¹ Apolosi pukara mo Korinte, Pawurusi yeye akuqhatura mavu a kauka ahuru, akulyubushira mo Efese. mopa akashangana bayaaywa babamwe. ² Pawurusi kali kubawuza atikya: natashangana Mupupowo Muncena punali kutishira? bakumwitaba atikya: imatuyuvwe atikya: kuna Mupupo wo Muncena. ³ Pawurusi akuba buza atikya: injira kya nata natanwengiswa shayo? bakumwitaba atika : tata nwengiswa sha Jwahani. ⁴ Pawurusi akutikya: initi natabaka ati nata nwengiswa shinwengiso ya Jwahani. akuzira abato atikya; batiswanera kutishira kumutu imatiya muliqho lyake yeye Jeso. ⁵ Abato pubali kuyuvwa akyopa baku nwengiswa shi ldiina lya Shikati Jeso. ⁶ Pawurusi pukalikumana kubabika manja, Mupupo wo Muncena bwalikuya pwi ldiro lyawo, ndupubali kuhweta mishobo indi bayanakani. ⁷ Barume bapa kowo kali likumi nubu yiri. ⁸ Pawurusi akunjena muma sinagoge, kalikuhweta ahaywapa, shi mezi itatu , akuyarumuka indi Majuda,akuba giisa shu muwuso Wurezha. ⁹ Babamwe Majuda bakukutiza, bakushita kutishira, bakunyaza injira ya Keresite puwuso aba batu babenji. Pawurusi akudzwa kokuwo akugusa bayaya, ali kayaya mwi kereke yu mutu yuyumwe yama tiberuwa Tirano. ¹⁰ Zitaba zopa zakusikama akyopa likumu nubu yiri: abato kowo ibata radxini mo Asiya,bakuyuvwa ldii lya Shikati, Majuda indi Magerike. ¹¹ Urezha kali kupanga zimakazo izati bbemuka shi manja a Pawurusi. ¹² zintaburu indi madzira ngangamwe ngali kubikiwa kubatimashira ndiku bapwelisa indi mipupo ye mibbi yali kudzwelira,mumumbiri a Pawurusi. ¹³ Majuda babamwe, ziñaka izali kwenda kugusa mipupo yemibbi kuba yeyi, bali kuweranga ldiina lya Jeso pwiliro lyabato ibana mipupo ye mibbi, atika: ndatini rayera sha Jeso yana koku Pawurusi. ¹⁴ Ibalikwisi zopa kali abato ba mwana lyanja shaba yiri [7], abana ba Sikeva Mujuda yuyumwe kwabato abayendisi babakuru. ¹⁵ Mupupo wo mubbi wali kubayarumuna atikya: Jeso ndumuyizire indi Pawurusi ndumuyizire: cware yenwe nwe ndibani?. ¹⁶ popa ngaho, umutu yana mupupo wo mubbi akutikya: akubakyira pwiliro, akuba kyinda papeshi rubuyiri, akuba kwana; pubarana kwinjiwo yopa barana muzyumbiri, bakudzwa indi gazi. ¹⁷ I ntaba yopa yakuyibahara kumutu kweke, Majuda indi Magerike, babaradxini mo Efese; balikuywapa nabbi kowo, indi ldiina lya Shikati bakulidze. ¹⁸ Babenji, ibatatishira bataya, kono pubali kuhweta, barukusumuka zibe zawo. ¹⁹ Babenji ibatarasi za mabibo, bakulyeta ziwuka zawo, baku zipisa pubuso wilinji, pubali kubara marwapa ngwi teko azo, kwalikushanganeha atika marwapa ngapa ngatilikana Silivera sha 50,000. ²⁰ Ldii lya Shikati lyakutuuma akyopa, lyakubberika ahuru. ²¹ Zopa puzali kumana, Pawurusi pukali kumana mubberiko wa Maefese akuhupura, Shumupupo, atikya ayendye ko Jerusalema shi njira a Masedoniya indi Akaya; pukali kwendako, kali kuswanera ka mwana indi Roma. ²² Pawurusi akutumina bayiri ko Masedoniya atikya bakamutuse, i Timotiya indi Erasito. kono yeye akasikama mo Asiya. ²³ I nako yopa ngaho, i ziyezi ikuru yakuya mo Maefese shi Njira. ²⁴ Murume yu ldii lya Demetiruyisi, shikwara kali kulika za silivera ikali kwisi mubberiko wopa. ²⁵ Kali kubashanganisa akyopa inda bato ibali kwisi mubberiko wopa, akutikya: barume, taniyizire atikya ishatiti fumisa ndumu bberiko wopa. ²⁶ Natumwana, natiyuvwa, atikya Pawurusi yopa matasikurura a bato babenji kono ka mo Efese ngaho indi Asiya koyo. ²⁷ Wuzuwo walikuya, shukutikya mubberiko bwetu shuwumane; indi kereke yumurwakazi Diyana, urezya yo mukuru, sheku zoromuke icuto ishaha lyaiwa, indiye yamatiyopuwa ko Asiya indi lyuvu kolyo, shamane shurumweni rwake. ²⁸ Pubali kuyubwa akyopa, bakugyupa, bakushupura, atikya: yo mukuru i Diyana ywa Mayefese!. ²⁹ Muzi kowo celi inyakanyaka ngaho, bakutira ko Teatere kowo, bakupata Gayusi indi Arisitarko, barume bako Masedoniya, batasindikiza Pawurusi. ³⁰ Pawurusi kali kushaka kulilyeta kwi linji kono barutiwa bakumucikisa. ³¹ Indi malinda zikanga ba Asiya babamwe, ibatirumarana nake, bakumuzira atika asiye kuya ko Teatere. ³² Babamwe balikushupura zihweta izatikya kanduzo: batashangana shimaziyezi, babamwe kabarayizire shibashangeni. ³³ Bakugusa alexandere muwunji, Majuda bakumubika kuwuso, Alexandere akuraba, kalikushaka kulikarabera pwi linji. ³⁴ Pubali kulyemuha atikya Mujuda, bakwendiriza kushupura kowo, pubali kumwana atika celi kwakara zinako ziyiri akutikya: yo mukuru i Diyana ywa Mayefese!. ³⁵ Muñoli ywi kuta iya mumuzi pukali kuwa totuza, akutikya: abana ba Efese, iyani yahayizire atika muzii wa Efese nanga wututokomera i tempere ya Diyana indi shiswaniso shake ishatawa kwiliro?. ³⁶ Zihweta zopa kunjemwa kuzishapura, nanga ndipakyo kutiqamwi kakwisi icuto shukuputaka:. ³⁷ Barume wunata lyeta kuni kabacire kusinya mwi kereke indi kunyazurusa urezya etu. ³⁸ Demetiriusi indi mikwa ake baqhu mizeko inda bato, kuna mayiba ngubatabika ngukuzeka, indi batiyatura: bakazeke. ³⁹ Ati nina intawa yatiswanera kuzekiwa, kuyakuyizeka mumu kopano urwezi. ⁴⁰ shikutikya kalita linjenisa mubuzuwo wa namushi, tiwaku liwaka litakuliyimina shalyo shilibaka limukopano wopa. ⁴¹ Pubali kumana kuhweta akyopa akurapura abato.