¹ इस कारण मैं पौलुस जो थम गैर-जातां के खात्तर मसीह यीशु का कैदी सूं – ² जै थमनै पणमेशर के उस मैहरबान्नी के इन्तजाम की खबर सुणी हो, जो थारै खात्तर मेरे ताही दिया गया, ³ यानी के वो भेद मेरे पे प्रकाशन कै जरिये प्रकट होया, जिसा मैं पहल्या ऐ छोटे रूप म्ह लिख चुक्या सूं, ⁴ जिसनै थम पढ़ कै जाण सको सों के मैं मसीह का वो भेद कड़ै ताही समझु सूं ⁵ जो और बखत म्ह माणसां की ऊलाद ताही इसा न्ही बताया ग्या था, जिसा के आत्मा कै जरिये इब उसके पवित्र प्रेरितां अर नब्बियां पै दिखाया ग्या सै| ⁶ यानी के मसीह यीशु म्ह सुसमाचार कै जरिये और गैरजातां के माणस पुश्तैनी म्ह साज्झी, अर एकैए देह के अर प्रण के साज्झी सै| ⁷ मैं पणमेशर की मैहरबान्नी के उस दान कै मुताबिक, जो उसकी सामर्थ के असर के मुताबिक मेरै ताही दिया गया, उस सुसमाचार का सेवक बणा| ⁸ मेरै पे जो सारे पवित्र माणसां म्ह तै छोटे तै भी छोटा सू, या मैहरबान्नी होई के मैं दूसरी जातां नै मसीह के आण आळे धन का सुसमाचार सुणाऊँ, ⁹ अर सारा पे या बात जाहेर करूँ के उस भेद का इन्तजाम के सै, जो सारा नै रचनिया पणमेशर म्ह शुरु तै लुह्क्या होया था| ¹⁰ ताके इब कलीसिया कै द्वारा, पणमेशर का न्यारा ढाळ का ज्ञान उन प्रधानां अर अधिकारियां पै जो सुर्गीय जंगहां म्ह सै, दिख्या जावै| ¹¹ उस (सनातन)घणी पुराणी मनसा के मुताबिक जो उसनै म्हारे प्रभु यीशु मसीह म्ह करी थी| ¹² जिस म्ह हमनै उस पे बिश्वास करण तै हिम्मत अर भरोसे के गैल्या पणमेशर कै लोवै आण का हक सै| ¹³ इस करकै मैं बिनती करूँ सू के जो क्लेश थारै खात्तर मन्नै होवै सै, उनकै कारण हिम्मत ना छोड़ो, क्यूँके उन म्ह थारी बड़ाई सै| ¹⁴ मै इस्से कारण उस पिता कै आगै गोड्डे टेकू सू, ¹⁵ जिस तै सुर्ग अर धरती पे, हरेक कुन्बे का नाम राख्या जावै सै, ¹⁶ के वो अपणी बड़ाई के धन कै मुताबिक थमनै यो दान दे के थम उसकी आत्मा तै अपणे भीतरी माणसपन म्ह सामर्थ पाकै ताकतवर होंदे जाओ; ¹⁷ अर बिश्वास कै जरिये मसीह म्हारै मन म्ह बसै के थम प्रेम म्ह जड़ पकड़ कै अर निम धर कै, ¹⁸ सारे पवित्र माणसां कै गैल्या आच्छी ढाळ समझन की ताकत पाओ के उसकी चौड़ाई, अर लम्बाई, अर ऊँचाई, अर गहराई कितनी सै, ¹⁹ अर मसीह के उस प्रेम नै जाण सको जो ज्ञान तै परै सै के थम पणमेशर की सारी भरपूरी तैई जमा भर जाओ| ²⁰ इब जो इसा ताकतवर सै के म्हारी बिनती अर समझ तै भी घणा काम कर सकै उस सामर्थ कै मुताबिक जो म्हारे म्ह काम करै सै, ²¹ कलीसिया म्ह अर मसीह यीशु म्ह उसकी बड़ाई पीढ़ी तै पीढ़ी तैई युगायुग होंदी रहै| आमीन|