi, pu kara shina nawo. ⁴⁰ Pitorosi a ku bagusiza popenje kowo, cware a kudzita shama dzi, a ku kambira ,a ku zoromushira ku mumbiri, a kuti kya Dabita tambuka , Tabita aku liya; pukara kumwna Pitorosi, a ku sikama. ⁴¹ Pitorosi a ku mupata kulianja, a muyimika; a kubera barumeli indi barwakazi i bata fwerwa,a ku bapa ye nali muyimi nangweza. ⁴² Shihweta copa sha ku yibuwa mu muzi iwa Jopa koyo; ildinji lia ku tishira ko ku Shikati. ⁴³ Pitorosi a ku sikama mayiba nga menji,kara sise ku murume ikara ku beruwa Simoni, mu shuwisi u zikatana.