¹ Anre iku cira amazghayi unrhokuyi a gwekseneyi an dhorkoroyi. ² Ama wana katuk ka Sabar i miseyhon inung a Majami'a ayhr agwaki ama pokoroyi, anre kura seri amina a vereh woh "Iki nng izuwu misenuru?" "Wami e rhoyu uyhaku?" u hikima u rini nang a rhoyi u rikini. ³ Ku zan ku kafinta kun nang Muna na aku kaangahyi awo ki Maryamu, nang ah kommini Yakuvu nang ki Yosi nang Yahuza nang Saminu, a kommini azaku re nang a wuri?" ama roto pokoru rentu u Yesoh. ⁴ Anre Yesoh iku veruh yhon awoh, "Annabi izaku ri rizayi urho kuyi nang a rari kayi, nang u rarah kuyi". ⁵ Imah roto susku rene anang amina urho kuyi, sai ko iku ma tarkara na cara nayi a war'ahne aron ami ama zaku warsi. ⁶ Imah pokoro amina uzaku rume nang yi, anre iku kanu ana rhon arho aka ra mise. ⁷ Anre iku kangne ama gwekseru mani anre iku tumayon unsizazu amajha'ah nang mazir mayiman. ⁸ Anre iu mi'ah yhon awoh asu zika irangwa inung ujharu sai ko kati, ba nang mafhowari nang kavika nang ikhor'oh balle rih. ⁹ An rene a raka asu zika mariya mavah. ¹⁰ Anre iku veruh yhon, "In nang en nighe urara zomoni atekkami sai inkuka jharini" ¹¹ In nna kurho ko vonokuni ko kuma ko zaku pokorini in kwakde mavullu mana vinah nayin, mangka wanaa u shaida, a jharini. ¹² Ama cirah araka seri maververeh ma Siri nang ayhar asa an vanduruwo nang Kang. ¹³ Ama cizaza a sifu a gwakane, anre aku munzaze agwana adun manuk, anre ku war'ahze yhon. ¹⁴ Piwomo Hirudus imah pokoro rizayi Yesoh rima gwakana. Arong anra verveneh woh, "Are Yuhanna piyu baftisma ima co inung u sek" Awarkani utumah uyi ureh mina. ¹⁵ Arong ama vereh awoh, "Are Iliya" Arong anwoh, "Are pirong u tumzanani o Siri" ¹⁶ . Hirudus ima pokoro, anre ikuwoh, "Yuhanna ummih nang ummah cuwuneyi riti yi nang a coneyi" ¹⁷ Hirudus imah reneh anka puru Yuhanni anre iku reneh yi un rhagha ku rereh, awarki Hirudiya (piyhowu Filivuz kommina kayi) awarku woh e yirayi. ¹⁸ Yi Yuhanna imah awoh u Hirudus, "Kuzaku reh kuwoh piyir piyhowu konau" ¹⁹ Anre ki Hirudiya kin kura yab Yuhanna a suwu kakin, kimma soh u wunayi arotoh zuwu rineh. ²⁰ Hirudus ipok ukau u Yuhanna awarku woh iyho ire piyama tini agura vurah, iku damu in nanghe pokoroyi duk nang ken i pok righara nang u pokoronu uyi. ²¹ Kadhar kama wana Hirudus, irise righarho kuti wah tu rewu uyi, imah kangahze a mahakmai nang ya gwakazi aworun Galili. ²² Khono ki Hirudiya kama yi'ah aka vokone Hirudus a suwu, iwoh ukan, "Tanzani kusu nang pi suni man revevuh kin" ²³ Imah siri awoh "Ko yen nang pi suni mang rhovuh kin ko umma par'ah mayinzi manang tivah a rovuh patta" ²⁴ Kama cira a kanah nang muna aka aka woh "Yen nan man tanzana"? Muna iwoh, "Ka tanzana ritiri Yuhanna piyu baftisma" ²⁵ Anre kanku sunge a kanah nang piwomo awoh uyi, "Un suni riti ri Yuhanna piyu baftisma inung in sef kinikini" ²⁶ Piwomu mi amara dinne, imamah siri a nho kayi. ²⁷ Arhakhar