¹ तिणिऐ तुमै भी ज़िउंदै कियै, ज़ुण आपणै बुरै काम और प़ापा कौरी मौरै ² ज़ासदी तुमै पैहलै इयैं संसारा री रीती माथै, और आसमाना रै हका रै आफ़सर मौतलब सेज़ी आत्मा रै अनुसार च़ाला थै, ज़ुण ऐबै भी हुक्म नाईं मानणै वाल़ेऊ माझीं काम कौरा ई। ³ इउंदी आमै भी सारै रै सारै पैहलै आपणी शरीरा री ईच्छ़ा दी दीन बितावा थै, और दुज़ै लोगु बाशी तिंउरै कामा कु रोशा रै छ़ोहरु थै। ⁴ पर परमेश्वरै ज़ुण दया रौ सेठ आ, आपणै तेस बौड़ै प्यार कु ज़ेथ कौरी तिणिऐ आमु आइलै प्यार कियौ, ⁵ ज़ैबै आमै बुरै कामा कौरी मौरै औन्दै थै ता आमै मसीह यीशु आइलै ज़िउंदै किऐ (बौड़ी दया कौरी ई तुमुरौ मुक्ति हुऔ आ), ⁶ और मसीह यीशु दी तेस आइलै उठाऐ, और सौरगा री ज़ागाहह दी तेस आइलै बोशाऔ ⁷ कि सेऊ आपणी सेज़ी किरपा कौरी ज़ेज़ी मसीह यीशु दी आमु माथै आ, आशणै वाल़ै बौग्ता दी आपणी बौड़ी दया री भौरी का ज़्यदाद देखाल़ा। ⁸ कैलैकि विश्वासा कौरी बौड़ी दया कु ई तुमुरौ मुक्ति हुऔ आ; और एउ तुमुरी तौरफी कु नाईं, बल्कि परमेश्वर रौ दैयौ औन्दौ दान आ, ⁹ और ना कामा कौरी, इणौ ना च़ाईं हुऔ कि कुण घमण्ड कौरा। ¹⁰ कैलैकि आमैं तेसरै चाणै औन्दै ई, और मसीह यीशु दी तिऊं भौलै कामा लै चाणै ज़ेज़ै तिणीऐ पैहलै कु आमु लै कौरणा लै ई चाणै औन्दै। ¹¹ इणै कौरी याद छ़ाड़ौ कि तुमै ज़ुण शरीरा री रीती कु दुज़ी ज़ाती ई (और ज़ुण लोग शरीरा दी हाथा कौरी किऐ औन्दै खतनै कु खतनैवाल़ै बोलाई, सै तुमुलै बिण खतना रै बोला ई), ¹² तुमै सेज़ै बौग्ता दी यीशु मसीह कु अलग, और इस्राइला रै लोगु री ज़ागाहह कु अलग किऐ औन्दै और कौसमा रै वायदा रै भागी नाईं थै, बिण आशा रै और धौतरी दी ईश्वरा कु दूर थै। ¹³ पर ऐबै मसीह यीशु दी तुमै ज़ुण पैहलै दूर थै, मसीह रै लोऊ कौरी नज़दीक हुई गौऐ ई। ¹⁴ कैलैकि सेऊ आमुरौ मिलाउणै वाल़ौ आ, ज़ुणिऐ दुइया एक किऐ ई और अलग कौरणै वाल़ी द्वाल ज़ेज़ी बीचाई थी ढाल़ी गोई आ, ¹⁵ और आपणै शरीरा रै दुश्मन मौतलब सेज़ै नियम ज़ासरी आज्ञा नियमा री रीती माथै थी, मिटाई गोई कि दुइया कु आपु दी एक नौवौं चाणिऔ मिलावा, ¹⁶ और क्रूसा माथै दुश्मनी नाश कौरिऔ एथ कौरिऐ दुइया दी एक शरीर चाणिऔ परमेश्वर कु मिलावा। ¹⁷ तिणिऐ आशिऔ तुमुलै ज़ुण दुर थै, और ज़ुऩ नज़दीक थै, दुईया लै मेल-मिलापा री खुश-खुशी री खौबरी शुणाई आ। ¹⁸ कैलैकि तेसी कौरी आमु दुई री एक आत्मा दी बाबा झ़ाऊं पौहुंच़ हुआ आ। ¹⁹ एथीलै तुमै ऐबै विदेशी और बौटैणु नाईं रौऐ, पर पवित्र लोगु रै साथी दुज़ै देशा रै और परमेश्वर रै टौबरा रै हुई गौऐ। ²⁰ और प्रेरितों और भविष्यक्ताओं री पौई माथै, ज़ेथरै कुणै रौ पात्थर यीशु आपु आ, चाणै औन्दै ई। ²¹ ज़ासदी सारै चाणै औन्दै कौठै मिलिऔ प्रभु दी एक पवित्र परमेश्वरा रौ घौर बौणा आ, ²² ज़ेथदी तुमै भी आत्मा कौरी परमेश्वरा री रौइणै री ज़ागाहह हुणा लै कौठै चाणियाई।