5
1
ऐलहेरे लेई हे ट्लाराव, बच्चाँ केरे ज़ेरे परमेशरे कां बना|
2
ते प्रेमे मां च़ला; ज़ैंच़रे मसीहे भी तुस्न सैहीं प्रेम कीयो; ते इशे लेई अपनों आप खुशबू दार मुशकरे लेई परमेशरे कां च़ाड़तां कुरबान केरो|
3
ते ज़ेरू पवित्र लोकाँ केरे लेई ज़रूरीए, तैंच़रे तुस्न मां भी ज़नाह, ते कोंची तरीकेरू बूरू कम्म न भोए, या लालच़ेरे बारे मां गल्ल भी न भोए|
4
ते न बे शरमी, न बेंसरी गल्लां, न मेवजेरी गल्लां, किजोकी इना गल्लां शोभन्न न, बल्कि शुक्रगुज़ारी भोए|
5
किजोकी तुस इन ज़ानतथ, कि कोंची ज़नाह कार, या गन्दो मैंन्हू, या लालच़ी मैंन्हेरी, ज़ै, मूरती पूज़ा केरने बालोए, मसीह ते परमेशरेरे बादशैही मां तैसेरो कोई हिसो नैइं|
6
कोई तुस्न बेकार गल्लन सैहीं धोको न दे; किजोकी इने कम्मन सैहीं परमेशरेरो क्रोध हुकम न मन्ने बालन पुड़ भटकते|
7
ऐलहेरे लेई तैन केरू साथ न रखा|
8
किजोकी तुस त पेहिले त आँधरू थी, पण हुनी प्रभू यीशु मां लोआथ, ते लोारे बच्चा केरे ज़ेरे च़ला|
9
(किजोकी लोअरो फल सैभी किसमेरी भलाई, ते धार्मिकता, ते सच़्च़े)|
10
ते इन परखा, कि प्रभु कुन रोड़ू लगते|
11
ते आँधारारे निष्फल कम्मन मां शामिल न भोथ, बल्कि तैन पुड़ मलामत केरा|
12
किजोकी तैन कैरां छ़पोरां कम्मां केरी गल्ल केरनी भी शर्मए|
13
पण ज़ेतरे कमन पुड़ मलामत केरी गहतीए तैना सब लोई सैहीं बांदां भोतन, किजोकी ज़ै सब किछ बांदू केरते, तै लोए|
14
ऐलहेरे लेई तै ज़ोते, झ़ुल्लने बाला उठ ते मुड़दन मैरां ज़ींतो भो, ते मसीहेरी लो तीं पुड़ चमकेली|
15
ऐलहेरे लेई रोड़े च़ारे हेरा, कि केरी चाल च़लतथ; समझ़दारेरां केरी ज़ेरी की बे समझ़ां केरी ज़ेरी|
16
ते मोको कीमती समझ़ा, किजोकी दिहाड़े बुरेन|
17
ऐलहेरे लेई समझ़दार बना, पण ध्याने सैहीं समझ़ा, कि प्रभुएरी मरज़ी कुने?
18
ते दाछ़रो रस पीने मां मतवाले न भोथ, किजोकी ऐस सैहीं बदचलनी भोतीए, पण आत्मा सैहीं भेरोते राथ|
19
ते एपू मामेइं भजन ते स्तुति केरते ते आत्मिक गीत ज़ोथ, ते अपने अपने मने मां प्रभुएरे लेई गीत ते किरतन केरते राथ|
20
ते सदा सैभी गल्लां केरे लेई प्रभु यीशु एरे नोंवें सैहीं बाजी परमेशरेरू शुक्र केरते राथ|
21
ते मसीहेरे डरे सैहीं एकी होरेरे अधीन राथ|
22
हे कौन्शाव, अपने अपने मुन्शां केरे अधीन राथ, ज़ैंच़रे प्रभुएरे|
23
किजोकी कौंन्श मुन्शेरी करोड़ीए ज़ैंच़रे मसीह कलीसियारी करोड़ीए, ते एपू जानारो मुक्ति केरने बालोए|
24
पण ज़ैंच़रे कलीसिया मसीहेरे आधीने, तैंच़रे कौंन्शां भी हर गल्ली मां अपने अपने मुन्शेरे आधीन रहन|
25
हे मुन्शव, एपनी एपनी कौन्शान सैहीं प्यार रखा, ज़ैंच़रे मसीहे भी कलीसिया सैहीं प्यार कैरतां अपनो आप तैसेरे लेई दितो|
26
कि तैसेरो वचने सैहीं पैनेरे निहाने सैहीं साफ भोइतां पवित्र बनाए|
27
ते तैसेरी जलाली कलीसिया बनेइतां एपू कां खड़ी केरे, ज़ैस मां न कोई दाग, न धबो, न कोई एरी चीज़ भोए, बल्कि पवित्र ते बेइलज़ाम भोए|
28
ऐलहेरे लेई जैइजे, कि मुन्श एपनी कौंन्शी सैहीं अपने जानी बराबर प्यार रखे| ज़ै एपनी कौंन्शी सैहीं प्यार केरते, तै एपू सैहीं प्यार केरते|
29
किजोकी कोंचे कधी एपनी जानी सैहीं बैर नैइं रखोरो बल्कि तैसेरी हेर गेश केर्रीए, ज़ैंच़े मसीह भी कलीसिया सैहीं केरते|
30
ऐलहेरे लेई अस तैसेरे जानरे अंगम|
31
ऐलहेरे लेई मड़द अम्मा बाजी शैरतां अपने कौन्शी सैहीं मिलोरो रालहो|
32
ई भेध त बड़ोए; पण आंव मसीह ते कलीसियारे बारे मां ज़ोताइं|
33
पण तुस्न मैरां हर कोई एपनी कौंन्शी सैहीं एपू बराबर प्यार रखे, ते कौन्शी भी अपने मुन्शेरो डर मन्ने|