¹ Sartu damba ngumuri ki yahudaucin, Yeso zəgadu i aɗak lakwtu gəri batan gara ki ivak duniya da yin gəri i ri Afək, aku ntutu nda gəri wara a kunu duniya tuku a ci ntutu akshi har i miya dadegiri. ² Na bai ləspər tənin ɗawudu i kunu gəshi Yahuda Iskariot wən Siman da barna Yeso. ³ A ci zəgadu iɗak barna be tawanke i kunu aikwak gəri kuru i aɗak a ci deu da ri Kakasəku zam a kalaktan gəri i ri Kakasəku. ⁴ Se a ci da tli da ri tak masana aduwau da rənci na marim zanai gəri, se da mina arəyapu da twakshidu aku gəri. ⁵ Se da pi am i kunu bi pi am da banji viya zəger pakuraucin gəri da tli saspau na miya aryapu wara takwse aku gəri. ⁶ A ci deu i ri Simon Bitrus, se Bitrus da rami ci ma, "Məgəngyi kaye viya zəger ga?" ⁷ Yeso dan ngumi ci ma, "Be na dlamau tuku ka sanutu bai amman ka sanutu du da ku gəri." ⁸ Bitrus da rami ci ma, "Wa ne ka viye zəger ga." Yeso da rami ci in na viye ci bin, ci na nuba bai da ri ga." ⁹ Simon Bitrus da rami ci ma, "Məgəngyi ka viya zəger ga rugara bai amman na aikwak ga na aɗa cam." ¹⁰ Yeso da rami ci, "Nən wara gaviyak na paida dalma ci wambai se nda viye ci zəger gəri kuru, gaɗa a ci gaviyak; ci gaviyak amman tike bai. ¹¹ Gaɗa Yeso zəgana nən wara a bar gəri, gaɗa sen ne da ramma, "Gəd kun bai gaviyak." ¹² Sartu Yeso damina viya zəger shi se da ɗawuna marim zanai gəri dan mbashin gəri wam, da ramikshi ma, "Kwasgana be na dlami kun? ¹³ Kwa daura ga maləm na Məgəngyi kuru kwa ramau kalkal, gaɗa Iyu kasənu. ¹⁴ In de har Iyu Məgəngyi na maləm nin har na viyana zəger, kun ye kwa viya zəgər kamaca kun. ¹⁵ Na bar di kun sanam gaɗa kun ye kwa dlam kasau ¹⁶ Jirew, jirew, na rami kun, mayim wənduwa a diki ba ci wənduwa gəri bai, ko mawanak daɗkina ba ci wənduwa gəri. ¹⁷ In kwasgana su nin kun na barka in kwa dlaminakshin. ¹⁸ Na ramatuku iɗa kun gəd bai, nasaga ndawa wara na chikɗu su tuku gaɗa kakkadu Səku da jəbki: ' Ba ci kiɗak borodi ga saktu na jigjiggəri iɗa ga.' ¹⁹ Na rame kun sau damba da wakati lakwtu wakata, kwa barna jirewa i aɗak Iyu ne. ²⁰ Jirewa, jirewa, na rame kun, nən wara gənna nən mi na wanau, gənna Iyu kuru nən mi gənna Iyu, gənna nən mi wara waneu Iyu. ²¹ Sartu Yeso a ramu sau, a ci gajəktak i kun Nənuwa, a ci tatku da ramma, "Jirewa jirewa, na rami kun iɗak gayi da kuna kun a barna Iyu." ²² Pakuraucin gu da ki kamancu a jabtau a ci a rama na tai. ²³ Gayi da kunu pakuraucin gəri wara Yeso ntutu gadiginatak iɗa tebur gu da baka Yeso. ²⁴ Simon Bitrus da viyki gadava pakuraucin gu da ramma, "A jayina a ci arama iɗa gaye." ²⁵ Se pakurau da guɗtike wam i baka Yeso da rami ci ma, "Məgəngyi, biwu tai?" ²⁶ Se Yeso ndan ngumi ci ma, "A ci nən mi na dawa chile burodi na bari ci " se lakwtu a ci dawu burodi tunu da ba ri Yahuda wən Simon Iskarioti. ²⁷ Se da ku burodi tunu, ləspər da tufi kunu gəri, se Yeso da rami ci ma, "Be kaye dlamau gu a dlandu kade" ²⁸ Gususku na nən wambai wara gadiginatak aɗa tebur zigau be wara dawu a ci da rami ci kasau bai. ²⁹ Jəgab a tumangu ma ko gaɗa Yahuda na lalitar dagwda, Yeso da rami ci ma, "Amasana be wara wancu gaɗa ngumuri ko a ci da bar be dagai iɗak tliwa. ³⁰ Aku Yahuda gənna borodu, dayin gəri vəda kade-kade sartu ye dəvid. ³¹ Lakwtu Yahuda jin gəri, Yeso da ramma, "Gususku wən gə nən a kunu kərmai, kuru Kakasəku ye a kunu kərmai i kunu gəri. ³² Kakasəku a kərmai ta na a ci i kun gəri tunu nən a kərmaita na a ci. ³³ Mamau ngangamin na da gayi na kun, i kunu lakwtu wara gazau rab, kwa ye maka ga, ka ki mi na rami yahudaucin, "Ri wara na ya akshi a dəmu nya bai, gusku ye, Na rami sau i kun. ³⁴ Na bari kun kararak dumaya, i aɗak kwa ntuti kamancha kun, ka ki nan ntutu kun, kun ye an ntuta kamanchu kun. ³⁵ Da sau tike a zəgedu kun pakuraucin ga in kun na ntu kamancha kun. ³⁶ Simon Bitrus da rami ci ma, "Məgəngyi kaye rawan?" Yeso dan ngumi ci, "Ri wara na ya, ka dəmu dəgau bai dəgo, amman ka dəgadu da kau." ³⁷ Bitrus da rami ci ma, "Məgənyi dawun tam na dəmu dəga ci bai gususku? Na bar na aro ga gaɗa ci" ³⁸ Yeso ndan ngumi ci ma, "Ka barna aro ci gaɗa ganai? Jirewa, jirewa na rame ci gaskam a dlam kwarya bai se ka dlam gamdaya ziger kwan.