¹ पौलुसा री तौरफा कु ज़ो परमेश्वरा री इच्छ़ा कौरी यीशु मसीहा रौ प्रेरित आ, तिऊं पवित्र और मसीह यीशु दी विश्वासी लोगु रै नावां दी ज़ो इफिसुसा दी आ। ² आमारै बाब सौरगा रौ बाब और प्रभू यीशु मसीहा री तौरफा कु तुमुलै बौड़ी दया और शान्ति थाका ली मिलदै लागी। ³ आमारै प्रभु यीशु मसीहा रौ, सौरगा रौ बाब ज़ुण बाब भी आ धन्यबाद च़ाईं हुऔ तिणीऐ आमुलै मसीह दी (कैलैकि आमैंं मसीह आइलै मिलै) सौरगा री ज़ागाह दी सारै रौंगा री आत्मिक आशीष देई आ। ⁴ ज़िणौ तिणीऐ आमैंं दूनिया चाणनै कु पैहलै मसीह दी छ़ाँटी ऐरै, कि आमैंं तेसरै नज़दीक प्यारा दी पवित्र और निर्दोष औलै। ⁵ और आपणी इच्छ़ा रै अभिप्राय रै अनुसार आमैंं आपुलै पैहलै कु च़ुनै, ताकि यीशु मसीह रै ज़ौरिऐ आमैंं तेसरै इणै छ़ोहरु औलै ज़िणै कासरै धाचणा लै औआ ई आणै औन्दै। ⁶ कि तेसरी तिऐं बौड़ी दया री महिमा री स्तूति च़ाईं हुई, ज़ो तिणीऐ आमुलै तेसरै प्यारै छ़ोहरु रै ज़रीऐ मुफ्त देई। ⁷ आमुलै तेथ दी तेसरै लोऊ रै ज़ौरिऐ मुक्ति, मतलब कि बुरै कामा री माफी, तेसरी तिऐं बौड़ी दया री ज़यदादा रै अनुसार मिलौ आ ⁸ ज़ेथकु तिणिऐ सारै ज्ञान और समझ़ा आइलै आमु माथै जरुरता कु ज़ादौ कियौ आ। ⁹ कि तीणिऐ आपणी इच्छ़ा रौ भेद मसीह रै ज़रीऐ आमुकै बोलौ ज़ो तीणिऐ आपु दी ठाणी ऐरौ आ। ¹⁰ और परमेश्वरै इणौ विच़ार कियौ कि ठीक बौग्ता दी ज़ुण सौरगा दी आ, और ज़ो कुछ़ धौतरी माथै आ, तेस सारौ कुछ़ मसीह दी कौठै कौरा। ¹¹ तेथी दी ज़ेथ दी आमैंं भी परमेश्वरा री मौरज़ी कौरी पैहला कु च़ुनै औन्दै रै कारण वारीस बौणै, ज़ुण आपणी मौरज़ी रै चुनाव रै अनुसार सब कुछ़ कौरा आ। ¹² कि आमु ज़ुणीऐ मसीह माथै पैहला ओउलै आश छ़ाड़ी आ, तेसरी महिमा री स्तूती रै कारणै हुआ। ¹³ तेथी दी तुमु माथै भी ज़ेबी तुमुऐ सौच्च़ाई रौ वचन शूणौ आ, ज़ो तुमारै छ़ुटकारै रौ खुशी री खौबर आ, और ज़ेथ माथै तुमुऐ विश्वास कियौ आ, वायदै किऐ औन्दै पवित्र आत्मा री छ़ाप लागी आ। ¹⁴ सेउ तेसरै खरिदियौ नियैं औन्दै रै छ़ुटकारै लै आमारी मीरासा रौ बयानौ आ, कि तेसरी महिमा री स्तूती हुआ। ¹⁵ एज़ै कारणै, हाऊं भी तेस विश्वासा री खुशी री खौबर शुणियौ ज़ो ज़ो तुमु लोगु दी प्रभु यीशु माथै आ और सारेउ पवित्र लोगु माथै परगट आ। ¹⁶ तुमुलै हाऊं धन्यवाद कौरणौ नाईं छ़ाड़दौ, और आपणी प्राथना दी तुमु याद थाकाऊ कौरदै लागी। ¹⁷ कि आमारै प्रभु यीशु मसीह रौ सौरगा रौ बाब ज़ो महिमा रौ बाब आ, तुमु आपणी पहच़ाना दी, ज्ञान और प्याशै री आत्मा दिआ। ¹⁸ और तुमारै मौनारौ आखी प्याशै वाल़ी हुआ, कि तुमै ज़ाणो कि तेसरै औटाउणै री किणी आश हुआ सा,और पवित्र लोगु दी तेसरी मीरासा री महिमा रौ धन किणौ आ। ¹⁹ और तेसरी तागत आमारी तौरफा दी ज़ो विश्वास कौराई, केती बौड़ी आ, तेसरी शक्ति रै प्रभाव रै तेस कामा रै अनुसार ²⁰ ज़ो तीणिऐ मसीहा रै बारै दी कियौ आ, कि तेस मौरै औन्दै मांझ़िया कु ज़ीउंदौ कौरियौ सौरगा री ज़ागाह दी आपणी सुल़टी भिलै बोशाल़ौ आ। ²¹ सारै रौंगा रै राज़ और हक, और तागत, और प्रभुता रै, और हर नावां माथै, ज़ो ना सिर्फ ऐज़ै जुगा दी, पर आशणै वाल़ै जुगा दी भी नींआ ई बोशाल़ौ। ²² और सब कुछ तेसरै बाँगणा थाली कौरी ऐरौ आ और सेउ सारी च़ीज़ु माथै शिरोमणी चाणियौ कलिसिया कै दैऔ। ²³ एउ तेसरौ शरीर आ, और तेसरी परिपूर्णता सा, ज़ो सारेउ दी सब कुछ़ पूरौ कौरा सा।