¹ Cware putara ku kawuhana nawo shu wuzuwo,ta kudjuwa, mi takwenda Koso , pulyara kucako,takaya mo Rode, Putara kaya mo, takaya mo Patara. ² Putara kaya ta kushangana shisepe ishara kukwenda ko Fenisia, ta kunjena mwaco ,ta kujuwa. ³ Mi putara kaya kushidazi, isha Sipera takushiqhama kulyi mosho , katityenda ko Siria taka fweshira mo Tire, kakuti shisepe shara kushi isa itutu. ⁴ Kudzwapa takushangana barutiwa ,taku sikama mayiba ngamana lyanja indi tuviri. Barutiwa ba kutikya koku Pawurusi, shu Mupupo akye asiye kwenda ko Jerusarema, ⁵ Putara kumana mayiba, taku kudzwera kuwuso ni rwendo rwetu. Ta kwenda, indi barwakazi inda bana bawo bakuti sindikizatabara katigusa mu muzi.Taku djita madji pulidjo ta kukambira . ⁶ Takunjena mushisepe wowo bakushuka kumuzi nangweza ⁷ Putara kudjuwushira mo Tire takumenisiza rwendo, rwetu wamushisepe putara kujuwira ko Ptolemaisi taka rumelyisa ba rumelyi, ta kusikama nawo lyiba xiki. ⁸ Pulyara kucako taku djwera kuwuso ni rwendo , takaya mo Desarea,ta kunjena mwinjuwo yu muivangelyi,, Filipi, ikali yu yumwe ywa bakutazi iba mana lyanja indi tuviri,7,mi takusikama kokukye. ⁹ Murume yopa kararana a bana ba qekwa ba ba nee,i bahara cire kurowuruwa nanga bara kuba i bara kunuha. ¹⁰ Putara shisise mopa mayiba kwakuya muporofita ikara ku dzwa mo Judea ikara ku beruwa Agabusi. ¹¹ Akuya kutswe akuya kuisa rukanda rwa Pawurusi,shalyo a kulyi shimina manja indi makondo, mi akutikya, Mupupo, Uredzya wati hweta watitikya ,Majuda mo Jerusarema sheba lishimine a kyopa murume u munu rukanda ku manja ,ropa, ba kumbika mwinqumu i Wilyinji. ¹² Cware putara kuyubwa zintaba zopa kwetu inda bato i bara kupara mushi bbaka chopa,ta kurungira Pawurusi,akya asiye kwenda ko Jerusarema. ¹³ Pawurusi a kwitaba, shikya natisi kani tilyira akya ni bunje mutima nga, Ndi mulyitukiseza kashuminuwa, indi kufwa mo Jerusarema, mulina lya Shikati Jeso . ¹⁴ Akushita kugisa kutswe, ta kutipo takutikya kupanguwe ishati shakuwa ku Shikati. ¹⁵ Pungara kumana mayiba takuyisa mi kwatana etu takwenda ko Jerusarema. ¹⁶ Bakwenda natswe ba bamwe barutiwa ko Sesarea ,Ba kuti twara kwinjuwo a Mnasoni, murume iywa ko Sipera, ikara kuswanera kuti chinjira takusikama. ¹⁷ Putara kaya mo Jerusarema ba rumeli ba kuti cinjira shi kwidze. ¹⁸ Pulyara kucako Pawurusi a kwenda natswe ko ku Jakobo, ba bakuru kowo bata kopanera kukye. ¹⁹ Pukara kumana kubarumelisa, a ku bazira shuku cincana .zintaba kozo zamatarasi Uredzya,mwi Lyinji shi seberezo akye. ²⁰ Pubara kumana ku yubwa zintaba zopa ba kurumba Shikati ba kumuzira bakutikya mukwanga mati mwana akya Majuda i bata tishira kali batiyekezeha ,kowo batiqumukawo murawo. ²¹ Bata ziruwa kuamana nawe akya yewe mati yaya Majuda, i batipara indi Lyinji.akya ba butatire Mushe, basiye kunjenisa a bana bawo mu mupato,mi basiye kwenda shizisi zawo. ²² Ingahare takwisi , kakuti i ldinji