¹ Mupirisita yomukuru akutikya, zopa,iziniti? ² Setefani akutikya nweba kwanga indinwe batatye, kani rakeke kuni kukome,Urezha yu kanya matali mwanahaza ko ku shukuretu Abrahama, pwamarana ko Mosopotamia, pwahara cire ka sikama ko Karani kare; ³ akutikya dzwa moku ldiivu lywe, uyendye muldiivu lindata kwi hqe ⁴ Akudzwa muldiivu lya Makaradeya, akali kukara ndzini mo karani. atishe aku amana kufwa, Urezha akali kumugusa mo, akali kumulyeta mu ldiivu mwamata radzini cware. ⁵ Yemwa mupe ichimwemo tananga shibaka shoshince Abrahama ishatilikana nuku lyata Shulyukondo, akumu sepisa atikya ishamupeyo, iraqho shutsuwa shake indi bana baba yukuru bake. ⁶ Urezha mata muzira atikya, bayukuru bake ishaba kakweze muldiivu lyi rwezi, barasuwa wubbi shizilimo izatilikana 4.00. ⁷ cware shicaba shini ishashiba bike mu wuvuya, ishandi shiyature, kwati hweta urezha, pwisha kwaku mana zopa, ishaba dzwemo, ishebaye kundi sebereza mu shibaka chopani. ⁸ cware Urezha akaliku pa Abrahama wumbiya iwu mupato, cware Abrahama akali kupaka Isaka, akali kumutwara kumupato mwi ldiiba lyu wu 8; Isaka akupaka Jakowo cware akali kumwisi akyopa; Jakowo akali kupaka ba Pirisita wulikumi ni wuyiri inddi wo barukwisiwa akyo. ⁹ Ba patriareka bakufwera Josefa muna baliku muwulisa atikya atoruwe ko Egepita, cware Urezha akuba nake. ¹⁰ Akali kumuyaka moku mashando ake komo, akali kumupa kumwanahara naqa indi wuchuldi. pu wuso wa Faro Shikati ywa Egepita; yopa akali kumubika imatiwusa mo Egepita indi iwi njuwo ake kowo. ¹¹ kwali kuya injara muldiivu lya Egepita kolyo indi ko kanana, kwali kuba kulyangana koku kuru, tabashukuru bake batarakini shukulya. ¹² Jakobo ywa Isirayere akali kuyuvwa atikya zulyuwa zina ko Egepita, akali kutumako bakuru bake, shukutanga . ¹³ iruwuyiri Josefa barukumuiba bakwake; cware Faro akali kuziruwa zabakwa Josefa. Josefa ndupukali kutumina she Jakowo. ¹⁴ Josefa akali kutumina kukaisa she Jakowo indi bakwake kowo, kali abato ibatiwaruwa sha 75 bakushangana kowo. ¹⁵ Jakowo akali kwenda ko Egepita, kwamata kafwera indi bashukuru betu kowo. ¹⁶ Zutupu zawo zarukutorwa ko Sikemi, zarukabikuwa mu libita lya Abrahama, lyamata wura shamarwapa kwa bana ba Hamore ywa ko Sikemi. ¹⁷ Ati inako yakushera, i yatasepisuwa Abrahama ku Urezha, shicaba sharuku kura ngabatizira mo Egepita. ¹⁸ takwa rukuyolisuwa Shikati yuyumwe mo Egepita, yuhara yizire Josefa. ¹⁹ Faro yopa amali kwisi mushowo etu shiwu wuchuldi wowubbi; matashandisa bashukuru betu,amaruku shandisa abana betu atikya basiye kuyinjipa nanyina. ²⁰ Cware Mushe amaruku pakuwa mwinako yopana, akali kuba munyana yomuqha yu Urezha, akali kunxyaminisuwa imezi itatu mwi njuwo ashe. ²¹ Mwi nako iyukufwa, mwana Faro yomukazi akali kumutwara, akuliyiseza ye atikya abe mwanake. ²² Mushe akurutuwa wuchuldi kowo mo Egepita; ana ni wugqi mukuhweta indi mukwisi. ²³ ati akuba ni zimwaka zamakumi annee ukupakuwa, mutima ake warukushaka kwenda kuka mwana bakwake, abana ba Isirayere. ²⁴ akali kushangana uyumwe ywa bakwake matisiwa wubbi; akali kumurwena, akali kumuyaka shukubbura mu Egepita. ²⁵ kali kuyanakana atikya abana babakwake batikwana kuyuvusisa atikya lyanja lyu Urezha lyatikwana kubayaka. cware yemwa bayuvusise. ²⁶ Atilyakuca akushangana babamwe ma Isirayera batirwana; amali kubayereza atikya basiye kurwana,akutikya, nwe banyana nabato ba panxiki shikya punatilisi wubbi.? ²⁷ imarikwisi umbake wubbi, akali kuyarumuna katikya, iyani imakupi wushikati indi kutiyatura?. ²⁸ kutikya matishaka kundi bbura, tandi shimata bbura mu Egepita?. ²⁹ Shildii lyopa Mushe akali kuywapa, akali kutira muldiivu lya Midiyani, cware akali kukaba na bana bayiri mo. ³⁰ Atikwa kuya zumwaka za makumi annee, linyiroyi lyu ngaliti muyera mwishimwe pulyurundu lya Sinayi, murulime lyushuvuna ishali kunxowuka. ³¹ Mushe ati akumwana akyopa, katikomoka sheshama monu, amarukutikya