¹ చిన్నాయమారే , ప్రభువు కోరు నింగు అమ్మా ఆవ కు లోబూదు యిరుంగో ² ఇదు నల్లదు నీకు మేలు కలుగురు లాగ నింగ అమ్మా ఆవ న గౌరవించు అదు నీకు ఆయువన తారాకు ఇదు ³ వాగ్దానం ఓటి యిక్కురు మొదటి ఆజ్ఞ. ⁴ అమ్మా ఆవ మారే నింగు చిన్నాసులకు ఎసరం రపిమ్పమానుంగో ఆసలన క్రమశిక్షణ కోరు బోధ కోరు పెంచుంగో. ⁵ దాసులగా యిక్కురాయా బీతోటి యిక్కురు గౌరవం ఓటి వణుకు ఓటి క్రీస్తుకు లోబూధట్టు ఈ లోకం కోరు యజమానులకు ⁶ హృదయపూర్వకంగా లోబుగుంగో మొనుసురున సొంతోషమెక్కురాయ చేయురట్టు మేని మేని అల్లాగుండా క్రీస్తుకు దాసులుగా దేవుర ⁷ సంకల్పాన్న హృదయపూర్వకంగా జరిగించిగాటి. ప్రభుకు చెంధట్టే యిష్టపూర్వకంగా సేవ చేయుంగో. ⁸ దాసుడానికే,స్వతుంత్రుడు ఆనికే ,నింగుల కోరు ప్రతి ఆము అదు చేంద నల్ల పనికి ప్రభువు వల్ల ప్రతిఫలం పొందాకు యిండు నింగులకు తెలిము. ⁹ యజమానులరా నింగ నింగుల దాసుల పట్ల ఆనే ప్రవర్తించుంగో నింగులకు నింగు దాసులకు ఉండే ఎజమాని పరలోకం కోరు కీదు యిండు అదు పక్షపాతం యిల్లారాము యిండు గ్రహించి అసలా బెదిరించుర్దు మానుంగో . ¹⁰ ఆఖరగా ప్రభువు బేరు శక్తిన బట్టి అత్తుకోరు భలంగా యిరుంగో. ¹¹ నింగ సాతాను కుతంత్రంగ ఎదుర్గుర్తుకు దేవురు తార్రు సర్వాంగ కవచాన్న ధరించుంగో. ¹² అంతుకిండికే నంబురు పోరాడుర్దు మొనుసురోటి అల్లా ,ఇప్పుడు యిక్కురు చీకటి సంబంధ మాన లోకనాధులోటి,ప్రాధానులోటి,అధికారులోటి ,ఆకాశం కోరు యిక్కురు దురాత్మల సముహముల ఓటి పోరాడాకరో. ¹³ అంతుకిండు నింగ కెట్ట కాలం కోరు అసలా ఎదిరించి శక్తిమంతులగా నిలబుగురట్టుగా దేవురు తార్రు సర్వాంగ కవచాన్న ధరించుంగో. ¹⁴ నింగు నడుముకు సత్యం యింగురు నడికట్టు ,నీతి యింగురు కవచం . ¹⁵ పాదంగులకు శాంతి యింగురు నల్ల వాత కోసం సిద్దబూద మనసు యింగురు చెప్పుగా ధరించుంగో. అసులతో పాటు ¹⁶ పగాము విసురురు అగ్ని బాణాలన అడ్డిగుర్తుకు తోడు బుగురు విశ్వాసం యింగురు డాలు పుర్సుంగో. ¹⁷ యింకా పాపవిమోచన యింగురు శిరస్త్రాణం,దేవురు వాక్కు యింగురు ఆత్మ కొల్లి న ధరించుంగో. ఆత్మకోరు అడ్డి ¹⁸ సమయాల కోరు అడ్డి రకాల ప్రార్ధనగ చేందు గాటి యిరుంగో అత్తు కోసం పూర్తి పట్టుదల ఓటి విశ్వాసులడ్దేరు కోసము విజ్ఞాపన చేందు గాటి మేలిండు యిరుంగో. ¹⁹ ఆనే నాను ఏ కారణం ఓటి సంకెళ్ళు కోరు కీరెనో , ఆ నల్ల వాత ²⁰ న ప్రకటించుర్తుకు వాయి తోర్ధప్పుడు . ధైర్యంగా వాస్తిరు లాగా నాకోసం ప్రార్ధన చేయుంగో. ²¹ నటు అన్న దెమ్బి తుకికు నటు క్షేమ సమచారమడ్డి నింగులకు సొంనిగాటి యిక్కాకు అదు ప్రభువు కోరు నమ్మకంగా పనిచేయురాము. ²² ఈ వాతగ నింగ తెలిసిగుర్తుకు ,నింగ హృదయాలు న ఓదార్చుర్తుకు అత్త నింగుల మాటుకు పంపినే ²³ ఆవ ఆన దేవురు మాటిండు ప్రభువు ఆన దేవురు మాటిండు విశ్వాసపూర్ణ మాన శాంతీ,ప్రేమా ²⁴ అన్నదెంబిలకు కలుగుం గాకా. నంబురు ప్రభువాన యేసు క్రీస్తు మేని నిత్య ప్రేమ కాటిక్కురాసులకు కృప తోడై యిక్కిం గాక.