shelyi yubwe akya kukorana. ²³ U rasi shitati hweta popani, kuna barume ba nee i bali shimini wuitamo . ²⁴ U ise barume uka bacenise induwo, u lifere akya ba kwene kubishirwa mi shoro; a bato kowo,Akutikya u mutu kwekye a yibe zintaba zopa izata hwetuwa, akya kani inzi njahamu, Sheba lyi tutye akya indiwe nongo tiqhama murawo. ²⁵ Hailyi Ldinji, bata tishira tata bañwera shitata yatura shawo,kakuti kamuni shi shimunuwe shi iza ngahopa, mi nishitye izara dzaminwa madimona, indi gazi indi za bburuwa, indi wushashi. ²⁶ Cware Pawurusi a ku isa murume, pulyara kucako , akara kulicenisa ,a kunjena nawo mwinjuwo ,a kuhweta mayiba ngu kulyi cenisa,kwawo pushe ngamena , akya kulyetuwe shitabero i shukulitumera i shuyumwe nu yumwe iywa kuwo. ²⁷ Mayiba ngamana lyanja indi tubiri ,[7] , pungara kumana ,Majuda i ba ko Asia, ba ku mwana Pawurusi mwinjuwo /mwi Kereke ba kususuweza ilyinji shu wunji mi baku mupata. ²⁸ Ba kushupura ka batyityikya a bana ba Isiraere ,yeni tuse . U mutu yopa mati yaya a bato kowo kure indi ikure, ituto yati rwenisa ilyinji indi murawo, indi shibaka ,copani, kali malyeta Magerike, mwi kereke , masirafaza. ²⁹ Shukutikya bata mumwana katanzi mu muzi, kara kwenda indi Trofimoi ywa ma Efese, ba kuyanakana akya Pawurusi ma munjenisa muni kereke ³⁰ Muzi kowo wa kuyima shukulyi kalyirwa,a bato bakutiya kokuwo , ba kupata Pawurusi, ba kumukweshira kwinje,lyi kereke, bakuyaziya mumbero shukuli tahanera . ³¹ Kalyi bara kushaka kumu bbura ,intaba puyara kaya kumuyendisi ,iywa masore, akya Jerusarema kali yayimi ni mifilyifilyi. ³² Popa a kuisa masore, indi bayendisi bakwenda susira kwi ldinji ,I ldinji pulyara kumwana, yo mukuru muyendisi uywa masore, indi masore , ba kusiya kuzipa Pawurusi. ³³ Muyendisi iywa masore a kushera a kupata Pawurusi, a kuraera ,akya a shumunuwe mawenge a biri [2], mi popa akuwuza zizakye, akya inje ndiyani ,indi zamarasi zikya . ³⁴ Mi ilyinji lya bato lyara , kushupura icuto shixiki, ba bamwe bara kushupura zi zimwe,a kushitira kuyubwa shilyibaka lyirata, a kuraera akya Pawurusi akya toruwe kwinjuwo ingi ³⁵ Pukara kaya kuma kakushiro a kuisuwa kumasore,shilyibaka lyuwugu wi lyinji. ³⁶ Kakuti u wunji wi lyinji wata mwiqhama,aka batishupura, kabatitikya abburuwe. ³⁷ Pawurusi pukara kutikya anjene mwinjuwo ingi, a kutikya ku muyendisi iywa masore, ndati rungira kuhweta nawe ,yeye a kutikya , matihweta shi Gererike. ³⁸ Kawe ndi Muigepita yina yamata lyeta mifilyifilyi,mumayiba ingana inga ,mana, ba kuisa abato ibara kaya mo 4000 ,mi a kwenda kuliharawupa, ³⁹ Pawurusi a kutikya ,yeme ndi mutu iyu Mujuda ,ndata pashurwa mo Tarese ,mu muzi iwa mo Silisia ,i iwa hati shaka kuyibahara,ndati rungira undipe shibaka shu kuyaya ni ldinji. ⁴⁰ Pukara kumupa shibaka Pawurusi a kuyima puma randiro,a kubera a bato shilyanja pubara kutupo a kukalisa kuyaya,shumushowo iwi wu Shiheberu akutikya.