¹ पौलुसा री तौरफा कु ज़ुण परमेश्वर रौ दास और यीशु मसीहा रौ प्रेरित आ, परमेश्वर रै च़ुनै औन्दै लोगु रै विश्वास और भौक्ती रै अनुसार आ। ² तिऐं सौदा री ज़िन्दगी री आशी माथै, ज़ासरौ वायदौ परमेश्वरै ज़ो झ़ूठ नाई बोली सौकदौ भौरी पैहला ओउलै की आ। ³ पर ठीक बौग्ता माथै आपणै वचन तेस परचारा रै ज़ौरिऐ परगट कियौ, ज़ो आमारै छ़ुटकारै दैणै वाल़ै परमेश्वरा री आज्ञा रै अनुसार मुकै सांबी ऐरौ आ। ⁴ तितुसा रै नावां दी ज़ुण विश्वासा दी साथा ई रौइणै रै बच़ारा कु मैरौ सौच़ौ छ़ोहरु आ: सौरगा रौ बाब बाब और आमारै छ़ुटकारै दैणै वाल़ै मसीह यीशु री बौड़ी दया और शान्ति थाका हुंदै लागी। ⁵ हाऊं एथीलै ताऊं क्रेते दी छ़ाड़ियौ आशो ऊ, कि ज़ो बुशै छ़ूटी ऐंदी तू तिऊं सारी बुशै सुधारा, और मेरी आज्ञा रै अनुसार इलाकै-इलाकै दी स्याणैऊ छ़ाँटा। ⁶ ज़ो निर्आरोप और एक ई छ़ेउड़ी रै बोउटै औलै, और ज़ासरै छ़ोटी-छ़ोहरु विश्वासी औलै, और ज़ासदी मौनमौरज़ी रौ आरोप नाईं औलौ। ⁷ कैलैकि मुख्यौ परमेश्वर रौ भंडारी हुणै रै कारणै निर्आरोप हुणौ च़ाईं, ना हठ कौरणै वालौ, ना रोष गाड़नै वाल़ौ, और ना सूरी पीणै वाल़ौ, ना झ़ौगड़ै कौरणै वाल़ौ, और ना बेकार कौमाई रौ लोभी हुणौ च़ाईं। ⁸ पर पाऊणै री इज्ज़त-मान कौरणै वाल़ौ, भौलाई च़ाहाणै वाल़ौ, खौइणै वाल़ौ, फैसलै कौरणै वाल़ौ पवित्र और ज़ीतणै वाल़ौ हुणौ च़ाईं। ⁹ और विश्वासा रै लायक वचन ज़ो धौर्मा री शिक्षा रै अनुसार ई, टेकी रौआ; और आच़्छ़ी शिक्षा रै ज़ौरिऐ उपदेश देई सौका; और और ज़ो वाद-विवाद कौरा आ तिऊंरौ मूं भी बन्द कौरी सौका। ¹⁰ कैलैकि भौरी का लोग निरंकुश/मौनमौरज़ी रौ बकबास कौरनै वाल़ै और धोखै दैणै वाल़ै ई, खास कौरिऐ ज़ासरै खौतनौ आ कियौ औन्दौ। ¹¹ इउंरौ मूँ बन्द च़ाईं कौरनौ कैलैकि इऐ लोग बेकार कौमाई लै बेकार बुशै शिखाइयौ घौरा रै घौर पोरू बिगाड़ा ई। ¹² तुमु मांझ़िया कु एकी आदमीऐ ज़ो तिऊंरौ भविष्यवक्ता सा, बोलौ आ, कि क्रेतै रै लोग झ़ूठै, दुष्ट/बरै गूँड, आलसी, और सिर्फ पेटा भौरणै वाल़ै ई। ¹³ इऐ गवाही सौच़्च़ी आ, एथीलै तिऊं काठा कौरी खुशी री खौबरदार थाक कौरदै लागी, कि विश्वासा दी पाकै च़ाईं हुऐ। ¹⁴ और सै यहुदिउ री कथा कहाणिउ और आदमिउ री आज्ञा माथै ज़िऊ ना ला लै, और सौच़ाई कु भौटका लै पोरू। ¹⁵ सारेउ लोगु लै सारी च़ीज़ै च़ोखी ई, पर अशुद्ध विश्वासिउ लै कुछ़ शुद्ध नाईं आसतौ, पर तिउंरी बुद्धी और विवेक सब कुछ़ अशुद्ध आ। ¹⁶ सै बोलाई कि, आमै सौरगा रौ बाब ज़ाणी ई:, आपणै कामा कु तेसरौ इन्कार कौराई, कैलैकि सै जौगरै और आज्ञा ना मानणै वाल़ै ई, और केज़ै भी आच्छ़ै कामा रै लायक नाईं आसतै।