1 पौलुस कै डोबोशै जु पोरमेश्वर खा दास ओरो यीशु मसीह खा प्रेरित ओसो, पोरमेश्वर खै चुणियो दै लोगो खै विश्वास ओरो देसी सोच्च खै पहिचाण खै सांय, जु भोक्ति खै अनुसार ओसो। 2 तेसी होमेशा का जीवन खै आशा पांदी जिथखै कसम पोरमेश्वर जु झुठ बोलौ ना सोकौ, सनातन बारी राए कोरी। 3 पोरो ठीक सोमय पांदी आपणै वचन खै तैसी प्रचार खै व्दारा प्रोगट किऊ। जु आमारै उध्दारकर्ता पोरमेश्वर कै आज्ञा खै अनुसार मोखै सोफै गोवा। 4 तीतुस खै नांव जु विश्वास कै मिलणौ खै सोच लैई मेरा साच्चा बेटा ओसो, पोरमेश्वर पिता ओरो आमारे उध्दारकर्ता मसीह यीशु खै ओरो शै तोखै अनुग्रह ओरो शान्ति मिलदै रोव। 5 ओऊ इथकारिये तोखै क्रेते दा छोडियो ओबा थियो कै तू आदि बातो खै सुधारु, ओरो ओरो मेरी आज्ञा कै अनुसार नगर-नगर प्राचीनो खै ठोरोऊऐ कोरे। 6 जु निर्दोष ओरो ऐकेई घोरवाली कै घोरवाल़ै होव़, जिनखै नानडिया विश्वासी होवं, ओरो तिनुमुझी लुच्चे ओरो निरकुंशता खा दोष न होवं। 7 जिथु अध्यक्ष खै पोरमेश्वर खा भण्डारी होणौ खै कारण निर्दोष होणा चेई, ना होटिला ना गुस्से ना पिणौ ना मारपीट कोरणैवाला ओरो ना नीच कोमाई का लोभी होव़ 8 पोरो मेहमानो का सत्कार बोऊणै का सत्कार कोरणैवाला भोलाई खा चाहणैवाला, सोबरै न्यायी, पवित्र ओरो जितेन्दि़ंय होवं। 9 ओरो सेजे विश्वासयोग्य वचन पांदी जु धर्मोपदेश खै अनुसार ओसो, मोजबूत रोव़ कै खोरी शिक्षा सै उपदेश दै सोखो ओरो विरोधियो खा मुहं भै बोन्द कोर सोखो। 10 जिथु बहुतै लोग निरकुंश बकवादी ओरो धौखा दैणेवाल़ै ओसो, खास कोरियो खतनावालो़ मुझदै ओसो। 11 इनखा मुहं बोन्द कोरणा चेई ऐजे लोग नीच कोमायो कै कारिये बुरी बातो शिखायो घोर खै घोर बिगाडे देवं। 12 तिनु मुझदै एक आदमै जु तिनखा भविष्यव्दक्ता ओसो, कोस्कै ओसो, क्रेती लोग सोदा झूठै, दुष्ट गौरू ओरो आलसै पेटू होवं। 13 ऐजे गवाही साची ओसो इथकारिये तिनु कोडाये लैई चेतावनी बिताऐ दै देया कोर कै सै विश्वास दै पाक्कै होऐ जावों। 14 ओरो यहूदियों कै कोथा कहाणियो ओरो तिनु आदमियो खै आज्ञाओं पांदी मोण नै लाव़, जु सोच्च पेशै भोटकै जाव़। 15 शुध्द लोगो कारिये सोबे चीजो साफ ओसो, पोरो बुरैमन ओरो अविश्वासियों कारिये किछै भै शुध्द नै पोरो तिनखै बोध्दै ओरो विवेक दुइने अशुध्द ओसो। 16 सै सैजे बोलो कै आमु पोरमेश्वर खै जाणऐ, पोरो आपणै कामो लैई तिनखा मोना कोरो, जिथु सै बेकार ओरो आज्ञा नै मानणवाल़ै ओसो, ओरो कोसो आच्छै काम खै लायक ना आती।