3
1
ऐलहेरे लेई आंव पौलुस ज़ै होरी कौमां केरे लेई मसीह यीशु मां कैदइं|
2
अगर तुसेइं परमेशरेरे तैस अनुग्रहेरे इन्तज़ामेरी रोड़ी खबर शुनोरी भोए, ज़ै तुशे लेई मीं दिती|
3
मतलब ई, कि तै भेध मीं पुड़ प्रकाशे सैहीं बाँदो भोव, ज़ैंच़रे मीं पेहिलू साफ लिखोरूए|
4
ज़ैस सैहीं तुस पैड़तां बुझ़ी बटतथ, कि आंव मसीहेरो तै भेध कोड़ी तगर समझ़ताइं|
5
ते होरी होरी बेले मैंन्हनू केरी ओव्लाधी ऐंच़रे न थू ज़ोवरू, ज़ैंच़रे आत्माइ सैहीं हुनी तैसेरे प्रेरतन ते नेबन पुड़ बांदू केरू|
6
मतलब ई, कि मसीह यीशु मां सुसमाचारे सैहीं होरी कौमां केरे लोक जैइदादी मां हिसेदार, ते अक जिसम ते वाइदे मां शामिल भोन|
7
ते आंव परमेशरेरे अनुग्रह सैहीं तैस दानेरे मुताबिक, ज़ै तैसेरे शेक्तरे अस्सरे सैहीं मीं दितो, तैस सुसमाचारेरो सेवक बनो|
8
मीं पुड़ ज़ै सब पवित्र लोकन मैरां निकड़े कैरां निक्ड़ोई, ई अनुग्रह भोव, कि आंव होरी कौमन मसीहेरो कीमती घनेरो सुसमाचार शुनेइं|
9
ते सैभन पुड़ ई गल्ल बांदी केरी, कि तैस भेधेरो इन्तज़ाम कुने, ज़ै सैभी चीज़ाँ बनाने बाले परमेशरे मां पेहिलो देंतो छ़पोरोए थू|
10
ताकि हुनी कलीसिया ज़िरीये सैहीं, परमेशरेरू आलग आलग किसमेरू ज्ञान, तैन प्रधान्न ते आधीकैरन पुड़, ज़ैना स्वर्गेरे ठैरन मां आन बांदी कीव गाहे|
11
तैस पेहिली मेर्ज़रे मुताबिक, ज़ै तैने इशे प्रभु यीशु मसीह मां की|
12
ज़ैस मां असन पुड़ विशवास रखने सैहीं दिलेरी ते भरोसे सैहीं नेड़े एजनेरो अधिकारे|
13
ऐलहेरे लेई आंव बिनती केरताइं कि ज़ैना दुःख तुशे लेई मीं पुड़ लेवरेन एजने, तैन केरे वजाही सैहीं दिलेरी न शैरी, किजोकी तैन मां तुशी महिमाए|
14
ऐलहेरे लेई आंव तैस बाजी कां ज़ैधू टेकताइं,
15
ज़ैस सैहीं स्वर्ग ते ज़मीनी पुड़, हर एकी घरानेरू नोंव रखू गहते|
16
कि तै एपनी महिमारे धनेरे मुताबिक तुस्न इन दान दे, कि तुस तैसेरी आत्माइं सैहीं अपनो एनत्रिोँ मैंन्हू मां शक्ति हसल कैरतां मज़बूत भोते गहथ|
17
ते विशवासे सैहीं मसीह तुशे दिले मां राहे, कि तुस प्रेमे मां ज़ील छ़ेडतां मुनीयाद छ़ेडतां|
18
सब पवित्र लोकन सैहीं रोड़े च़ारे समझ़नेरी शक्ति हसल केरा; कि तैसेरी चोड़ाई, ते लमबाई, ते ऊंचाई, ते डुघार केतरोए|
19
ते मसीहेरे तैस प्रेमे सैमझ़ी बटतथ ज़ै समझ़ी कैरां दूरे, कि तुस परमेशरेरी भरपूरी सैहीं भरते गाथ|
20
हुनी एरी ज़ै एरहो शेक्ति बालोए, ज़ै इशी बिनती ते समझ़ी कैरां बडू जादे कम्म केरी बटते, ते तैस सामर्थरे मुताबिक असन मां कम्म केरते,
21
कलीसिया मां, ते मसीह यीशु मां, तैसेरी महिमा पीड़ी कैरां पीड़ी तगर हमेशा भोती राए| आमीन|