इफिसियों 1
1
पौलुसे तरफा का ज़ुंण परमेश्वरे इछा करै यीशू मसीहो प्रेरित आसा; तिन्नां सोभी पबित्र और विश्वासी लोगे नांओंऐं च़िठी ज़ुंण इफिसुसै आसा।
2
म्हारै पिता परमेश्वर और प्रभू यीशू मसीहा का लोळी तम्हां लै दया और शांती भेटदी रही।
3
म्हारै प्रभू यीशू मसीहे परमेश्वरो आसा धन्याबाद ज़ुंण पिता बी आसा कि तेऊ दैनीं हाम्हां लै मसीह दी स्वर्गैीय ज़ैगा दी सोभी प्रकारे आत्मिक आशीषा (किल्हैकि हाम्हैं मिलै मसीह संघै)।
4
ज़िहै तेऊ हाम्हैं संसारे उत्तपती का पैहलैई एते तैणीं शादै कि हाम्हैं तेऊ नेळ रहीकरै तेऊए झ़ूरी करै पबित्र और धर्मीं होए
5
और तेऊ शादै भलै मनें झ़ूरी करै आप्पू लै हाम्हैंई आपणीं मरज़ी दी ताकि हाम्हैं यीशू मसीह बाती तेऊए गोद ल्ऐ दै शोहरू होए,
6
ताकि तेऊए तेसा दया महिमे स्तुति होए, ज़ुंण तेऊए प्यारै शोहरू करै हाम्हां लै मुफ्त दैनीं।
7
हाम्हां भेटअ तेऊदी तेऊए लोहू करै छ़ुटकारअ, अर्थात – अपराधे माफी भेटी तेऊए तेसा दया करै
8
ज़ुंण तेऊ सारै ज्ञान और समझ़ा संघी हाम्हां लै भरी-भरी दैनीं।
9
तेऊ भांऊंअ आपणैं दिला मनों भेद हाम्हां का खोज़णअ ज़ुंण तेऊ आपणैं मनैं ती ठाह्निं दी।
10
परमेश्वरे ती एही योजना कि ज़ेभै ठीक बगत एछे, तेभै ज़ुंण किछ़ स्वर्गै आसा, और ज़ो कुछ़ पृथूई दी आसा, सोभ किछ़ मसीह दी कठा करे।
11
तेऊई दी, ज़सा दी हाम्हैं बी तेऊए मनसा जुण तेऊए आपणीं इछा करै सोभ किछ़ करा, पैहलै ही च़ुनी करै मिरास बणें।
12
कि हाम्हैं ज़ुंणीं पैहलै ई का मसीहा दी आशा डाही ती, तेऊए महिमां दी स्तुतिए कारण होए।
13
और तेऊई दी तम्हैं बी; ज़ांऊं तम्हैं सच्च़ाईओ बच़न शुणअ ज़ुंण थारै उध्दारो सुसमाच़ार आसा, और ज़ेथ दी तम्हैं विश्वास किय, प्रतिज्ञा की दी पबित्रात्में छ़ाप लागी।
14
सह आसा तेऊए मोलै ल्ऐ दै मांह्णूंए छ़ुटकारै लै म्हारी मिरासो बयानअ, कि तेऊए महिमें स्तुति होए।
15
तैहीता हूँबी तेऊ विश्वासो समाच़ार शुणीं करै ज़ुंण तम्हां लोगा बिच़ै प्रभू दी आसा, और जुंण प्यार सोभी पबित्र लोगा दी प्रगट आसा।
16
हूँ नि तम्हां लै धन्यबाद करनअ छ़ाडदअ, और हमेशा करा हूँ तम्हां आपणीं प्राथणांं दी आद,
17
कि म्हारै प्रभू यीशूओ परमेश्वर ज़ुंण महिमों पिता आसा, तम्हां आपणीं बछ़ैणां दी, ज्ञान और प्रकाशे आत्मां दैए।
18
और थारै मनें आच्छी लोळी ज्योतिर्मय हुई, ताकि तम्हां का थोघ लागे कि तेऊए शादणें केही आशा ह्आ, और पबित्र लोगा बिच़ै तेऊए मिरासे महिमों धन किहअ आसा।
19
और तेऊए शक्ति हाम्हां बाखा तेऊए शक्तिए प्रभावे तेऊ कामें साबै, ज़ुंण विश्वास करा, केतरी महान आसा।
20
ज़ुंण तेऊ मसीहे बारै किय कि प्रभू यीशू मूंऐं दै बिच़ा का ज़िंऊंदअ करी करै स्वर्गैिय ज़ैगा दी आपणीं दैहणीं बाखा बशैळअ,
21
सोभी प्रकारे प्रधानता, अधिकार, शक्ति, प्रभुता और हरेकी नांओंआ का परैंदै, ज़ुंण नां सिधअ एऊ लोका दी पर आजू एछणैं आळै लोका दी बी सह नांअ लणअ।
22
और सोभ गल्ला की तेऊए पैरा हेठै और सह दैनअ सोभी गल्ला दी शिरोमणीं बणांईं करै विश्वासीए मंडळी लै।
23
अह आसा तेऊए देह और तेऊए परिपूर्णता, ज़ुंण सोभी दी और सोभै गल्ला पूरी करा।