¹ Pubaruku shikya hweta nabato, Pitorosi indi Jwahani ngabatiya kuwo, bana ni nduna ywi njuwo indi Basaharuki. ² barukuzukaka mitima shikutiya ba Pitorosi indi Jwahani batiyaaya abato, tabatihweta zi ibatafwa sha Jeso. ³ barukubapata ngabati babika mwi torongo kutwara ilyatica ko; shukutikya kali manxuhumu. ⁴ nanga ndipakyo uwunji wibata yuvwa ldii ngaba tishiri, kubwaruwa kwibata tishira ngabati barwa sha 5. 000, ⁵ Ati lyakuca ko, manduna indi ba bakuru indi bacangiti ba manoro ngati shangena mona Jerusalema. ⁶ Barana ni Anna muprisiti yomukuru indi Kayafa indi Jwahani indi Alexandere indi zizha zaba presita babakuru kowo. ⁷ Ati bakuimisa ba Pitorosi indi Jwahani po pakati lyawo. baruku bawuza, atikya, kyopa nashisi she hqu irekapa shi ldiina kya?" ⁸ Pitorosi karayire umuku womuqa, katbazira katikya, nwe Mashikati uldiivu indinwe babakuru ⁹ ba Isirayere. ati muni taberuwa namushi shizisi zoziqa izasuwa ku mutu yushuhwere, atikya tisumuke shama pwelyiswa. ¹⁰ injahamu kyuvwahare kokunwe kwenu indi Rusinga rwa isileare koro, atikya Umutu yuimine puwuso wenu mapweliswa shi ldiina lya Jeso Keresite ywa Nazareta imata bambwa pushi bambiro yamata tambusa Urezha moku rufu. ¹¹ Jesu Keresite ndi ldiiwe ilyata shutuwa, ndishi gqa . ¹² Taku palisuwa kunjemwa kuyu yumwe shukutikya kunjemwa idiina lyirwezi mwikyo ldii idiiro ilyata puwa abato, lishaba paliswa shalyo. ¹³ Atibaku mwana kugipa kwa Pitorosi indi Jwahani barukuiba atikya nda bato ibahata lyututa, zini abato ngaho, baruiba atikya Pitorosi indi Jwahani nda bato ibarukwendinda ni Jeso. ¹⁴ Shukutikya barumwana imata pwelyusuwa uyimine nawo, barukwi kini shihweta. ¹⁵ Barukuba tyeya Ba apositola atikya nidzwe muni shikwata ngabati hwetizana. ¹⁶ nga batitikya. abato bani kuti takubati? shikutikya kowoibatara ndxini mona Jerusalema batayuvwa shisu ishata rasisini shata yuvwahara ishata rasisini shawo, tibahqu kushapura. ¹⁷ Shukutikya kurapaka kwitaba yipa kusiye kudzera ku wuso moku lduvu lyopa, tibacikisa nanyina atikya ishabasiye kushwishirapo kwiyaaya umutu tananga iyani shi ldiina lyopo. ¹⁸ Ndupubaru kuba rukurura Pitorosi indi Jwahani ngabati bazira atikya kabalika tanga kanxenine kapa kwi yaaya shi ldiina rwa Jeso. ¹⁹ Pitolosi indi Jwahani ngabati yarumuna, ngabati tikya, akanititiyatura yenwe, kutikya tuyuvwe yenwe kubbara Urezha. ²⁰ shukutikya yetswe tibahqu kushitira kuhweta zitatamwana, indi zitatayuvwa. ²¹ Ndupubaru kubacutura ba Pitorosi indi Jwahani ngabati bakalimera kabarakini shibaku bazipira, shutikya abato kowo ngabati dzemina Urezha shizusu zezamata rasi. ²² Shukutikya umutu yo kupwelyisuwa kwake kwatarasama yeye, karana zumwaka zi nnee indi kukita pa. ²³ Atibaku bacutura, Pitorosi indi Jwahani kabati sushira kuba kwawo;bakuba zira zitab a kozo ba presita indi babakuru. ²⁴ Bapa atiba bakuyuvwa zopa, andabati shupura sha maii uku kambira Urezha shi mutima munxiki, kabatitikya, Shikati yewe imata wumba ldiiro indi lduvu indi ami tindi izutu kozo izinamo; ²⁵ Mata hweta shu Mupupo indi shuporo sha shetu Davida muvuya aye, kotikya shikya llingi mavu, shikya pwa abato bati fumbera zezi hqu ituso? ²⁶ Mashikati ngatayuvwana niba yendisi bata shangana kurwenisa Shikati ni muvuya ake Jeso Keresite. ²⁷ Heroda indi Ponse Pilato batasha ngana ni mavu Ilingi Isirayere , moku muzi yopa kurwenisa muvuya yomucena, Jeso imata ketuwa. ²⁸ Tabatarasi zusu kozo zibata ziruwa shitandzi shilyanja lywe indi shuwuzuya we. ²⁹ Shikati, lyaya kufumbera kowa, upe bavuya we ihqumu atikya bahwetye ldii lye bahaywapa. ³⁰ Waara lyanja lye kupwelisa abato , indi zati bbemukisa shi ldiina lya Jeso, muvuya aye yo mucena. ³¹ Ati bakumana ku kambira, ku shibaka shibata shangena kuco sharu kunyangasa,abato kowo bataira Mupupo omu hqa, baruku kalisa kuhweta ldii lyu Urezha baha ywapa. ³² Uwunji wi batatishira bana mutima munxiki indi mupupo munxiki ngaho ,, shukutikya kunjemwa umutu izuto zana nazo izake, tizuto zu yumwe nu yumwe izawo kowo. ³³ Ba apositola baruku zuwura zuku tambuka kwa Jeso Kitresite shuwugi; indi shi zunxuma zezi kuru kaziti sikama populdiro lyawo kowo. ³⁴ Nangwena kali kunjemwa umutu imaruku shaka kuichimwe kokuwo; shutikya kowo ibana zufuba nanga maiwo , balikunga wulisa,ngabati lyeta marwapa,kwizata wulyusuwa. ³⁵ Ngabatibika kumakondo aba map apositola; uyumwe nu yumwe marukupuwa mwamati shashira. ³⁶ Josefa Mali mulivi koku Cupurasi imata bikuwa ldiina lya barnabasi kumu apositola , ( kutikya umwana yuzi yaaya , angakuti taruswa) imata pashurwa moni shipara. ³⁷ amaru kuwulisa ifuba yatama tsuwa, amalyi kulyeta marwapa ayo, katingabika kumakondo aba apositola.