imah tu tumah apiyah na akuwo kudogari asa ika cuwune riti ri Yuhanna piyu baftisma, anre iku jharayi aka ciwune a Yuhanni riti un rhagah ku rere. ²⁸ Anre anku yende kang ritirimi kang jha'ah yi muna. ²⁹ Anre agwekseneyi anko pokoro aruvah anang zika ripumhm riyi aka kaveh. ³⁰ Agweksene ami an guru nang Yesoh amiyayi ikusu nang ama riseh, nang k ikusu nang ama miseh. ³¹ Yesoh i veruh yhon awoh, "Ruvahni uteyini atek ka nisazani aka vonsono na cini" Ayhar adun amatu ri na rir, ko ka dhar ka ri kamariniru agwekseni ami ama roto zuwa. ³² Anre anku jharayhon atek ku girgi atek kanisazani unteyhon. ³³ Ama reyheyhon asin jhaseyhon, anre ayhar anku ren na gwir daga amarho asang aka ah'ahyhon ³⁴ Yesoh imasin ka rufsa anre iku reyhe ayhar adun riruripovoh rinka puruyi, awar kuwoh ama reyheyon an siyi magam mai ma zaman pivi'ahni. Anre ikura miseyhon ankusu mudun. ³⁵ Anyi muma rama rivah, agekseneyi an ruvah awoh uyi, "Katek kana ka zaku rhi pirung anyi mun rama rivah. ³⁶ Veruh yhon asa an ninghze ana rho a patazi asa anka zemzene mariniru". ³⁷ Anre iku mane yhon awoh, "Aini rhoniyhon mariniru mami" Agekseni anwoh,"Na tika zemene mafhowari mama dinari madari mavah arhoyon anri?" ³⁸ Anre iku verhuyhon "Mafhowari mawar nang inri man, ka reyheni'' amaka reyhe awoh, "Are mafhowari ishi nang isani ivah". ³⁹ Yesoh iwoh anayhar anzonzono inung ungi uzuk anakuwu. ⁴⁰ Anre ku zonzono anakuwu, arong madari-dari aron akiri ishi-shi. ⁴¹ Anre iku zika mafhowari mana nang isani imi, anre iku zhakkhwa izoh a rene a Siri usangihi, anre iku puna asin rukse a gwekseni ayi ansi wangza ayhar ami. ⁴² Ama rho nasang kuyhon awanza a siti. ⁴³ Anki wavuh rikiri amuvah mu mafhowari nang isani muma takam. ⁴⁴ Ayha ama rho, ayhar maduvih shi. ⁴⁵ Kini-kini itu rene a gwekseni an zonghoroyi aka ninghu girgi, amakanu manzu rakkwu amakanu Betsaida, itaka sallami rifighi re yhar ami. ⁴⁶ Anre kujharayhon yi kanu pana aka tanzana a Siri. ⁴⁷ Marung mama wana ku girgi kun rayi a teti ku mana, Yesoh iru ugwanti uteyi. ⁴⁸ Anre iku reyheyhon an seri tigwa-tigwa awar ku vunuh. Kadhar kami ama re pikor'oh petar atuk, Yesoh iruvah arene ne iko ivhara. ⁴⁹ Anre anku reyheyi aku boko piyamazise anre ku reniwumhm. ⁵⁰ Ama reyhe aka pokoru kau. anre iku veruh yhon, "Ba kurong are mini sunu pokoru kau". ⁵¹ Anre uku neyhe un girgi kumi nang yhon anre uvunuh unku kizah, anra seri a mina. ⁵² an rotoh yho'ahte anag ama fhowari mana awar nang na suwu na yhon na ma zikkwi. 53 Ama rakkwa aka ninghe amayizi mu Janisarata, anre ku sisize u girgi kumi ugwanti. ⁵⁴ Asin cizza u girgi kumi ayhar anka vharha ya'ahteyhon. ⁵⁵ Ayu rho kumi an jharayhon araka yendeze agwana inung amakumi mayhon. ⁵⁶ Duk katek na ie ninghem, ko urho ko ukawaye, an nonze a gwana amaninghe mu kasuwa, an tanzana yi irumi ko de makusu mayi an rike, ayah ama rike makusu mayi ama war'ahzana.