¹ Ndakambiri Teofile, iwuka iyukutanga ndataisi shizusu kozo zamatakara Jeso kusi katiyaya shazo, ² kutwala kuldiiba lyamarakwenda kuldiro, atiakumana Shumuku Omuqa bayaywa bake wamatasharara. ³ Bapa, atia akuyuvwa wutuku, kaya kulyumwahaza kuwo pwamarashiri muimi, shizimweniso zizinji. Kabamumonu shamaiba amakumi ane kali kauhana nawo, marukuhweta zumuwuso Urezha. ⁴ Marukurayaya muso uldiiro,ati akushangana nawo kabatyeya atikya basiye kundzwa mo Jerusalema, baldindire Sheshi amata barayaya shashe urezha, "Shukutikya ⁵ Johani mata nwengiswa shami. Yenwe nati nwengiswa Shumuku Omuqa mumaiba ngamace." ⁶ Atibakushangana panxiki kabamuwuza ati "Shikati, papani ishutambise muwusa aisilalere?" ⁷ Jesu kabarataba atikya, "Kuyemwa nupuwe kuiba zinako kapa zumwaka, tana Tatye yeke, shukutikya ishanipuwe kwihqumu. ⁸ Umuku Womuqa ishawuye kunwe, ishanirandzo abato ibatishumuka mayi anga, mokumavu kongo inga Jerusalema indi Jutiya indi anga Samariya, kwenda kukamana ku ldiivu." ⁹ Ati Shikati Jeso a kuhweta zopa Amaruisiwa moku ldiiro, kabamumonu popumarukwenda, lindzundzo kalitibayaziya kwa mesho awo, ¹⁰ atibakulyaya akyopa kuldiro banyana bayiri kabatiya kuwo barara ziraro zozuhwe, ¹¹ kabatitikya kuwo nwe banyana baGalilea, "Shikya niyimine muni kanitilyaya kokuldiiro? Jeso mayendi mokuldiiro ishakashuke shinjira yinamumonu mayendi shayo koku ldiiro." ¹² Ngabati tsurumuka popu lyuwe ilyati beruwa Miti iya Oliver,wufupi walyo watilikana nirwendo rwi Sabata,ngabati tsurumuka ko Jerusalema . ¹³ atibakunjena mokumuzi, ngabatiranda mokwinjuwo aya kokuldiiro,imwarukusikama ba Pitolosi indi Johani indi Jakobo indi Andreasi indi Filipi indi Tomasi ni Bartolome indi Mateu indi Jakobo imari imwana Harufea indi Simon Zeloti indi Juda imaldi mwana Jakobo, ¹⁴ Kowo barana umuku munxiki mukuraqhumu kukambira urezha. kwarana bakazi indi Maria nyina Jeso indi bazatu bake. ¹⁵ Mumaiba ngapa, Pitolosi katiyima mwikyo lyaba kwake, mi uwunji wawo ngautubarwa shamakumi Ulyukumi ni makumi ayiri, ¹⁶ katitkya, nwebakwanga kali kutikya mañoro ngarasisini ingata hwetuwa Shishuporo sha Davida, ilyatihweta sha Judasi. Imatakitira abato ibaruku shaka Jeso. ¹⁷ Shukutikya tatabaruwe kokutswe, malindi murara rupati mukwi yaaya kwake ¹⁸ ati akulyuwira ifuba shukupuwa shuwubbi, amaru kulyu bbura, akuqatuka pakati,mirake kayo yaku dzwera kwinje ¹⁹ itaba yataziruwa kwabato kowo ibatara dxini moJerusalema. ifuba yopa yatib etiberuwa sha hakeldama moku mushowo awo kutikya, ifuba Amarwapa. ²⁰ Moku Rukwaro rwa Lisamu kwata ñoruwa atikya, ichuto Shawoshayarumuka limbo, takura kinisini umutu imatikara dxini mo, Nangwena katitikya, uyumwe ayise uvuya wake. ²¹ Panga ndipakyo kubanyana wutaru kupara nawo inako koyo Shikati Jeso amata yenda natswe, ²² kutanga shuku nwengiswa kwa Johani, takuya shi ldiiba lyamata ndzusuya kutswe akutoruwa kokuldiiro. ²³ ndupubaru kulyeta bayiri, uyumwe awo maldii Josefa maruku ku berwa sha Barsabasi, matiyerwa nangwena sha Justus;indi Matiyasi. ²⁴ Ngabati kambira , kabatikya, Shikati, yewe yuyizire mitima abato nwe,uketye yuyizire kwabato bani ²⁵ shukutikya ayise shupuna shu uvuya indi wu mu apostora shamatawa kucho Judasi,amarukakita kushibaka shake, ²⁶ papa ngabati mwana zimbe, zarukupata Matiyasi; ndupukaru kunjena mwa bato ulikumi ni uxiki.