¹ Putara kushi para akyopa taku yubwa akya shidazi copa shati bberuwa Melita. ² I ba tyebbe i bararana mo, ba kutipanga shi rusuno, rorukuru, ba kuticinjira kwetu, u mutu indi mutu, ba kuqhowusa munduro o mukuru, shi libaka linvura inkuru iyara kuna indi shi libaka limpepo. ³ Cware Pawurusi a kukyaba, iñata i zinkuni, zezi kukutu, aku iki mumunduro, mopa mwa kudzwa shi bbobbuma,shi libbaka li kutukuta , shakuli zingaza kulyanja liake. ⁴ Ibatyebbe bapa pubara kumwana inywaka yati dzyenga, ba kutikyta tota u mutu yopa mubburazi, shikutikya mata banduka muliwate, kulikanisa kuliro yemwa kwakutishira akya apare. ⁵ Mi a kudzukitira inywaka mu munduro, yemwa i mupange wubbi. ⁶ Urungu rwa kuyanakana akya mbwazimbe,kapa akya awe.nali mufu, pubara kushilyaira zopa i nako inde ahuru, ba ku mwana akya kunjemwa i shati muyera, ba kuzorumaka ba kutikya uiredzya. ⁷ Po shifupi indi putarana kwararana i i muzi iwu nduna iywa sooli, ikara ku bberuwa , Publiusi. Indiye a kuticinjira naqha,a kutiyisa mwinjuwo akye, mayiba atatu. ⁸ Sha a Publiusi, kara ranjire, shu wutuku iwi likyebe indi kusurura i gazi, Pawurusi a ku mwi kabi, a kumurungira, mi kumubbika manja puliro, a kumupwelisa. ⁹ Zopa puzara kumana, kowo i bararana mo sooli i bara kumashira ba kuya ba kupwelisuwa. ¹⁰ Bakuti kutyeka shi likutye lielikuru; mi tishifura batiti bbabbaliera, kashi zitatishaka. ¹¹ Pukwara kukita i mezi i tatu, ta kwenda shi shisepe, i shara kudzwa ko Alexandria, i shata tiiberera mo Sooli, shipepo koco po Litusi kuna shiswaniso isha. ¹² Putara kaya mo Sirakuza ta kwishara mo mayiba a tatu. ¹³ Putara kujuwa takujuwishira pulidzo li liwatye takaya mo mo Regio. Puliara kucako mupupo,iwa mbowerawa wa kushura, putara kwenda mayiba a viri taka fweshira mo Puzeoli. ¹⁴ Mi mopa taka shangana barumeli, ba kurungira akya tirashara nawo mayiba ngamana lianja indi tu viri, ndishi takwenda ko Roma. ¹⁵ Kudzwa apa barumeli i ba Roma pu bara kuyubwa zihweta zetu, bakaticingaza, Pumusika iwa Apiiusi, indi Pumahoteru Tatu inga maruti, Pawurusi pukara kumana kuba mwanaa ku kambira ku Redzya, a kugipa mutima. ¹⁶ Putara kaya mo Roma , Pawurusi a kutishira kusikama yeke, indi lisore ilya timubbabbalyera. ¹⁷ Pu kwara kukita mayiba nga tatu Pawurusi, a kubera ba bakuru i ba Majuda, pubara kukopana a ku bazira a kutikya nwe bakwanga, indi pundahara panga shicimwe, ndata rwenisa ilinji, kapa shi mikwa aba nakura etu, shazopa ndashangana kushiminuwa mo Jerusrema ,mi ndakubikuwa mu manja a Maroma. ¹⁸ Bapa batandiwuza, bara kushaka kundi rukurura, kakuti kali kunjemwa murandu kokume, i wara kuswanera rufu. ¹⁹ Majuda pu bara kushita nda kumwana i swanero kwenda ko ku Sesare, nda kutikya ndina shi hweta, shishe ndi shimina ilinji lyetu. ²⁰ Ndi libaka lindani bberi, kopani, ndi niqhe ndi hwetie nanwe, shi kutikya ndata shimuniwa shi liwenge, lyopani, shi libaka lisepo iya ma Siraere. ²¹ Ba kutikya kokukye yema titambure mañoro, ngapa, ingatidzwa ko Judea ingati hweta zi hweta zwe, indi bakwetu, kunjemwa i maya ku kuhweta, kapa ku lieta shi hweta cwe, she shifosahara. ²² Nanga ndi pakyo tatiswanera ku yubwa kokuwe shi mati yanakana, kakuti ti izire akya ituto yopani nkwenuha yatirwenisa kure indi kure. ²³ Pubara kumubishira liva kwaya ilnji mwinjuwo akye. A kuhweta nawo, a kupaka izi muwuso uwu Redzya, nanga kara kubagisa sha Jeso, shu kuisa zi hweta mu murawo a Mushe, indi mu Baporofita, a ku kalisa manxehumu, kutwara manxuhumu. ²⁴ Ba bamwe ba kutishira i sha hwetuwa, ba bamwe ba kushita kutishira. ²⁵ Shu kutikya bata pwama pubara kudzwa, Pawurusi a kuyekeza shi hweta shi cimwe, a kutikya Mupupo Uredzya, wa hweti naqha, shi muporofita Isaya puwara kuzira banakura etu. ²⁶ Wa kutikya u yende kwi linji, lyopa, ukatikya kyubwa sheni yubwe, kono kamuni sheni yubwisise, kumwana sheni mwene, mi akmuni sheni mwenisise. ²⁷ Shikutikya ziñombe zi linji lyopani zi caca, Mati awo ngati yubwa shu wukukutu, mi ba burumata akya basiye kumwana sha mesho, basiye kwike shi mati, basiye kuyubwa shi mitima awo, basiye kudqhapumuka ndisiye ku bapwelisa. ²⁸ Niyibe atikya kupaliswa ku Redzya, kwalyetizwa i linji, wowo i bati yubwa. ²⁹ Pukara ku hweta mayi ngapa, Majuda ba kumusiya, kabana kupwama kokuru muni nkyo liawo. ³⁰ Pawurusi a kusikama u mwaaka i viri mwinjuwo, mukara kupara kuyo shuku lifa ma rwapa kara kucinjira a bato kowo i bara kuya kokukye. ³¹ Kara kuhweta muwuso i wuliroi wu Redzya, indi kuyaya zihweta iza Shikati Jeso Kiresite. Aha ticikisuwa ku mutu.