ashere amwenisise, ldii lyu Shikati lyarukuhweta kuke,atikya. ³² Mendi Urezha aba shukuruwe, Urezha ywa Abrahama indi ywa Isaka Indi ywa Jakowo, papa Mushe katiywapa kulyaya. ³³ Shikati akutikya cutura zishangu zwe kumakondo, shukutikya shibaka shuna paco muvu omucena. ³⁴ ndalyaya, mindamonu mashando abato banga mo Egepita, ndayuvu ku bbiraera kwawo, cware ndatsurumuka kuya kuba yaka, ukuya ndukutumwe ko Egepita. ³⁵ Mushe yibata nyaza, atikya iyani imata kubika wushikati indi kutiyatura? ndiya mata bika Urezha shikati indi muyaki awo, shilyanja ldii linyiroyi ilyataya ku Mushe mushivuna. ³⁶ Ndiye imataba dzisa mo Egepita. akali kwisi zimakazo indi zatikomokisa mo Egepita, indi Mumawate ngama nxwa indi mwishimwe, shizilimo za makumi annee. ³⁷ Mushe yopa ndimatazira abana ba Isirayere, atikya Shikati Urezha enu ishanipe muporofita popakati lyenu, imatifwana name; yeye ishanimuyuvwe. ³⁸ Yeye ndumu murume mwishimwe, yeye ikarana ni linyiroyi pulyarana nake pulirundu lya Sinayi, ana niba shukuru betu; akatambura maldii ingati palisa, atikya atipengo. ³⁹ cware bashukuru betu barukushita kumuyuvwa; baruku munyaza kabatishwishira mo Egepita shimeyo awo. ⁴⁰ kabatikya ku Aruni; tipanjira mlimo ikakuti kitira kuwuso; shukutikya Mushe, imatakati dzisa mo Egepita, katiyizire ishamuyeri. ⁴¹ Moku mayiba ngapa barukupanga unamani; shishiswaniso kyopa, bakushipanjira shitabero; bakutabera mubberiko amanja awo. ⁴² Cware papa Urezha akubavutatira, akali kubasiya kubberishira uwunji wuldiiro; tandishi kwata ñoruwa mwiwuka umuporofita , atikya; yenwe iwi njuwo a Isirayere, kutikya natandi lyetiza zuñombe indi matabero shizimwaka za makumi annee m wishimwe indi mwinjuwo AIsiraere? ⁴³ Yemwa,kono nataseka i tebernakere yu Moroke,indi inyata shikati Remufani, kakuli maswaniso ngumata, kunga kubamera: shilibaka lyopa ishandini zirisize koshire,mokyo lya Babbirona. ⁴⁴ Bashukuru betu barana itabernakara iyu wupaki mwi shumwe, mwamata hwetira Urezha yeye ikaru kuhweta ni Mushe mwishumwe; akutikya, ayisi shukufwenisa shamata mwana. ⁴⁵ ndi ntente ibashukuru betu bataipuwo, barukuibika mwabato wamata hindika Urezha, puwuso wawo, barana ni Joshuwa; akali kusikama mwi lildiivu kutwara kumayiba a Davida, ⁴⁶ Akali kumwana shishemo shu Urezha,akali kuringira atikya ashashira urezha ywa Jakowo injuwo. ⁴⁷ Cware Soromoni ndimata mwi ndzinimina injuwo. ⁴⁸ Nanga ndipakyo ,yeye ywaku ldiiro yemwa kusikama mu Mayuwo Ngama panguwa sha manja; ndishamata hweta muporofita atikya; ⁴⁹ ldiiro rumeni rwanga, ta ldiivu malyaturo amakondo anga, injuwo yinakundi panjira injangahare? kwatihweta Urezha; tashibaka shuku tsutsuruka shanga nidicire? ⁵⁰ Kakutikya lyanja lyanga ndilyata zisi? ⁵¹ Yenwe abato wi meyo iyahayuvu, inaha bika mitima indi mati enu mumupato, naticikisa Mupupo Omuhqa, shibasire bashukuru benu ikani sire indinwe. ⁵² Iyire muporofita ibasukuru benu bahata shandisa? bata bbura tindi ibatahweta katanzii atikya Ishakuya Yomushiyama, mipani, yo inwe namubeteki ,inwe nata bbura babake. ⁵³ Nwe inata tambura murawo shi seberezo amanyiroyi, hape yemwa ni wumamere. ⁵⁴ Atibaku yuvwa zitaba zopo, bakuli gya moni mitima awo, balikuli tumera yeye Setefani. ⁵⁵ Karayire Mupupo Omuqha, akulyaya kwi ldiiro akumwa ikanya Urezha indi Jeso uyimine kulyanja lyu Ureza. ⁵⁶ Setefani akutikya ndatimwana ldiiro liyazuka, mi Mwana mutu uyimine ku iyanja lyashe Urezha''. ⁵⁷ Cware baruku kalisa kushupura, baruku gisa kumati, baruku shangana panxiki. ⁵⁸ barukumu kweshira kwinje lyumuzi, barukuzipa shamawe, zipaki zarukubika ziraro zawo popeshi, pumakondo umurumbwana ikarukuberuwa sha Saure. ⁵⁹ Atibaku dzwera kuwuso kumuzipa shamawe, Setefani aliku kambira, akutikya Shikati Jeso cinjra Mupupo anga, ⁶⁰ Ndipapa katikubama, akushupura shildii lyolyukuru, katitikya, Shikati usiye kubabera shibe chini! ati akumana kuhweta akyopa katirangara.