¹ pawurusi, pukalikulyaya ahuru shukwata , akutikya nawakwangana, ndayendi shilizwaro lyeliqha kolyo puwuso Wurezha, kutwara ldiba lya namushi. ² Popa, Ananiyasi, mu pirisita yo mukuru, akurayera bamatabambana nawo atikya bamuhowure pumuromo. ³ Pawurusi akutikya kokuke: Urezya mbwakuhwaware, yewe ulyu mota lyeli kabisa wuhwe; shukutikya: pusise apa, kundiyatura shukwenda shu murawo; ushirayera atikya bandihwabare celi kukira murawo. ⁴ Ibata bambana nake, batitikya, yewe matikuta mupirisita yo mukuru yu Rezya? ⁵ Pawurusi akutikya: nabakwanga, kandarayizire atikya mupirisita yo mukuru, shukutikya kwata ñoruwa atikya: shakuhweta wubbi mwilinji koku shikati enu. ⁶ Cware Pawurusi, shukuyiwa atikya babamwe mokuwo bayarumushiri, indi Bafalisi, akushupura mwi kuta, akutikya: nabakwanga, yeme ndu Mufalisi, ndi mwana Mufalisi; ndatiyatura shiliwaka li sepo indi kutambuka kuwafu. ⁷ Pukali kumana kuhweta akyopa, kwakuya kupwama kokukuru papakati lyawo Bafalisi indi Basaduki; indi shikwata yakukauhana papakati. ⁸ Shukutikya Basaduki batihweta atikya: ibatafwa imawa kutambuka, indi kutikya kunjemwa lingiroi, nanga mupupo; atikya Bafalisi batitishira akyopa. ⁹ Kwali kudzwa lirata lyeli kuru; kuba ñoli,iwatiyimina Bafalisi bakuyima, bakucikisa ikaturo, atikya: imataku mwana wubbi kokukye; tyema mupupo wahweti kokuke indi lingiroi ?. ¹⁰ wuzuwo wakukura, muyendisi u masore akuywapa atikya tiwakuxanara Pawurusi; akuzira masore atikya watsurumuke, bakamupatye mwikyo lyawo, balikumushwishiza mwinjiwo yigyi,. ¹¹ Masuku ateni, Shikati akulyumwanahaza kokukye,akutikya: uligise Pawurusi, shukutikya: matandipaka mo Jerusalema, matirukera kandipa akyopa indi ko Roma. ¹² Pulyali kuca, Majuda babamwe bakuyanakana, bakulishimina shimatswe, bakutikya bakukulya shulyuwa indi kunwa. ¹³ Ibatapanga muhupuro wopa, kali awato iwatibbara makumi a nnee. ¹⁴ Balikwenda kuma Pirisita babakuru, babakuru bali katikya: talishimini shamatswe atikya: tiwaku kulya shicimwe nakana takubbura Pawurusi amana. ¹⁵ Nangi ndipakyo, yenwe indi wi shikwata niyibise yo mukuru ywa masore atikya banilyetizeye, kanitishaka kushakisisa zihweta zake; yetswe mbotikare tiwalitukiseza kumubbura kacire kuya kokunwe. ¹⁶ Mwana mugxenake Pawurusi, yo murume, akuyubwa mifumbo yopa; akanjena mwinjiwo yigyi, akazira Pawurusi. ¹⁷ Pawurusi akubera yuyumwe ywa barauli wa mwanda, akutikya: twara munyana yopa kuyamatyendisa masore; kuna shakamuzira. ¹⁸ kali kumuyisa, akumutwara kuyo mukuru wa masore; akutikya: Pawurusi ywa mwi torongo, mandiweri,atikya ndikulyetize munyana yini,kuna shuhweta shika kuku sumushira. ¹⁹ Yo mukuru wa masore akumupata kwi lyanja, akwenda nakye kurupati, akumuwuza kurupati atikya: shikya matindisumushira? ²⁰ Yeye kali kutikya:Majuda balikuyanakana kuringira Pawurusi kokuwe, atikya umulyetye kwi shikwata shawo lyakuca,bapange nokoti batishaka kuyibisisa zihweta zake. ²¹ Usiye kubatishira; shukutikya barume ibatilikana makumi a nnee bamuzikamini, balishimini shima tswe atika basiye kulya shulyuwa indi kunwa kabacire kubbura amana.popani balitukisezi, balindiri i karawo kokuwe. ²² Yo mukuru wa masore akushusa munyana yopa, akumukanda , atikya; asiye kuzira u mutu atikya mamuziri zihweta zopa. ²³ Ndupukali kubera ibatimwana zimbe mwanda bayiri [200] atikya barukise masore ba mwanda bayiri, indi bakauki baba piyi bakumi amana lyanja bayiri [70], indi batiximba mwaanga bali 200; bakuyima masuku ateni kaya ka 9 yamasuku, kwenda ko Sesareya. ²⁴ Barukise indi zibberensa zikakuya kukawukapo Pawurusi, bamutwere ko Felikisi, muyatuli kudzwa muwuzuwo naqha. ²⁵ Aku ñwara liñoro lyatitikya:. ²⁶ Yeme kilaude Lisiyasi, koku Felikisi, muzekisi yamati yopuwa ahuru, ndakambiri!. ²⁷ U mutu yopa matapatuwa ku Majuda, balikushaka kumubbura nanga ndaya ni masore; ndakumuyaka pundali kuyubwa atikya mu Roma. ²⁸ Shukushaka kuyiwa shiwatimurwenisiza, ndakumutwara mu shikwata shawo. ²⁹ Mopa ndalikashangana atika batimuzekisa zizi ntawa zu murawo awo; kunjemwa murandu kokukye iwatiswanera rufu, nanga maweenge. ³⁰ Ndaziriwa atikya Majuda bamuyamini; nanga ndamutumini kopa kokuwe; ndaziri iwatimuzekisa atikya zibatumuzekiseza bazitwere kokuwe. ³¹ Masore bakucera akyopa ngaho shibaziruwa; balikwenda indi Pawurusi, balikwenda ko Antipatiri, masuku. ³² Pulyali kucako, bali kusiya Pawurusi, wowo bali kushuka kwinjiwo yigyi. ³³ Wowo pubali kuya mo Sesareya, bakupa muyatuli liñoro, bakulyeta Pawurusi kokuke. ^{34 35} Muyatuli pukali kumana kuwara liñoro, akuwuza Pawurusi atikya unju lyuvu kya. pukali kuyubwa atikya i ko silisia, akutikya:.Shendikuyubwe pushe bakuya u matizeka nawo, akumutyeya atikya pwashibalindira, akusikama mwinjiwo a Heroda.